“Tok Bilong God i Gat Bikpela Strong!”
“TOK bilong God em i gat laip, na em i wok strong i stap.” (Hibru 4:12) Bilong kamapim klia bikpela strong i stap long Tok Bilong God, kalenda bilong ol Witnes Bilong Jehova bilong yia 2003 i kamapim 6-pela laip stori i kam long olgeta hap bilong graun. Aninit long het-tok “Before and After,” kalenda i stori long olsem wanem wok bilong ol Witnes Bilong Jehova long skulim ol man i helpim ol long stretim pasin bilong ol, lusim ol pasin i bagarapim ol, helpim famili bilong ol long pas gut wantaim, na kamapim pasin bilong pas gut wantaim God.
Mipela i bin kisim ol pas i kam long sampela em ol i bin pilim tru ol dispela stori long kalenda bilong 2003. Em hia sampela tok ol i mekim:
“Dispela kalenda i kamapim klia long ol Kristen tru olsem i gat ol narapela em ol tu i bin pait strong long holimpas bilip. Ol i ken lukim ol piksa bilong kirapim ol long tingim gen ol senis sampela i bin mekim.”—Steven, Amerika.
“Mi laik tru long raitim dispela sotpela tok bilong toksave olsem mi pilim tru ol stori i stap long kalenda bilong 2003. I no gat wanpela taim bipo mi bin pilim tru ol stori i stap long kalenda olsem long nau. Nau mi bai karim dispela kalenda long hanbek bilong autim tok na bai mi inap soim ol man long ol dispela stori i kamapim klia bikpela samting Baibel inap mekim long ol man.”—Marc, Beljam.
“Mi pilim tru ol dispela stori i stap long kalenda. Bel bilong mi i pas tru taim mi ritim ol dispela stori long olsem wanem Jehova i bin helpim ol dispela manmeri long senisim pasin bilong ol. Dispela i kirapim mi long wok yet long senisim sampela samting long i stap bilong mi. Nau mi pilim moa yet olsem mi insait long lain brata bilong olgeta hap.”—Mary, Amerika.
“Taim Jisas i lukim olsem ol man i stap rabis long ol samting bilong spirit, em i pilim tru dispela samting. Tenkyu long yupela i bihainim pasin bilong Krais na kamapim ol dispela laip stori long kalenda bilong 2003. I no gat wanpela taim bipo ol stori bilong wanpela kalenda i mekim na mi krai.”—Cassandra, Amerika.
“Taim mi gat 11 krismas, mi kirap long smok; bihain mi kisim drak. Planti taim mi tingting long kilim mi yet. Taim mi kisim save long Jehova, dispela i bin helpim mi long lusim ol dispela pasin. Dispela kalenda i bikpela samting tru long mi. Stori bilong ol brata na sista bilong mi long olgeta hap bilong graun i strongim mi. Nau mi save olsem i no mi tasol i mekim dispela pait, nogat, na bikpela samting tru em pasin bilong laikim Jehova na givim bel olgeta long mekim wok bilong em.”—Margaret, Polan.
“Man! Tok Bilong God i gat bikpela strong! Taim mi kisim dispela kalenda bilong 2003, mi strong long pasim aiwara. Ol dispela ekspiriens, na ol piksa tu, i strongim tru bilip.”—Darlene, Amerika.
“I stap bilong sampela bilong ol dispela lain long pastaim em i wankain long i stap bilong mi tu long bipo. Jehova i bin givim strong long mi na mi lusim ol pasin nogut em mi bin ting olsem i hatwok tumas long lusim. Tenkyu tru long ol dispela laip stori.”—William, Amerika.