Ripot long Wok Bilong Kingdom
‘Spirit i Kirapim Ol Long Mekim Wok’ Long Meksiko
“LONG olgeta hap bilong dispela kantri, spirit bilong God i kirapim tru ol brata na ol i wok strong moa yet.” Em, brens-ofis bilong Sosaiti Was Taua long Meksiko i raitim ripot olsem. Na tru tumas, ol brata long dispela kantri ol i wok strong moa yet! Olsem na insait long 70 mun i kam inap long Ogas 1989, long olgeta dispela mun lain bilong autim tok i go bikpela. Long Ogas i gat 277,436 pablisa na ol i mekim planti Baibel-stadi, winim 400,000, na inap olsem 1,046,291 i bin bung long taim bilong Memorial long 1989. Long dispela as yumi ken save, bihain bai lain bilong ol i go bikpela moa!
Wanpela gutpela samting tru i bin painim ol Witnes Bilong Jehova long Meksiko long 1989, em olsem: Gavman i orait long wok bilong ol. Nau ol inap mekim wok long Baibel taim ol i go long haus bilong ol man na autim tok, na ol inap mekim beten bilong kirapim ol miting bilong ol. Ol i kirap mekim ol dispela samting na kwiktaim, insait long tupela mun tasol, 17,000 nupela pablisa i kamap.
Ol brata i amamas tru long dispela senis i kamap na sampela i raitim pas long brens-ofis na tok olsem. Wanpela i tok: “Taim brata i kaunim pas long kongrigesen i tokaut long dispela senis, tupela taim ol brata i kirap paitim han na katim tok em i kaunim. Mipela i amamas tru!” Na narapela i tok: “Taim mipela i harim, aiwara i kam daun—mipela i no inap pasim—mipela i amamas moa yet. Nau ol brata i no save kam bihaintaim long ol miting—olgeta i laik harim beten bilong kirapim miting.”
Narapela Witnes i tok: “Long hap mipela i autim tok long en, wanpela meri i insait tru long wanpela wok bilong Misin Katolik bilong helpim ol man long kisim save long Baibel, na dispela meri i tok: ‘Bipo ol Witnes i raun na autim tok na tilim nius bilong ol na mipela i no inap bekim wanpela tok long ol, tasol nau, taim ol i kam long haus ol i opim Baibel na toktok wantaim yumi, na yumi lus tru!” ’
Ol Witnes Bilong Jehova i save wok strong long mekim wok long Baibel taim ol i autim tok long kain kain taim na ples tu. Wanpela sista Witnes i toktok wantaim wanpela meri na dispela meri i askim sista: ‘Yu ting olsem wanem long pasin bilong rausim bel?’ Sista i bekim tok olsem: “Tingting bilong mi i no bikpela samting. Yumi mas save, Baibel i tok wanem long dispela samting.” Em i kaunim sampela tok bilong Baibel long dispela meri, na em i tok: “Long ai bilong God laip em i bikpela samting, na laip bilong pikinini tu, maski pikinini i stap yet long bel bilong mama.”
Nau dispela meri i tokim sista, em i gat bel long namba wan pikinini, tasol ol dokta i bin glasim pikinini na ol i tok, pikinini i gat sik na em bai kamap nogut. Dokta i laik bai meri i rausim bel, na man bilong dispela meri i orait long dispela samting. Tasol meri yet i gat tupela tingting. Sista i givim sampela tok moa bilong Baibel long em, na em i tokim dispela meri long nem bilong em. Tupela i toktok pinis na nau sista i go.
Inap olsem 5-pela yia bihain, long wanpela kibung distrik, wanpela man na meri bilong em wantaim pikinini bilong tupela, em i gat 4-pela krismas, ol i wok long painim dispela sista wantaim man bilong em. Em dispela meri sista i bin toktok wantaim em! Taim tupela i toktok bipo, meri i tingting pinis olsem em i no ken rausim bel. Em i go tokim dokta i save lukautim em, na dokta i kros na i tok, meri i no ken i kam lukim em moa. Na man bilong dispela meri i tok, sapos pikinini i kamap nogut, bai em i katim marit na lusim meri. Orait, taim bilong karim pikinini i kamap pinis na meri i go painim wanpela dokta bilong helpim em.
Em i karim pinis pikinini na long dispela taim stret dokta i tok: “Gutpela tru mama! Yu karim gutpela liklik pikinini meri.” Meri i no bilipim tok bilong dokta na em i tokim dokta long glasim gut skin bilong Pikinini. Na bihain em i stori long dokta long ol samting i bin painim em. Dokta i tok: “I olsem wanpela mirakel i kamap.” Meri i amamas tru long em i no bin pret long bihainim lo bilong Jehova i tok, laip em i samting holi, na em i putim nem bilong dispela sista long dispela gutpela pikinini. Taim meri i kisim bek strong, em i go painim ol Witnes na ol i kirap long stadi wantaim em na lainim em long ol tok bilong Baibel. Wanpela yia i go pinis na em wantaim man bilong em i kisim baptais.
Aposel Pol i tok: “yupela i mas wok strong oltaim na larim Holi Spirit i kirapim yupela long mekim wok bilong Bikpela.” (Rom 12:11) Ol Witnes Bilong Jehova long Meksiko i save givim bel olgeta long bihainim dispela tok, wankain olsem ol Kristen tru long ol narapela kantri tu i save mekim. Olsem na long olgeta hap bilong Meksiko, spirit bilong God i kirapim tru ol brata na ol i wok strong moa yet long mekim wok bilong God. Jehova i save givim planti blesing long ol manmeri i stap gut long em!