Em i Stret Sapos Kristen i Pilai Laki?
EM I STRET sapos wanpela Kristen i pilai laki bilong kisim nating wanpela samting? Nogat. Baibel i tok, Kristen i mas mekim wok bilong lukautim em yet na famili bilong em. Baibel i tok: “Sapos man i no laik mekim wok, orait em i no ken kisim kaikai. . . . Ol i mas sindaun gut, na ol i mas mekim wok, bai ol i ken lukautim ol yet long kaikai samting.”—2 Tesalonaika 3:10, 12.
Wanpela man i skelim ol hevi bilong man i pilai laki em i tok, ‘sampela man i kamap maniman long rot bilong winmoni ol i kisim long mani ol rabisman i tromoi long pilai laki.’ Olsem wanem? Wanpela Kristen i laik kamap maniman long rot i save pulim mani bilong narapela man, em mani em i bin kisim long hatwok bilong em? Nogat, a! Ol Kristen i mas ‘laikim ol narapela olsem ol i laikim ol yet.’ (Mak 12:31) Tasol pilai laki em i rot bilong man i tingim skin bilong em yet, em i no tingim narapela.
Planti taim pasin mangal i as bilong pilai laki. Dispela pasin i no pasin bilong trupela lotu. Long Rom 7:7 Pol i bin tok: “Yu no ken mangalim ol samting bilong narapela man.” Dispela tok “mangal” i olsem ‘laik tru long kisim.’ Dispela i kamapim tru tingting bilong man i pilai laki, em i tingting long kisim mani bilong narapela. Dispela kain tingting i no stret long pasin Kristen long givim samting long narapela.
Baibel i tok: “Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, . . . ol i karim bikpela hevi moa.” (1 Timoti 6:10) Dispela i kamapim klia samting i painim man i kalabus long pilai laki—oltaim em i karim hevi long dispela samting.
Jisas i tok yumi ken save long ol man long “pasin bilong ol.” (Matyu 7:20) Ol man i kalabus long pilai laki i karim hevi, na famili bilong ol tu i karim hevi, na tu, sampela taim man i mekim samting i no stret olsem stil o pasin raskol bambai em i ken painim mani bilong pilai laki. Wanpela buk (The New Encyclopædia Britannica) i tok: ‘Pilai laki em samting nogut long ai bilong sampela man, long wanem, ol man i bosim dispela samting ol i gat pasin giaman.’ Pasin raskol i bin insait long sampela pilai laki, maski gavman i orait long dispela pilai laki o nogat. Olsem na yu ting i stret sapos wanpela Kristen i insait long pilai laki i save helpim pasin raskol?
Bipo long namba tu stori mipela bin stori olsem, planti man i save tingim sampela bilip kranki na ol i pilai laki. Olsem na ol i tingim wanpela namba o wanpela de i gat strong na dispela i mekim na ol inap win. Bipo ol Rom i gat wanpela god meri ol i kolim em Fortuna. Ol man bilong pilai laki ol i ting dispela meri inap helpim ol long win. Na insait long planti handet yia ol man i save pilai laki ol i singautim dispela meri long helpim ol. Long biktaun Rom ol i wokim 26 haus lotu bilong litimapim nem bilong dispela god meri.
Profet Aisaia i stori long wanpela god i wankain long dispela god bilong ol Rom, nem bilong en gadh. Na sampela ol Israel i bin lusim trupela lotu na ol i lotuim dispela god. Aisaia i tok: “Yupela ol lain i save givim baksait long mi [Jehova], . . . Yupela i save lotuim Gat (Hibru, gadh) . . . ol giaman god yupela i ting ol i save mekim yupela i win na yupela i gat gutpela taim.”—Aisaia 65:11.
God i no amamas long ol man i givim bel long gadh, o god bilong mekim man i win o helpim ol long stretim ol hevi bilong ol, nogat. Taim ol i tingim samting bilong laki i olsem ol i givim baksait long trupela God, em Jehova. Ol Kristen i mas bilip na givim bel long God Jehova, em Man i tok promis long givim ol gutpela samting long yumi i moa win long mani kago samting. Tru tumas, em Man bilong truim ol tok promis bilong em.