Ripot Long Wok Bilong Kingdom
Pas i Kam Long Alejandra
LONG bipo yet pasin bilong raitim pas i stap olsem wanpela gutpela rot bilong autim tok. Maski sampela ol i no save i gat gutpela samting bai kamap o nogat, ol man em ol i save strong long autim tok long rot bilong pas i bin kisim planti blesing. Ol i tingim gutpela tok bilong Baibel: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut, o tupela lain wantaim bai i kamap gut.”—Saveman 11:6.
Alejandra, em wanpela yangpela Witnes i bin wok long brens ofis bilong ol Witnes Bilong Jehova long Meksiko inap tenpela yia samting, em i bin wok long go kisim kimoterapi long sik kensa. Sik bilong em i go bikpela moa, na em i no gat strong moa bilong mekim ol wok em save mekim long olgeta de. Tasol Alejandra i no laik lusim wok autim tok bilong em, olsem na em i tingting long raitim ol pas. Em i raitim pas i toksave long pasin bilong mekim Baibel stadi i no gat pe na long pas em i putim tu telefon namba bilong mama bilong em. Taim mama i go long autim tok, em i givim ol pas long em bilong putim long ol haus i no gat man.
Long dispela taim, Diojany, wanpela yangpela meri bilong Guatemala i go long Cancún, Meksiko, bilong mekim wok olsem hausmeri. Taim em i stap long hap, em i bungim ol Witnes Bilong Jehova na em i save amamas long ol i toktok wantaim em long Baibel. Bihain, bosman na bosmeri i tingting long go sindaun long Meksiko Siti na ol i laik bai em i go wantaim ol. Diojany i gat tupela tingting long go, long wanem, sapos em i go em bai no inap toktok moa wantaim ol Witnes.
Bosmeri bilong em i tok: “No ken wari, i gat ol Witnes long olgeta hap. Taim yumi kamap long hap, kwiktaim bai yumi painim ol.” Diojany i amamas long em bai bungim gen ol Witness, na em i orait long go wantaim ol. Taim ol i kamap pinis long Meksiko Siti, bosmeri bilong Diojany i wok long painim ol Witnes. Tasol ol i no painim ol, maski i winim 41,000 Witnes na 730 kongrigesen long dispela taun.
I no longtaim na Diojany i bel hevi, long wanem, em i no inap painim ol Witnes na bai ol i toktok wantaim gen long Baibel. Wanpela de, bosmeri i kam long em na mekim em i kirap nogut, em tok: “God bilong yu i bin harim ol beten bilong yu.” Em i givim pas long Diojany na tok: “Ol Witnes i lusim dispela pas bilong yu.” Em pas i kam long Alejandra.
Diojany i toktok wantaim mama bilong Alejandra na susa bilong em, Blanca, na em i orait long stadi long Baibel. Sampela wik bihain, em i bungim Alejandra na amamas long lukim em. Alejandra i strongim em long bihainim ol tok em i lainim na bai em inap kamap strong.
Sampela mun bihain, long Julai 2003, Alejandra i dai. Em i stap gutpela piksa bilong ol wanbilip bilong em, long pasin bilong bilip na strongpela bel. Long bung bilong planim em, ol i bungim Diojany na planti i pilim tru dispela tok em i mekim, olsem: “Alejandra na famili bilong em i bin i stap gutpela piksa bilong mi. Mi bai wok strong long lotuim Jehova na kisim baptais hariap. Mi gat bikpela laik tru long lukim gen Alejandra long Paradais bai kamap bihain!”
Tru tumas, pas em i wanpela liklik samting. Tasol ol gutpela tok long en na ol samting em mekim long man i save stap longpela taim!