Insait Bilong Ol Tok i Kam Long Olgeta Hap
Pasin Bilong Lotuim Seten i Go Bikpela
Wanpela nius (The Press Democrat) bilong Santa Rosa, Kalifonia, i tok: “Long nau planti man i kirap mekim sampela pasin bilong lotuim Seten, na ol i laikim dispela kain ben ol i save paitim ol samting ol i wokim long ain na i pairap bikpela. ․․․ Planti yangpela manmeri ol i kirap lotuim Seten.” Ol bikman i ting pasin bilong lotuim Seten i as bilong sampela pasin nogut olsem pasin bilong brukim matmat na stilim bodi bilong man i dai pinis, na bagarapim sampela animal, na kilim i dai sampela man. Ol i save raitim sampela tok bilong Seten o mak bilong Seten, olsem namba 666, long karamap bilong sampela plet singsing na long ol banis nabaut. Wanem samting i kirapim planti yangpela long laikim pasin bilong lotuim Seten? Wanpela polis, em Dave Gaerin i tok, ‘Dispela musik ol i wokim long ol samting bilong ain na i pairap bikpela, em i kirapim ol.’ Em i tok, wanpela ben i wokim musik long hap bilong em na planti yangpela ol i bung, inap olsem 15,000, na musik i kirapim ol long singaut wantaim na kolim kolim nem bilong Seten, tasol ol i kolim narapela kain olsem ‘Netes.’
Na planti yangpela ol i laik bikhet na bihainim laik bilong ol yet. Ol i laik bihainim pasin bilong Seten. Wanpela manki i skul long hai-skul em i tok: ‘Mi ting Seten i save tru. Em i bosim sampela spirit na em i larim ol man i bihainim laik bilong ol yet. Tasol God i save putim ol tambu.’
Dispela laik, olsem man i laik bosim wokabaut bilong em yet na mekim ol samting em yet i laik mekim, dispela laik i kirapim namba wan man na meri long bikhet na sakim gutpela lo bilong God. Tupela i bikhet na dispela pasin bilong tupela i bagarapim yumi olgeta tumbuna pikinini bilong ol inap 6,000 yia pinis. (Jenesis 3:4, 5, 13) Seten i giamanim ol man long nau tu na pulim ol long mekim wankain pasin, long wanem em i save em i gat sotpela taim tasol. (Revelesen 12:12; 2 Korin 2:11) Ol manmeri i sakim ol samting Seten i mekim bilong pulim ol, bai ol inap “i stap gut tumas” olsem ol pikinini bilong God.—Rom 8:21.
Ol i Abrusim Tok i Tru
Taim Jisas i kot long ai bilong Pailat, Jisas i tokim em: “Mama bilong mi i karim mi na mi kam long graun bilong dispela tasol: Mi gat wok long autim tok tru. Olgeta man i bihainim tok tru, ol i save harim tok bilong mi.” Jisas i tingim tok i tru i bikpela samting na em i no laik abrusim liklik.—Jon 18:37.
Tasol ol man long nau ol i ting olsem wanem long tok i tru bilong lotu? Wanpela Katolik i raitim sampela tok long wanpela nius (The Times bilong London) na em i tok: ‘Sapos yu tok wanpela lotu i tru i olsem yu laik tok dispela lotu i “save” na ol narapela lotu ol i no save long tok i tru.’ Na em i tok, sapos wanpela man i mekim wanpela tok bilong lotu na dispela tok i gat as bilong en na i olsem wanpela tok i tru, i olsem tingting bilong ol narapela man long dispela samting i kranki, na ol i no ken amamas long dispela samting.
Tasol bilong wanem ol i no ken amamas? Bilong wanem ol i no laik save long tok i tru? Long wanem ol i laik bai olgeta lotu i mas bung wantaim na ol bikman bilong lotu ol i tok, olgeta lotu i gutpela. Ol i tok, olgeta man i ken bihainim wanem wanem tok i stret long em. Tasol olsem wanem long tok i tru? Jisas i tok: “Yupela bai i save long tok tru. Na tok tru em bai i mekim yupela i kamap fri.” Ol man i harim tok bilong Jisas ol i amamas, long wanem em i tokim ol long tok i tru na ol i no kalabus moa long ol tok giaman na bilip giaman bilong ol bikman bilong lotu bilong ol, em dispela kain tok na bilip i pasim ol long kisim laip i stap oltaim.—Jon 8:32; Matyu 23:13, 15.