Askim

Ol Kristen i mas i gat wanem tingting long ol ston i makim mun em mama i bin karim pikinini long en?

Long sampela kantri, ol dispela kain ston i bilong makim mun mama i bin karim pikinini long en. Em samting bilong wan wan Kristen long makim wanem kain ston em i laikim long ring bilong em. (Galesia 6:⁠5) Taim em i wokim tingting long dispela samting, i gat sampela bikpela samting em i mas tingim.

Buk Encyclopaedia Britannica i tok, “ol man i ting olsem taim man i putim ring samting i gat ston long en i makim mun mama i bin karim em, ol gutpela samting bai painim em na em i no inap kisim sik samting.” Dispela buk i tok moa: “Inap longtaim pinis ol man bilong lukluk long ol sta i tok sampela kain ston i gat bikpela strong tru.”

Long bipo, planti man i bilip olsem dispela kain ston inap mekim na gutpela samting bai painim man i werim dispela ston long nek o pinga samting. Olsem wanem? Trupela Kristen i save bilip long dispela samting? Nogat, long wanem, em i save olsem Jehova i no bin orait liklik long ol man em ol i bin lusim em na bilip long “god bilong mekim man i laki.”​—⁠Aisaia 65:​11, NW.

Bipo, inap olsem 1,000 yia i go pinis, ol man bilong tokaut long ol samting bai kamap bihain, ol i makim ol ston bilong makim ol wan wan mun bilong yia. Ol i kirapim ol man long werim ston i makim mun mama i bin karim ol long en, na ol i tok dispela bai lukautim ol na samting nogut i no ken painim ol. Tasol i no stret long ol Kristen i bihainim dispela tingting, long wanem, Baibel i tambuim pasin bilong tokaut long ol samting bai kamap bihain.​—⁠Lo 18:​9-12.

Na tu, sapos wanpela ring i gat kain ston olsem long en, orait i no stret long Kristen i tingim dispela i olsem bikpela samting, nogat. Ol Witnes Bilong Jehova i no save mekim ol pati bilong tingim ol betde. Dispela i olsem, long wanem, ol dispela kain pati i save mekim na ol man i tingim tumas wanpela man na ol betde Baibel i stori long en, ol i bilong ol bikman i no lotuim God.​—⁠Stat 40:20; Matyu 14:​6-10.

Sampela man i ting sapos man i putim ring i gat ston i makim mun mama i bin karim em, dispela bai mekim na pasin bilong em bai kamap gutpela. Tasol ol trupela Kristen i no bilip long dispela, long wanem, ol i save olsem holi spirit bilong God na ol stiatok bilong Baibel i save helpim man long “kamap nupela,” olsem kisim nupela pasin.​—⁠Efesus 4:​22-24.

Wanpela bikpela samting tru em as tingting bilong man. Taim wanpela Kristen i laik wokim tingting olsem em bai putim ring i gat dispela kain ston long en o nogat, em i ken askim em yet olsem, ‘Mi laik putim dispela ring, long wanem, mi laikim ston i stap long en, maski em ston i makim mun mama i bin karim mi long en? O mi larim ol bilip nating bilong sampela man long ol dispela kain ston i stiaim mi?’

Kristen i mas skelim gut bel bilong em bilong save long as tingting bilong em. Baibel i tok: “Gutpela tingting bilong stiaim laip bilong yu, em i save kamap long tingting bilong yu, olsem wara i save kamap long hul wara. Olsem na olgeta taim yu mas was gut tru long tingting bilong yu.” (Sindaun 4:23) Taim em i laik makim samting em bai mekim long ston i makim mun mama i bin karim pikinini long en, ol Kristen wan wan i mas skelim gut as tingting bilong em na ol samting pasin bilong em inap mekim long em yet na long ol narapela.​—⁠Rom 14:13.