Askim

◼ Sapos wanpela Kristen i no inap i go long Kaikai Bilong Bikpela, em i mas mekim wanem?

Em bikpela samting ol Kristen i mas i go long Kaikai Bilong Bikpela long olgeta yia, long wanem, taim Jisas i kirapim dispela bung em i tok: “Yupela mekim olsem bilong tingim mi gen.” (Luk 22:19) Ol Kristen bilong pastaim i save mekim olsem. Olsem na aposel Pol inap raitim pas long ol brata long Korin, em “olgeta i bung” long olgeta yia bilong mekim Kaikai Bilong Bikpela na tingim Jisas, em i dai na givim laip bilong em olsem ofa. (1 Korin 11:20) Tasol sapos i gat hevi, ating ol i save bung bilong tingim i dai bilong Jisas o nogat? Olsem wanem long Pol? Planti taim Pol i stap kalabus na ating em i no inap bung wantaim ol narapela brata long taim bilong mekim Kaikai Bilong Bikpela. Em i mekim wanem taim em i stap kalabus long Sisaria (na i gat ol wasman i stap na ating ol i pasim em long sen)?—Aposel 23:25; 24:26, 27.

Jisas i putim lo pinis, na maski Pol i stap kalabus, tasol yumi save em i mas tingim ol tok bilong Baibel long taim bilong mekim Kaikai Bilong Bikpela. Spirit holi i makim em bilong lain bilong heven, olsem na em bai painim rot bilong kisim wain na bret o sampela samting olsem em inap mekim wok long en. Long dispela taim bipo, taim ol man i kaikai, ol i save dring wain, olsem na ating Pol inap kisim sampela wain na sampela kain bret na mekim Kaikai Bilong Bikpela. Taim em i stap kalabus long Rom, ating em i bin mekim olsem, long wanem ol i larim ol man i kam lukim em. Ating sampela brata bilong Rom i “bung” wantaim em, olsem wanpela liklik lain, bambai ol i ken mekim Kaikai Bilong Bikpela.—Aposel 28:30.

Long nau, long de Naisan 14, long olgeta yia, ol kongrigesen bilong ol Witnes Bilong Jehova i save bung bilong tingim i dai bilong Krais, olsem Memorial. Tasol sampela taim narapela kain samting i kamap na sampela ol i no inap i kam bung. Sampela taim bikpela win na ren i bin kamap na pasim rot bilong sampela. Na wan wan taim gavman i putim lo na tambuim ol man long raun long nait, na ol soldia i was i stap, olsem na ol man i no inap raun long rot taim san i go daun pinis. Sampela Kristen i stap long haus sik o ol i gat bikpela sik na ol i no inap bung long taim bilong Memorial. Orait, sapos kain samting olsem i kamap, yumi mas mekim wanem?

I stret kongrigesen olgeta i mas bung wantaim long dispela apinun. Tasol sapos ol narapela kain samting i kamap, olsem nau yumi stori long en, ating bai sampela i no inap i kam bung. Sapos bikpela win na ren o bikpela sik samting i pasim wanpela famili o sampela brata sista bilong wanpela kongrigesen na ol i no inap bung wantaim ol narapela brata sista long dispela taim, orait, ol yet i ken bung wantaim na toktok long ol tok bilong Baibel i stori long dispela samting. Ol i ken lukim Luk 22:7-23, 28-30 na 1 Korin 11:20-31, na ol i ken stori long as bilong dispela Kaikai. O sapos gavman i putim tambu na kongrigesen i no inap bung long dispela nait, ating ol grup wan wan i ken bung o ol brata sista i stap long wanpela hap na ol i stap klostu ol i ken bung wantaim na mekim Memorial. Bihain ol i ken skelim hamas manmeri i bin bung long ol dispela liklik grup na bungim namba wantaim olsem hamas bilong kongrigesen ol i bin bung long dispela taim. Sapos i gat wanpela brata i dediket pinis em i stap na em inap mekim liklik tok, orait em i ken mekim. Na sapos ol i no gat bret na wain, ol i no ken tingting planti, tasol sapos wanpela man i stap, em bipo em i bin kisim bret na wain olsem wanpela Kristen God i bin makim em, orait ol i ken tingting long redim bret na wain.

God i givim Lo long ol Isrel long mekim kaikai bilong Pasova, na Lo i tok, sapos wanpela Isrel i no inap mekim Pasova long taim stret, orait wanpela mun bihain em i ken mekim. (Nambas 9:10, 11; 2 Kronikel 30:1-3, 15) Olsem tasol sapos narapela kain samting tru i kamap na wanpela Kristen bilong lain bilong heven i no inap bung wantaim ol narapela brata sista long taim bilong Memorial o ol i no inap givim bret na wain long em long Naisan 14, orait, ating em i ken kisim bret na wain 30 de bihain. Tasol dispela tok em bilong ol Kristen bilong lain bilong heven tasol, long wanem ol tasol i stap aninit long lo i tok ol i mas kaikai bret na dring dispela wain.—Galesia 6:16.

Long Epril 4, 1985 ol kongrigesen bilong ol Kristen tru bai bung long olgeta hap bilong graun na mekim olsem Jisas i tokim ol long mekim, em i bin tok: “Yupela i mas mekim olsem bilong tingting long mi.” Gutpela sapos yu inap bung wantaim ol.—1 Korin 11:25.