Ripot Long Wok Bilong Kingdom
‘Tok Bilong God i Wok Long Kamap Bikpela’
TAIM kongrigesen Kristen i kamap nupela inap 120 manmeri i insait long en, na insait long sampela aua dispela namba i go bikpela inap 3,000. (Ap 1:15; 2:41) Baibel i kamapim klia olsem “tok bilong God i go nabaut long olgeta hap. Na planti manmeri moa i kamap disaipel long Jerusalem.” (Ap 6:7) Bihain tasol long sampela yia, dispela nupela kongrigesen i kamap wanpela bikpela oganaisesen i gat ol Kristen long Afrika, Esia, na Yurop.
Wankain long kongrigesen Kristen long nau tu. Long Meksiko insait long 5-pela yia tasol namba bilong ol man i save autim tok bilong Kingdom i bin go bikpela winim 130,000 na nau ol i gat 443,640 pablisa! Long 1995, wanpela insait long olgeta 59 manmeri long Meksiko i bin kam bung wantaim ol Witnes Bilong Jehova long Memorial bilong tingim i dai bilong Jisas. Tasol wok bilong bungim ol man i olsem kaikai i mau pinis long dispela kantri i no pinis yet, olsem dispela ekspiriens long ol paragraf daunbilo i kamapim.—Matyu 9:37, 38.
Long wanpela taun long Provins Siapas, no gat wanpela man i bin orait long mekim Baibel-stadi wantaim ol Witnes Bilong Jehova, maski ol Witnes i bin autim tok long dispela hap inap 20 yia pinis. Dispela samting i kamap, long wanem, wanpela man long dispela taun em i save mekim nogut long man na ol man i pret long em. Ol i pret nogut em i mekim nogut long ol sapos em i save olsem ol i stadi long Baibel wantaim ol Witnes Bilong Jehova.
Tasol, taim tupela strongpela Witnes i go sindaun long dispela hap tupela i go stret long haus bilong dispela man long stretim dispela hevi. Taim tupela i kamap long haus bilong em, meri bilong em i opim dua na i harim gut ol tok tupela i autim. Meri i laik tru long save, Baibel i tok wanem long stap laip oltaim long Paradais long graun. Tasol em i tok, man bilong em bai givim bikpela hevi long em sapos em i stadi long Baibel. Tupela Witnes i stori gut long em olsem, sapos em i no skelim gut tok bilong Baibel, em i no inap lainim ol samting em i mas mekim bilong lotuim God na stap laip oltaim long graun. Olsem na meri i orait long stadi long Baibel.
Samting i kamap olsem meri i tingim pinis, man bilong em i no amamas long dispela samting. Man i tambuim em long mekim wok long ka taim em i laik go long ol miting Kristen, tasol em i orait long meri long mekim wok long en taim em i laik mekim ol narapela samting. Maski man i birua long em, olgeta taim em i save wokabaut i go long wanpela Haus Kingdom bilong ol Witnes Bilong Jehova i stap longwe inap 10 kilomita. I no longtaim na ol narapela long taun i luksave long pasin bilong em long sanap strong na strongim bel long mekim dispela samting. Nau ol manmeri i kirap long harim tok taim ol Witnes i kam long haus bilong ol. Sampela i kirap long go wantaim dispela meri long ol miting tu. Liklik taim bihain, ol Witnes i mekim samting olsem 20 Baibel-stadi long dispela taun!
Wanpela pren bilong dispela meri i kirap tu long stadi long Baibel, maski man bilong em i no laik em i mekim olsem. Na yumi kirap nogut, long wanem, man bilong namba wan meri i bin kirapim em long mekim olsem. Bihain taim man bilong dispela meri i toktok pinis wantaim man bilong pren bilong em, pasin birua bilong em i pinis. Inap 20 yia ol brata i bin planim pikinini kaikai bilong tok i tru bilong Baibel, na nau winim 15 manmeri i stadi long Baibel na ol i kam long ol miting Kristen, na dispela tupela meri tu, nau ol i save autim gutnius.