Lukaut Gut “Nogut Yupela i Mangal”
“Maski yu yet yu gat planti samting moa, tasol yu no inap kisim laip long ol dispela samting bilong yu.”—LUK 12:15.
1, 2. (a) Yu yet i bin lukim olsem planti manmeri long nau i save tingting tasol long wanem samting? (b) Kain tingting olsem inap mekim wanem long yumi?
MANI, haus, namba, famili, wok mani i gat bikpela pe—em sampela samting planti man i ting i makim olsem man i gat gutpela sindaun na inap lukautim man long bihain. Long ol kantri i gat planti mani na long ol kantri i stap rabis tu, planti manmeri i save tingting tasol long kisim gutpela sindaun na planti samting bilong skin. Ol i no tingim tumas ol samting bilong lotu.
2 Dispela i olsem Baibel i bin tok profet: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. . . . Ol bai i laikim tumas ol kain kain pasin bilong amamas bilong dispela graun, na ol bai i no laikim God. Ol bai i bihainim pasin bilong God long skin tasol na ol bai i no save liklik long bikpela strong i stap long pasin tru bilong God.” (2 Timoti 3:1-5) Ol dispela kain man i strong long ol trupela Kristen i mas bihainim pasin na tingting bilong ol. Olsem na wanem samting inap helpim yumi na bai yumi no larim ol man bilong dispela graun i subim yumi long “wokabaut wankain olsem ol”?—Rom 12:2.
3. Nau bai yumi stori long wanem tok bilong Jisas?
3 Jisas Krais, em “as bilong bilip bilong yumi,” na em i kamapim sampela gutpela tok i givim skul long yumi long dispela samting. (Hibru 12:2) Wanpela taim Jisas i toktok wantaim planti manmeri long sampela bikpela tok bilong lotu, na wanpela man i katim tok na tokim Jisas olsem: “Tisa, papa bilong mi i dai pinis, na mi laik bai yu tokim brata bilong mi long em i mas tilim ol samting papa i lusim, na givim hap long mi.” Jisas i givim sampela strongpela tok long dispela man wantaim ol narapela i bin kam bung bilong harim tok. Em i mekim strongpela tok lukaut long pasin bilong mangal, na bilong strongim dispela tok lukaut, em i kamapim wanpela tok piksa. I gutpela sapos yumi tingim gut dispela tok bilong Jisas na save long olsem wanem yumi yet inap bihainim.—Luk 12:13-21.
Wanpela Askim i No Stret Long Mekim
4. Bilong wanem i no stret long dispela man i katim tok bilong Jisas?
4 Taim dispela man i no katim yet tok bilong Jisas, Jisas i toktok wantaim ol disaipel na ol narapela long ol i mas klia long giaman pasin, na ol i no ken sem long tokim ol man olsem ol i bilong lain bilong Pikinini Bilong Man, na ol i mas kisim helpim long holi spirit. (Luk 12:1-12) Em ol bikpela tok tru ol disaipel i mas tingim gut na bihainim. Tasol taim Jisas i wok long toktok, dispela man i katim tok na askim Jisas long stretim wanpela kros, em wanpela kros i bin kamap insait long famili bilong em long ol samting bilong mani. Dispela samting i bin kamap inap skulim yumi long wanpela bikpela samting.
5. Samting dispela man i askim Jisas long en i kamapim wanem samting bilong dispela man?
5 Wanpela buk i tok: “Samting man i tingting long en taim em i harim tok bilong lotu, dispela i save kamapim pasin bilong em, olsem em i wanem kain man.” Taim Jisas i stori long ol bikpela samting bilong lotu, ating dispela man i tingting long samting em inap mekim bilong kisim sampela mani moa. Baibel i no tokaut olsem i gat as tru bilong dispela samting em i gat tok long en o nogat. Ating dispela man i laik mekim wok long namba na nem em Jisas i holim olsem man bilong skelim gut ol samting. (Aisaia 11:3, 4; Matyu 22:16) Tasol maski i gat wanem as na em i askim Jisas long stretim kros, askim bilong em i kamapim klia olsem em i no pilim tru ol tok bilong lotu. Em nau, i gat as na yumi mas skelim yumi yet, laka? Long ol miting Kristen em i isi long larim tingting bilong yumi i wokabaut o yumi tingting long samting em bihain yumi laik mekim. Tasol yumi no ken mekim olsem, nogat, yumi mas putim gut yau na tingim olsem wanem yumi ken bihainim ol tok yumi harim na bai pasin bilong yumi long pas gut wantaim Papa bilong yumi long heven, God Jehova, na ol wanlain Kristen, i ken kamap strong moa.—Song 22:22; Mak 4:24.
6. Bilong wanem Jisas i no laik insait long dispela wok em man i askim em long mekim?
6 Maski wanem samting i kirapim man long mekim dispela askim, em samting Jisas i no laik insait long en. Jisas i askim em: “Husat i makim mi long kamap jas bilong yutupela, na mi mas tilim ol samting bilong yutupela?” (Luk 12:14) Taim Jisas i mekim dispela tok, em i toktok long samting ol manmeri i save pinis long en. Olsem Lo Bilong Moses i tok, long ol wan wan taun i gat ol jas ol i bin makim bilong stretim kain hevi olsem. (Lo 16:18-20; 21:15-17; Rut 4:1, 2) Jisas i laik insait long ol samting i bikpela samting tru—em wok bilong autim tok tru bilong Kingdom na lainim ol man long laik bilong God. (Jon 18:37) Yumi save bihainim pasin bilong Jisas na yumi no larim samting long sindaun bilong yumi i pulim yumi—yumi save yusim taim na strong bilong yumi long autim gutnius na “mekim olgeta lain manmeri i kamap disaipel.”—Matyu 24:14; 28:19.
Lukaut Long Pasin Mangal
7. Jisas i save long wanem samting bilong dispela man?
7 Jisas inap save long olgeta laik bilong bel, olsem na em i save i gat narapela samting i kirapim man long mekim askim. Jisas i kamapim dispela samting na i tok: “Yupela lukaut na was gut. Nogut yupela i mangal long kisim ol kain kain samting. Maski yu yet yu gat planti samting moa, tasol yu no inap kisim laip long ol dispela samting bilong yu.”—Luk 12:15.
8. Pasin mangal em wanem samting? Pasin mangal inap kamap wankain olsem wanem pasin?
8 Pasin mangal em pasin we man i gat strongpela laik long kisim planti mani kago o ol samting bilong narapela man. Em i laikim tumas long kisim planti samting moa—ol samting bilong narapela man tu—maski em i no gat wok long ol dispela samting. Em i laik kisim tasol, em i no tingim samting dispela inap mekim long ol narapela. Man bilong mangal i larim samting em i gat laik long en i bosim strong tingting na pasin bilong em na nau samting em i mangal long en inap kamap olsem god bilong em. Aposel Pol i tok olsem pasin mangal em wankain long pasin bilong lotuim ol giaman god, na man bilong mangal i no inap go insait long Kingdom Bilong God.—Efesus 5:5; Kolosi 3:5.
9. Man inap mangal long wanem kain samting? Stori long sampela i bin mekim olsem.
9 Jisas i tok i gat “ol kain kain samting” man inap mangal long en. Laspela lo bilong Tenpela Lo i kolim sampela: “Yupela i no ken mangalim haus bilong narapela man. Na yupela i no ken aigris long meri bilong narapela man. Na yupela i no ken mangalim wokboi o wokmeri bilong en o bulmakau o donki o olgeta arapela samting bilong en tu.” (Kisim Bek 20:17) Baibel i stori long planti manmeri em pasin mangal i bin kirapim ol long mekim bikpela sin. Satan em namba wan man bilong mangalim samting bilong narapela—em i mangalim glori, biknem, na namba, em ol i bilong Jehova tasol. (KTH 4:11) Iv i mangal long kisim namba bilong bosim em yet—em i bilipim tok giaman bilong Satan long dispela samting, na long dispela pasin sin na dai i painim olgeta manmeri. (Stat 3:4-7) Ol spirit nogut em ol ensel i no bin “stap gut long dispela wok God i bin givim ol, na ol i lusim ples bilong ol” na bai ol i ken kisim samting i no stret ol i kisim. (Jut 6; Stat 6:2) Tingim tu Balam, Akan, Gehasi, na Judas. Ol i no amamas long i stap bilong ol. Ol i larim strongpela laik long kisim ol gutpela samting bilong skin i pulim ol long mekim wok nogut long namba ol i holim, na long dispela pasin ol i kisim bagarap.
10. Olsem wanem yumi ken bihainim tok bilong Jisas na “was gut”?
10 Olsem na paslain long Jisas i mekim tok lukaut long pasin mangal, i stret em i tok, “was gut”! Bilong wanem yumi mas was gut? Long wanem, i no hatwok long ol man i lukluk long narapela na save em i mangal long samting, tasol i hatwok long ol yet i tokaut olsem ol i gat dispela pasin. Aposel Pol i tok, “pasin bilong laikim tumas mani em i as bilong olgeta pasin nogut.” (1 Timoti 6:9, 10) Disaipel Jems i tok, pasin bilong bel i kirap “i save kamapim sin.” (Jems 1:15) Olsem na bilong bihainim tok bilong Jisas na “was gut,” yumi no ken lukluk long ol narapela bilong skelim olsem ol i mangal o nogat. Yumi mas skelim yumi yet na bai yumi inap save long samting yumi gat strongpela laik long en na bai yumi yet i no ken mangal.
Man i Gat Planti Samting
11, 12. (a) Jisas i givim wanem tok lukaut long pasin mangal? (b) Bilong wanem yumi mas tingim na bihainim dispela tok lukaut bilong Jisas?
11 I gat narapela as na yumi mas lukaut long pasin mangal. Jisas i tok: “Maski yu yet yu gat planti samting moa, tasol yu no inap kisim laip long ol dispela samting bilong yu.” (Luk 12:15) Em samting bilong tingim, long wanem, yumi stap long wanpela taim we ol man i save tingting tumas long ol samting bilong skin. Planti man i save ting olsem bilong ol i ken stap gut na amamas, ol i mas i gat planti mani kago. Tasol Jisas i laik tok olsem, bilong i stap bilong yumi i gat as tru bilong en na yumi ken i stap belgut, i no olsem yumi mas i gat planti samting, nogat.
12 Tasol ating sampela i no wanbel long dispela tok. Ol i save ting olsem sapos ol i gat planti samting bilong skin, dispela bai helpim i stap bilong ol long kamap gutpela moa, na long dispela rot, laip bilong ol i gat as tru bilong en. Olsem na ol i save givim bel long kisim olgeta samting bilong skin ol i gat laik long kisim, na ol kain kain liklik masin tu. Ol i ting dispela bai helpim i stap bilong ol long kamap gutpela tru. Tasol kain tingting olsem i pasim tingting bilong ol long kliagut long bikpela poin Jisas i laik mekim.
13. Yumi mas i gat wanem stretpela tingting long laip na mani kago samting?
13 Jisas i no stori olsem i stret o i no stret long man i gat planti mani kago samting, nogat. Bikpela poin Jisas i mekim i olsem: Man i no inap kisim laip long “ol dispela samting bilong [em],” olsem ol samting em i holim pinis. Yumi olgeta i save olsem bilong i stap laip, i no olsem yumi mas i gat planti samting. Yumi mas i gat kaikai, klos, ples slip, na em tasol. Tru, ol maniman i gat planti samting olsem, na ol man i stap rabis ol i mas wok strong long kisim ol samting ol i mas i gat. Tasol maski man i maniman o rabisman, tupela i wankain tasol taim laip bilong ol i pinis—olgeta samting bilong ol i pinis olgeta. (Saveman 9:5, 6) Olsem na bilong laip bilong man i gat as tru bilong en, em i no ken holim o wok long kisim ol samting bilong skin tasol, nogat. Yumi inap kliagut long dispela samting taim yumi skelim wanem kain laip Jisas i toktok long en.
14. Yumi ken kisim wanem save long dispela tok “laip” long Gutnius Luk i Raitim?
14 Taim Jisas i tok “yu no inap kisim laip long ol dispela samting bilong yu,” tok ol i tanim olsem “laip” long dispela hap bilong Buk Luk (tok Grik, zo·eʹ) i no makim i stap o sindaun bilong man, nogat; em i makim laip yet bilong man.a Jisas i laik tok olsem maski yumi maniman o rabisman, o yumi gat planti samting bilong skin o liklik samting tasol, yumi no inap bosim hamas yia yumi bai stap laip o yumi bai stap laip long tumora o nogat. Long Bikpela Tok Long Maunten, Jisas i tok: “Sapos wanpela bilong yupela i wok long tingting planti long rot bilong i stap gut, ating dispela pasin bilong tingting planti bai i skruim liklik hap taim moa long laip bilong en? I no inap tru.” (Matyu 6:27) Baibel i tok klia olsem Jehova tasol em i “as tru bilong laip,” na em wanpela tasol inap givim “laip em i laip tru,” o “laip i stap gut oltaim oltaim”—long heven o long graun—long ol man i stap gut long em.—Song 36:9; 1 Timoti 6:12, 19.
15. I gat wanem as na planti man i givim bel long mani kago samting?
15 Tok bilong Jisas i soim olsem i no hatwok long man i kisim tingting kranki long laip bilong em. Maski man i maniman o rabisman, i gat wankain samting i save painim olgeta manmeri. Moses i tok: “Mipela i save stap inap 70 yia tasol. Na sapos mipela i gat strong, mipela i ken i stap inap 80 yia. Tasol long dispela olgeta yia mipela i stap, mipela i save hatwok na painim hevi tasol. Dispela olgeta yia i pinis kwiktaim, na mipela tu i go pinis.” (Song 90:10; Jop 14:1, 2; 1 Pita 1:24) Olsem na planti man i no pas gut wantaim God ol i bihainim tingting aposel Pol i stori long en olsem: “Mobeta ‘yumi kaikai na dring, long wanem, tumora bai yumi dai.’ ” (1 Korin 15:32) Planti narapela man, taim ol i tingim olsem ol i bilong i stap sotpela taim tasol, ol i wok strong long kisim ol samting bilong skin. Ating ol i pilim olsem sapos ol i gat planti samting bilong skin, dispela bai lukautim gut laip bilong ol. Olsem na ol i wok long bungim planti mani kago samting, ol i ting as bilong stap gut na amamas, em ol dispela samting bilong skin, tasol ol i popaia stret.—Song 49:6, 11, 12.
Gutpela Sindaun Long Bihain
16. Wanem samting i no inap mekim na laip i gat as tru bilong en?
16 Tru, sapos man i gat planti kaikai na klos, gutpela haus na planti ol arapela samting bilong skin, dispela inap helpim sindaun bilong em na em inap baim gutpela dokta na long dispela rot em i skruim sampela yia moa long laip bilong em. Tasol yu ting kain samting olsem inap mekim i stap bilong yu i gat as tru bilong en na yu stap isi tru? Bikpela samting tru long laip bilong yumi i no hamas yia yumi stap o yumi gat planti mani kago samting o nogat. Aposel Pol i tok yumi no ken bilip tumas long kain samting olsem. Em i tokim Timoti: “Tokim ol man i gat planti mani samting bilong dispela graun long ol i no ken bikhet na litimapim nem bilong ol yet. Ol i no ken bilip long ol dispela kain samting i save bagarap kwik. Nogat. Ol i mas bilip tru long God, em God i save givim yumi planti gutpela samting bilong mekim yumi amamas.”—1 Timoti 6:17.
17, 18. (a) Tingting bilong husat long ol mani kago samting i gutpela long yumi bihainim? (b) Long stadi i kamap bihain long dispela, bai yumi skelim wanem tok piksa bilong Jisas?
17 Yumi no ken bilip long planti mani samting, long wanem, ol dispela samting “i save bagarap kwik.” Gutpela man Jop i gat planti mani kago samting, tasol taim hevi i kamap wantu, ol dispela samting i no inap helpim em, ol i pinis wantu tasol. Samting i lukautim em taim ol hevi i kamap, em pasin bilong em long pas gut wantaim God. (Jop 1:1, 3, 20-22) Abraham i no larim planti mani kago samting bilong em i pasim em long kisim wanpela bikpela wok Jehova i givim em long mekim, na Jehova i mekim gut long em na em i kamap “tumbuna bilong planti lain manmeri.” (Stat 12:1, 4; 17:4-6) Pasin bilong dispela tupela man, na sampela man moa, i gutpela long yumi bihainim. Maski yumi yangpela o lapun, yumi mas skelim yumi yet na bai yumi inap save, wanem samting i bikpela samting tru long yumi na yumi bilip tru long wanem samting.—Efesus 5:10; Filipai 1:10.
18 Sotpela tok Jisas i mekim long pasin mangal na long stretpela tingting long laip, em i bikpela tok tru na yumi inap kisim gutpela skul long en. Tasol i gat sampela skul moa Jisas i laik givim, na em i kamapim wanpela gutpela tok piksa i stori long wanpela maniman i no gat gutpela tingting. Olsem wanem dispela tok piksa i stret long yumi long nau? Na yumi inap kisim wanem skul long en? Stadi i kamap bihain long dispela bai bekim ol dispela askim.
[Futnot]
a Narapela tok Grik ol i tanim olsem “laip” em biʹ·os. Wanpela buk (Vine’s Expository Dictionary of Old and New Testament Words) i tok biʹ·os i makim “ol yia bilong laip,” “sindaun bilong man na i stap bilong em,” na “ol samting man i mas i gat bilong helpim em long stap laip.”
Wanem Bekim Bilong Yu?
• Jisas i no laik insait long samting wanpela man i bin askim em long en, na dispela i skulim yumi long wanem samting?
• Bilong wanem yumi mas lukaut long pasin mangal? Olsem wanem yumi ken mekim olsem?
• Maski yumi gat planti samting bilong skin, olsem wanem na yumi no inap kisim laip long ol dispela samting?
• Wanem samting inap mekim na i stap bilong yumi i gat as tru bilong en na yumi stap isi?
[Piksa long pes 23]
Bilong wanem Jisas i no laik mekim samting man i askim em long en?
[Piksa long pes 23]
Pasin mangal inap kamapim bagarap
[Ol Piksa long pes 25]
Abraham i gat wanem stretpela tingting long mani kago samting?