Askim

Sapos Kristen i sik o em i raun long wanpela hap na em i no inap i go long Memorial, em i mas mekim Memorial long mun bihain o olsem wanem?

Ol Israel bilong bipo i bin wokim Pasova (kaikai bilong Tingim De Jehova I Bin Larim Ol I Stap Gut) long olgeta yia long namba 14 de bilong mun Nisan (o Abip), em namba wan mun. Tasol sapos ol i no inap, ol i ken mekim long narapela taim olsem Namba 9:​10, 11 i tok: “Sapos sampela . . . i kamap doti . . . [o] i raun long ol longwe ples . . . dispela lain i mas mekim dispela kaikai long de namba 14 bilong namba 2 mun, long apinun tru.”

Tasol ol Israel i no ken ting olsem ol i ken bihainim laik bilong ol wan wan yet long wanem de ol i laik wokim dispela Pasova, nogat. De stret bilong Pasova em Nisan 14, na dispela narapela de, olsem long mun Siv, em i bilong ol man “i kamap doti” long Nisan 14 o ol “i raun” na i stap longwe long ples ol i save bung na wokim Pasova long en.

Baibel i kolim wanpela taim tasol ol Israel i bin mekim dispela bung long namba 14 de bilong namba 2 mun, em long taim King Hesekia i kirapim gen Bikpela De Bilong Bret I No Gat Yis. Ol i mekim olsem, long wanem, ol pris i no bin redi long Nisan 14 na ol i no bin bungim ol manmeri.​—⁠2 Stori 29:17; 30:​1-5.

Tasol sapos i no gat wanpela bikpela samting i kamap bilong pasim ol, ol Juda i mas wokim Pasova long de stret olsem God yet i makim, olsem Nisan 14. (Kisim Bek 12:​17-20, 41, 42; Wok Pris 23:⁠5) Jisas na ol disaipel i bihainim stret dispela lo, na ol i no ting ol i ken senisim long laik bilong ol yet na mekim long narapela taim, nogat. Luk i tok: “Bikpela De Bilong Bret I No Gat Yis em i kamap. Long dispela de ol i mas kilim pikinini sipsip bilong kaikai bilong tingim De God I Larim Ol Israel I Stap Gut. Olsem na Jisas i salim Pita tupela Jon i go, na em i tokim tupela olsem, ‘Yutupela go redim kaikai . . . bilong dispela bikpela de.’ ”​—⁠Luk 22:​7, 8.

Long dispela de stret Jisas i kirapim Kaikai Bilong Bikpela, olsem Memorial. Em i bikpela samting long ol Kristen i mas i go long Memorial long olgeta yia. Jisas i tok: “Yupela i mas mekim olsem bilong tingim mi.” (Luk 22:19) Ol Witnes Bilong Jehova i no gat narapela bikpela de olsem Memorial. Em i nambawan bikpela de bilong ol. Olsem na olgeta wan wan Witnes i mas stretim ol samting bilong ol na bai ol i ken bung long Memorial long Tunde, Epril 6, 1993, bihain long taim san i go daun pinis.

Tasol sapos Kristen i gat bikpela sik, o em i mas i go long wanpela hap na em i stap longwe tru, olsem wanem long Memorial?

Long Memorial i gat bret i no gat yis, na retpela wain, na ol manmeri em God i bin makim ol long spirit holi na ol i bilong i go i stap long heven, olsem ol remnan, ol i save kisim dispela bret na wain. (Matyu 26:​26-29; Luk 22:​28-30) Sapos sik i pasim wanpela bilong dispela lain na em i no inap i kam long Memorial, o em i stap long haus sik, ol elda bai stretim rot bambai wanpela bilong ol i ken kisim bret na wain i go long em, na ol i ken kamapim sampela tok bilong Baibel, na ol i ken givim dispela bret na wain long em. Sapos wanpela Kristen bilong lain remnan i raun long narapela hap long taim bilong Memorial, em i mas i go long wanpela kongrigesen i stap klostu.

Olsem na i no planti taim bai wanpela remnan i mas mekim Memorial long mun bihain​—⁠sapos wanpela bikpela hevi samting i kamap, ating long dispela taim tasol em i ken mekim olsem Namba 9:​10, 11 i makim, na olsem 2 Stori 30:​1-3, 15 i stori long en.

Lain bilong ol “arapela sipsip” ol i gat tingting long i stap laip oltaim long paradais long graun, na ol i no bilong kisim bret na wain. (Jon 10:16) Tasol maski ol i no save kisim bret na wain, i bikpela samting long ol i mas i go long Memorial. Sapos ol i no inap, long wanem, ol i gat bikpela sik o ol i stap longwe tumas, orait, long taim bilong mekim Memorial ol i ken kaunim ol skripsa i toktok long Memorial na long Jisas i bin kirapim bung bilong Memorial, na ol i ken beten askim Jehova long mekim gut long ol Memorial ol Witnes i wokim long ol narapela hap long dispela taim. Olsem na i no gat wok long mekim bung o toktok bilong Memorial long mun bihain.