Klia Long Pasin Bilong Mangal
“Yupela lukaut! Yupela was gut, bai yupela i no mangal long ol samting. Man i gat planti samting moa, em i no kisim laip long ol dispela samting bilong en.”—LUK 12:15.
1. Toksave bilong Pol long pasin bilong mangal, olsem wanem dispela toksave i stret long nau?
YUMI stap namel long ol manmeri ol i laikim tumas mani kago samting. Ol i laik kisim planti samting bilong skin na ol kampani na bisnis i grisim ol long kisim ol dispela samting. Ol man i save skelim hamas pe man i kisim na ol i tok wok bilong em i kamap gutpela o nogat. Olsem na planti taim Baibel i toksave olsem: Yumi mas was gut, nogut yumi mangal long ol samting na yumi laik kisim planti samting. (Kolosi 3:5; 1 Timoti 6:10) Ol buk i kamapim insait bilong ol tok, olsem diksoneri, i tok insait bilong dispela tok “mangal” i olsem man i “laik tumas long kisim planti samting; em i gat strongpela laik long kisim mani kago samting.” Pasin bilong mangal em i pasin nogut tru wankain olsem pasin bilong pamuk o pasin bilong lotuim god giaman. Olsem na Pol i tok: “Sapos wanpela man yupela i save kolim brata em i bagarapim marit, o em i mangal long samting bilong narapela man, o em i bihainim pasin bilong god giaman, o em i tok bilas, o em i spak, o em i pulim samting bilong narapela man, orait yupela i no ken pren wantaim em. Nogat. Yupela i no ken kaikai tu wantaim kain man olsem.”—1 Korin 5:11; Efesas 5:3, 5.
2. Jisas na Jehova i givim wanem ol toksave long yumi long pasin bilong mangal?
2 Jisas i givim strongpela tok long ol disaipel bilong em, olsem: “Yupela was gut, bai yupela i no mangal long ol samting.” (Luk 12:15) Na Jehova yet i tambuim dispela pasin nogut taim em i kolim ol Tenpela Lo. Em i tok: “Yupela no ken mangalim haus bilong narapela man. Na yupela no ken aigris long meri bilong narapela man. Na yupela no ken mangalim wokboi o wokmeri bilong en o bulmakau o donki o olgeta arapela samting bilong en tu.”—Eksodas 20:17; Rom 13:9.
Oltaim Yumi Mas Was Gut
3. Olsem wanem pasin bilong mangal i pundaunim Iv? Olsem wanem dispela pasin i pundaunim ol Isrel?
3 Yumi no ken slek liklik; oltaim yumi mas was gut bambai yumi no bihainim pasin bilong mangal na aigris long planti samting. Dispela pasin i as bilong rong bilong Iv long Iden: “Meri i lukim diwai, na dispela diwai i luk nais tumas na pikinini bilong en i gutpela tru.” (Jenesis 3:6) Ol Isrel i stap long ples nating na wanpela taim ol i mekim pasin nogut tru bilong mangal. Ol i bel nogut na toktok planti, long wanem ol i gat wanpela kain kaikai tasol, em mana. Olsem na Jehova i salim planti pisin long ol, ol i kolim kwel. Ol Isrel i kirap strong long kaikai na ol i kaikai kaikai planti tumas, olsem na ol i kisim bikpela strafe.—Nambas 11:4-6, 31-33.
4. Stori long sampela man moa bilong bipo em ol i no was gut long pasin bilong mangal.
4 Bihain, taim ol i pait long Jeriko, Ekan i aigris long ol gutpela samting bilong Jeriko. Dispela pasin bilong mangal i kirapim em long stilim sampela mani silva na gol na gutpela klos. (Josua 7:20, 21) Ilaisa i wokim mirakel na pinisim sik lepra bilong Neman. Pasin bilong mangal i kirapim wokboi bilong Ilaisa, em Gehasi, na em i painim rot bilong kisim mani samting bilong em yet long dispela mirakel. (2 King 5:20-27) King Ehap tu em i man bilong mangal. Em i aigris long gaden wain bilong wanpela man i stap klostu long em, nem bilong em Nebot. Ehap i larim meri haiden bilong em, em Jesebel, i wokim rot bilong kilim i dai Nebot bambai em i ken kisim dispela gaden wain. (1 King 21:1-19) Na Judas Iskariot tu i bihainim dispela pasin nogut bilong mangal. Em i stap klostu long Jisas, olsem pren bilong em, na em i gat wok long lukautim bokis mani. Tasol pasin bilong mangal i kirapim em long stilim mani long dispela bokis. Na pasin bilong laikim tumas mani i kirapim em long putim Jisas long han bilong ol birua na kisim 30 mani silva.—Matyu 26:14-16; Jon 12:6.
5. 1 gat ol narapela narapela kain man i pundaun long pasin bilong mangal na dispela i lainim yumi long wanem samting?
5 Olgeta dispela man bilong mangal i kisim strafe. Ol i kain kain man, tasol ol i pundaun long pasin bilong mangal. Yu pilim dispela samting? Iv em i wanpela meri i nambawan olgeta na em i stap long Paradais. Ekan na ol Isrel, long ai bilong ol yet ol i bin lukim ol strongpela wok o mirakel Jehova i wokim. Ehap em i wanpela king na em i gat planti samting. Ating em i gat planti samting winim olgeta narapela man long ples bilong em. Gehasi na Judas i kisim gutpela blesing—ol i stap klostu long wanpela man em inap helpim ol tru long samting bilong spirit, na tupela i holim bikpela wok. Tasol olgeta dispela man na meri ol i kirap bihainim pasin bilong mangal long mani samting. Olsem na yumi save, maski man i gat planti samting, o em i holim bikpela wok, o em i gat save pinis, tasol em inap pundaun long dispela samting. Olsem na Jisas i tok: “Yupela was gut, bai yupela i no mangal long ol samting”!—Luk 12:15.
6. Yumi mas mekim wanem na bai yumi inap abrusim pasin bilong mangal?
6 Tasol yumi mas mekim wanem na bai yumi was gut olsem? Yumi mas bosim gut skin na oltaim yumi mas skelim tingting i stap long bel bilong yumi. Sapos yumi no laik pundaun long pasin bilong mangal, oltaim yumi mas skelim bel bilong yumi, nogut sampela laik nogut i stap na i laik kirapim yumi long mangal long ol samting. Baibel i helpim yumi long mekim olsem. Em i helpim yumi olsem wanem? Olsem: Baibel i kolim ol tok Jisas wantaim ol disaipel bilong em i bin mekim long pasin bilong mangal. Taim yumi skelim ol dispela tok, dispela i kirapim yumi long givim askim long skin bilong yumi yet, olsem: Mi bihainim pasin bilong mangal o nogat?
Skelim Tingting
7. Tok Jisas i bekim long man i kros wantaim brata bilong em long samting bilong papa, dispela tok i helpim yumi olsem wanem long skelim yumi yet?
7 Wanpela man i laik bai Jisas i helpim em long kisim sampela samting na dispela i kirapim Jisas long tok yumi mas was gut bambai yumi no ken mangal long ol samting. Dispela man i tok: “Tisa, mi laik bai yu tokim brata bilong mi long em i mas tilim ol samting bilong papa bilong mitupela, na givim hap long mi.” Tasol Jisas i tokim em: “Husat i makim mi jas bilong yupela, o man bilong tilim ol samting bilong yupela?” (Luk 12:13, 14) Na bihain em i tok yumi mas was gut bambai yumi no mangal long ol samting. Jisas i no laik insait long wanpela kros em mani kago samting i as bilong en; Jisas i gat bikpela wok bilong spirit em i mas mekim. (Jon 18:37) Ol tok i kamap namel long dispela man na Jisas i kirapim yumi long skelim tingting bilong yumi na givim askim long skin bilong yumi, olsem: Sapos yumi no sot long samting na i gat wanpela hap graun o sampela mani o samting bilong papa i stret yumi ken kisim, tasol ol narapela man i laik kisim na kros i kamap. Orait, bai yumi wok strong long kisim dispela samting maski yumi mas lusim bikpela hap taim long mekim na i go long kot samting? O bai yumi tingim wok bilong Jehova na pasin bilong i stap wanbel wantaim ol brata em i bikpela samting?—Provep 20:21; 1 Korin 6:7.
8. Olsem wanem yumi ken klia long pasin bilong ol saveman bilong lo, em Jisas i stori long ol long Luk 20:46, 47?
8 Orait, nau yumi ken tingim narapela tok Jisas i bin mekim. Em i tokim ol disaipel bilong em: “Yupela lukaut gut long ol saveman bilong lo. . . . Ol i save trikim ol meri, man bilong ol i dai pinis, na stilim haus bilong ol.” (Luk 20:46, 47) Em pasin mangal nogut tru! Ol Kristen i mas helpim ol meri em man bilong ol i dai pinis; ol i no ken tru kisim samting bilong ol. (Jems 1:27) Tasol olsem wanem sapos yu save wanpela meri, em man bilong em i dai pinis, em i bin kisim bikpela mani bilong insurens, olsem kompensesen, na wanpela hevi i bin painim yu na yu sot long mani? Bai yu tingting long askim mani long dispela meri pastaim, long wanem yu ting i no hatwok long yu kirapim em long givim mani long yu? O bai yu ting em i mas givim mani long yu, long wanem em i gat planti mani? O sapos yu bin kisim dinau long dispela meri na nau yu hatwok long bekim, bai yu pilim olsem yu no ken tingting planti long bekim dispela dinau, long wanem dispela meri i no ken toktok na em i gat planti mani? Taim yumi gat hevi long mani yumi mas was gut, nogut tingting bilong yumi i paul na yumi no bihainim ol stretpela lo.
9. Olsem wanem yumi inap pundaun na “grisim sampela man bilong pulim samting bilong ol”?
9 Jut tu i stori long pasin bilong mangal na olsem wanem dispela pasin inap pundaunim yumi. Em i stori long sampela man i hait i kam insait long kongrigesen Kristen. Ol i bihainim pasin mangal na kain kain pasin bilong bel i kirap na ol i bagarapim kongrigesen. Ol i “givim baksait long dispela wanpela Hetman, em Bikpela bilong yumi Krais Jisas.” (Jut 4) Na ol i save “grisim sampela man bilong pulim samting bilong ol.” (Jut 16) Yumi no laik bihainim kain pasin olsem, a? Tasol olsem wanem? Yumi save poroman wantaim ol Kristen i gat planti samting na yumi no tingim tumas ol brata i stap rabis? Sapos yumi mekim olsem, ating yumi laik grisim ol bilong helpim yumi long sampela samting? (Skelim Aposel 20:33; 1 Tesalonaika 2:5.) Taim yumi singautim sampela brata i kam long haus bilong yumi, em ol i gat bikpela wok insait long oganaisesen bilong Jehova, yumi singautim ol long wanem yumi laikim tumas ol na yumi laik mekim gut long ol, o yumi tingting long ol i ken helpim yumi long kisim sampela wok insait long oganaisesen? Sapos olsem yumi ‘grisim ol bilong pulim samting bilong ol.’
10. Long wanem wanem rot yumi inap kisim profit long lotu bilong yumi? Sapos yumi mekim olsem, yumi bihainim pasin bilong husat?
10 Jisas i kros tru long wanpela pasin bilong mangal long mani em ol man long taim bilong em ol i bihainim. Em i go long Jerusalem na “insait long tempel em i lukim ol man i wok bisnis long bulmakau na sipsip na pisin. Na em i lukim ol man bilong senisim mani ol i sindaun i stap.” Jisas i strong long mekim haus bilong Jehova i stap gut, olsem na em i rausim ol long tempel. Em i tok: “Yupela i no ken mekim haus bilong Papa bilong mi em i kamap olsem haus stua.” (Jon 2:13-17) Yumi strong olsem? Orait, gutpela sapos yumi askim skin bilong yumi yet, olsem: Taim mi stap long Haus Kingdom mi save toktok long samting bilong bisnis? Mi kirapim ol brata long helpim wok bisnis bilong mi, long wanem mi save ol i no ken sakim brata Kristen bilong ol? Long rot bilong ol dispela planti pren bilong mi insait long oganaisesen mi laik mekim wok bisnis bilong mi i kamap bikpela? Yumi no laik mekim wok long ol brata bilong yumi bambai yumi ken kisim planti mani, a?
11. Wanem ol lo Kristen i helpim yumi long bihainim stretpela tingting taim yumi mekim wok bisnis wantaim ol brata?
11 Tasol olsem wanem? Ating ol Kristen i no ken wok bisnis wantaim? Nogat. Tasol i gat taim na ples bilong mekim wok bisnis, na i gat narapela taim na ples bilong mekim lotu. (Eklisiastis 3:1) Tasol taim ol Kristen i wok bisnis wantaim ol i no ken lusim tingting long ol lo bilong Baibel. Taim wanpela Kristen i pasim tok pinis wantaim wanpela man long mekim wanpela wok bisnis, em i no ken painim rot long lo bilong abrusim ol wok em i tok promis pinis long mekim. (Matyu 5:37) Na sapos dispela bisnis i no wok gut na mani bilong em i lus, em i no ken mekim hatpela pasin o bekim nogut long man. Aposel Pol i raitim pas long ol Kristen long Korin na em i tok: “Yes, yupela i save kotim ol brata, na long dispela pasin yet yupela i pundaun pinis. Bilong wanem yupela i no larim ol i mekim nogut long yupela? Bilong wanem yupela i no larim ol i pulim samting bilong yupela?” (1 Korin 6:7) Olsem wanem long yu? Bai yu tingting long helpim kongrigesen na yu no ken kisim brata i go long kot, yu larim em i pulim samting bilong yu?
12. Wanem ol tok bilong Baibel i helpim ol brata i mekim wok bisnis na ol i no ken bihainim pasin bilong mangal?
12 Olgeta Kristen i mekim wok bisnis, ol i mas was gut. Long nau planti man bilong mekim wok bisnis ol i mekim kain kain pasin giaman bilong pulim mani bilong ol man. Tasol Kristen i no ken mekim olsem. Nogat tru. Em i wanpela disaipel bilong Krais na em i no ken lusim tingting long dispela samting. Em i no laik kisim nem olsem man bilong giaman o man bilong pulim mani. (Lukim Provep 20:14; Aisaia 33:15.) Na em i no ken lusim tingting long toksave bilong Jisas olsem em i no ken larim mani i kamap bosman o god bilong em. Em i mas tingim toksave bilong Jon long pasin bilong “bel kirap na aigris na bikhet.” (1 Jon 2:16; Matyu 6:24) Olsem wanem? Yu wanpela brata o sista Kristen na yu gat wok bisnis? Orait, yu inap sakim pasin bilong pulim ol man long mangal long planti samting bambai yu inap baim planti samting i go long ol? Ol man i save hambak long skin na ol samting bilong ol, orait yu bai pulim ol long bihainim moa yet dispela pasin bilong helpim wok bisnis bilong yu? Yu save mekim wok bisnis bilong yu long pasin i stret na taim yu beten long Jehova yu no sem long tokim em long ol samting yu mekim?—Matyu 6:11; Filipai 4:6, 7.
13, 14. (a) Ol Kristen i gat planti samting ol i mas bihainim wanem stretpela tingting? Na ol Kristen i no gat planti samting ol i mas bihainim wanem stretpela tingting? (b) Beten i stap long Provep 30:8 i helpim yumi olsem wanem long kisim stretpela tingting long mani kago samting?
13 Na Pol i tokim Timoti: “Ol man i ting long kisim planti kago, ol bai i pundaun long traim, olsem long hul bilong kisim abus. Na bel bilong ol bai i kirap long planti samting nogut i save mekim ol i longlong. Na bai ol i lus na bagarap tru.” (1 Timoti 6:9) Sapos man i gat planti samting, i no gat rong long dispela. Tasol i gat ol hevi na traim i save painim ol maniman. (Matyu 19:24-26) Bikpela samting em olsem: Yumi mas was gut, nogut yumi “ting long kisim planti kago.” Wanpela elda i tok: ‘Hevi i save kamap taim man i lukim brata Kristen bilong em i gat planti samting na em i tok, “Mi tu mi laik kisim planti samting.”’
14 Baibel i tok: “Yupela i no ken bihainim pasin bilong mangal long mani. Samting yupela i holim, em yupela i mas ting olsem: ‘Em i gutpela. Em bai inap long mipela.’ God i tok pinis, ‘Bai mi no lusim yu. Bai mi no givim baksait long yu. Nogat tru.”’ (Hibru 13:5) Sapos yu gat planti samting, yu tingim ol dispela samting bilong yu i olsem presen yu kisim, olsem samting yu ken mekim wok long en bilong helpim wok bilong Jehova? Wanpela taim Jisas i tokim wanpela yangpela maniman, sapos em i laik bihainim Jisas em i mas i go salim olgeta samting bilong em na givim mani long ol rabisman. Sapos Jisas i bin tok olsem long yu, bai yu tingting long holimpas ol samting bilong yu o bai yu lusim na i go bihainim Jisas? (Matyu 19:20-23) Sapos yu no gat planti samting, yu inap amamas long ol samting yu holim pinis na tok, ‘Em inap. long mi’? Yu inap abrusim pasin bilong mangal long mani samting? Yu bilipim tok promis bilong Jehova? Em i tok: “Bai mi no lusim yu. Bai mi no givim baksait long yu. Nogat tru.”—Lukim tu Provep 30:8.
Wok long i Stap Gut long Ai Bilong God
15, 16. (a) Jisas i mekim wanem tok piksa bilong strongim tok bilong em long pasin bilong mangal? (b) Wanem hevi tru bilong dispela man long tok piksa bilong Jisas?
15 Jisas i tokim ol man ol i mas ‘was gut bai ol i no mangal long ol samting,’ na bihain em i tok piksa long wanpela maniman em gaden bilong em i karim planti kaikai. Dispela maniman i “tingting long bel bilong en olsem, ‘Bai mi mekim wanem nau? Mi no gat haus inap long bungim olgeta kaikai bilong mi.’ Na em i tok, ‘Bai mi mekim olsem: Bai mi brukim olgeta haus kaikai bilong mi, na mi wokim bikpela bikpela. Na bai mi bungim olgeta wit na olgeta gutpela samting bilong mi long dispela haus. Na bai mi ken tingting olsem: Planti gutpela samting bilong mi i stap inap long planti yia. Orait, mi kisim malolo nau. Mi kaikai na dring na amamas i stap.’” Tasol long dispela nait dispela man i dai. Olgeta samting em i bungim i stap i no inap helpim em liklik. “Em i olsem tasol long ol man i hipim hipim planti samting bilong ol yet, na ol i rabis long ai bilong God.”—Luk 12:16-21.
16 Olsem wanem? Long pasin hait dispela man i bin mekim wanpela rong, olsem pulim mani bilong ol man o stil? Dispela tok piksa i no stori olsem. Tasol hevi bilong em i olsem: Em i ting mani kago bilong em inap helpim em long i stap gutpela long bihain na em i lusim tingting long samting i bikpela moa, olsem em i mas wok long i stap gut long ai bilong God. Ol Kristen tru i save wok strong long i stap gut long ai bilong God. Ol i save tingim dispela samting i nambawan bikpela samting, na dispela i helpim ol long abrusim pasin bilong mangal long mani samting na ol i stap narapela kain long ol manmeri bilong dispela graun; ol i no bilong dispela graun.—Jon 17:16.
17. Kristen i save tingting stret em i ting olsem wanem long hatwok bilong kisim mani bilong baim kaikai samting?
17 Wanpela taim Jisas i tok: “Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. Ol [lain man] i save wari long painim olgeta dispela samting.” (Matyu 6:31, 32) Tru, yumi gat wankain hevi na hatwok olsem bilong ‘ol dispela lain man.’ Yumi mas wok strong bambai yumi inap kisim liklik wansiling na baim kaikai na klos samting. (2 Tesalonaika 3:10-12) Tasol yumi no larim dispela samting i kamap nambawan bikpela samting long tingting bilong yumi; yumi tingting pastaim long i stap gut long ai bilong God.
18. Sapos yumi bilip tru long Jehova, olsem wanem dispela inap helpim yumi long abrusim pasin bilong mangal?
18 Jehova em i as bilong olgeta gutpela samting bilong skin. (Aposel 14:15, 17) Em i tok promis pinis olsem em bai lukautim gut ol wokboi bilong em. Jisas i tok: “Papa bilong yupela i stap long heven em i save pinis, yupela i mas kisim olgeta kain samting olsem. Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:32, 33; Sam 37:25) Olsem wanem? Yu bilipim dispela tok promis? Yu bilip olsem Jehova bai truim dispela tok promis bilong em? Bai yu amamas long ol samting Jehova i givim long yu na tok, ‘Em inap long mi’? Sapos olsem, orait bai yu no pundaun na bihainim pasin bilong mangal long mani samting. (Kolosi 3:5) Bai yu tingting pastaim long mekim wok bilong Jehova na i stap gut long ai bilong em, na bai olgeta samting yu mekim i kamapim bilip bilong yu, yu bilip tru long Jehova.
Yu Tingim?
◻ Wanem ol kain man i pundaun long pasin bilong mangal?
◻ Olsem wanem yumi ken was gut bai yumi no bihainim pasin bilong mangal?
◻ Sampela taim pasin bilong mangal i kirapim ol man long mekim wanem?
◻ I gat wanem ol askim bilong helpim yumi long save, yumi bihainim pasin bilong mangal o nogat?
◻ Wanem nambawan bikpela samting bilong helpim yumi long abrusim pasin bilong mangal?
[Rait Long Pes 21]
Taim ol Kristen i wok bisnis wantaim, ol i no ken lusim tingting long ol lo bilong Baibel