Pasin Bilong Kisim Planti Samting Moa

“Sapos olgeta taim yumi laik kisim planti samting moa, orait i no gat wanpela taim na bai ol samting i inapim yumi.”​​—⁠Ripot bilong Worldwatch Institute.

“WANEM samting yumi laik kisim? Olgeta samting. Wanem taim yumi laik kisim? Nau tasol.” Em wanpela tok planti sumatin bilong yunivesiti namel long 1960 na 1969 i bin mekim. Ating long nau yumi no harim dispela tok, tasol astingting bilong en i stap yet. Pasin bilong kisim planti samting moa i olsem wanpela mak bilong taim bilong yumi.

Long planti manmeri, pasin bilong kisim planti mani samting i bin kamap namba wan samting long ol. Jimmy Carter, bipo em presiden bilong Amerika, i bin tok: “Ol man i no tingim moa narapela long samting em i mekim, nogat; ol i tingim em long mani samting tasol bilong em.” Olsem wanem? I gat samting i winim mani kago? Sapos olsem, orait em wanem samting, na em inap helpim yumi olsem wanem?