Yu Ting Pasin Bilong i Stap Rabis Bai Pinis?
SAVEMAN King Solomon bilong Israel bilong bipo i tok: “Ol man nogut i save daunim planti manmeri, na ol dispela manmeri i krai nogut tru. Tasol i no gat man bilong helpim ol. Na gavman tu i no helpim ol. Long wanem, strong bilong gavman i helpim ol man nogut tasol.” (Saveman 4:1) Yumi save, planti bilong ol dispela man ol narapela i save daunim na Solomon i toktok long ol, ol i stap rabis tu.
Hamas mani man i tromoi bilong baim kaikai samting, dispela tasol i no inap kamapim stret olsem man i stap rabis o nogat. Wanpela ripot Wol Beng i kamapim long Jun 2002 i tok, “ol i ting long 1998 i gat olsem 1.2 bilion manmeri long olgeta hap bilong graun em ol i tromoi wan dola bilong baim kaikai samting long wanpela de . . . na 2.8 bilion manmeri i tromoi tu dola long wanpela de.” Ol i tok, maski namba bilong ol manmeri i stap rabis i go daun long namba bilong bipo, “i gat bikpela lain manmeri i kisim yet hevi long pasin bilong i stap rabis.”
Yu ting pasin bilong i stap rabis bai pinis? Jisas Krais i tokim ol disaipel bilong em: “Ol rabisman bai i stap wantaim yupela oltaim.” (Jon 12:8) Tasol yu ting dispela i makim olsem pasin bilong i stap rabis na ol samting nogut bilong en bai stap oltaim? Nogat! Tru, Jisas i no tok promis olsem olgeta disaipel bilong em bai kamap maniman, tasol yumi ken ting dispela tok i makim olsem bihain gutpela samting bai painim ol rabisman.
Maski ol man i wok strong na ol i tok promis long pinisim pasin bilong i stap rabis, dispela samting i no kamap tru, tasol Baibel i tokim yumi olsem klostu nau bai i no gat ol man i stap rabis. Na tu, Jisas i autim ‘gutpela tok long ol rabisman.’ (Luk 4:18) Dispela gutpela tok i makim tu tok promis olsem pasin bilong i stap rabis bai pinis. Dispela bai kamap taim Kingdom bilong God i kamapim stretpela pasin long graun.
Man! Narapela kain taim tru bai kamap! King Jisas Krais long heven “em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.” Tru tumas “sapos ol man nogut i laik daunim ol na bagarapim ol, em i save kisim bek ol.”—Song 72:13,14.
Maika 4:4 i tok long dispela gutpela taim olsem: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret. Bikpela I Gat Olgeta Strong i bin promis long mekim ol dispela samting.” Kingdom bilong God bai pinisim olgeta hevi i save painim ol manmeri, na tu, Kingdom bai pinisim ol sik na i dai. God “bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.”—Aisaia 25:8.
Yu ken bilip long ol dispela tok promis, long wanem, God yet i kamapim ol. Em i gutpela yu ken skelim ol samting i soim olsem yumi inap bilip tru long ol tok profet bilong Baibel.
[Piksa Kredit Lain long pes 32]
FAO photo/M. Marzot