Tingim Wanpela Taim Bai i No Gat Pasin Mangal
SAPOS bihain wanpela taim i kamap na ol manmeri i wok gut wantaim, na ol i no resis long winim narapela, na ol i mekim gut long ol narapela olsem ol i laik bai ol narapela i mekim long ol, orait long kain taim olsem bai i no gat pasin mangal, a? Em bai gutpela taim tru! Dispela samting inap long kamap o olsem wanem? Yes, em inap long kamap. Pasin mangal i save pas strong long bel bilong ol man, orait olsem wanem dispela pasin inap long pinis?
Bilong painim bekim bilong dispela askim, pastaim yumi mas kisim save long as bilong pasin mangal. Baibel i tok klia olsem pasin mangal em i no wanpela pasin i bin i stap long skin bilong ol manmeri long olgeta taim. Profet Moses i tok i no gat kain pasin nogut olsem pasin mangal i bin i stap long skin bilong namba wan man, long wanem, God i bin wokim man i gutpela olgeta, na God yet i no gat pasin mangal. Baibel i tok: “[God] i olsem wanpela bikpela strongpela ston . . . pasin bilong en i gutpela na stretpela tasol.” Pasin mangal i bin kamap olsem wanem? Namba wan man na meri i larim dispela pasin i kamap insait long bel bilong ol. Iv i mangalim samting em i ting em bai kisim taim em i kaikai dispela pikinini bilong diwai God i bin tambuim. Adam tu i mekim pasin mangal—em i no laik bai gutpela na naispela meri bilong em i lus. Sampela tok moa Moses i mekim i sutim stret pasin bilong Adam tupela Iv. Moses i tok ol manmeri yet i kirap mekim pasin nogut. Em i tok: “Yupela i manmeri bilong mekim sin tasol. Olsem na yupela i no inap i stap lain pikinini bilong God.”—Lo 32:4, 5; 1 Timoti 2:14.
Kirap long taim bilong Adam, pasin mangal na pasin bilong bel i kirap i wok long i go bikpela, na long taim bilong Tait Wara long taim bilong Noa em i strong moa yet. Olsem Baibel i tok: “Pasin bilong ol manmeri long olgeta hap i nogut tru. Ol manmeri i tingting tasol long ol samting nogut.”—Stat 6:5.
Pasin mangal i bosim ol man na dispela pasin i wok long i go bikpela i kam inap long taim bilong yumi. Long nau dispela pasin i nogut moa yet—ol man i no save tenkyu na ol i save mangalim planti Samting.
Bilong Pinisim Pasin Mangal Ol i Mas Skul
Long nau planti man i bihainim pasin mangal, tasol ol inap lusim. Ol inap daunim pasin mangal. Tasol bilong mekim olsem, ol i mas kisim save na lain, na i gat sampela lo ol i mas bihainim. Em gutpela, tasol husat inap long givim gutpela skul olsem long ol na kirapim ol long bihainim gutpela pasin—o strong long ol i mas bihainim?
Dispela kain skul i mas kam long wanpela man i no gat pasin mangal. Em i laik helpim tasol ol man na em i no tingting long kisim bekim. Na tu, em i mas skulim gut ol man na kamapim long ples klia olsem sapos ol i lusim pasin mangal na tingim gut ol narapela man, dispela bai helpim ol. Man i wok long skul em i mas save tru olsem em inap bihainim gutpela pasin, na sapos em i mekim olsem, em i bihainim gutpela rot, na dispela bai helpim em yet na ol narapela man i stap klostu long em.
God antap long heven tasol inap givim gutpela skul olsem long ol man, long wanem i no gat wanpela man o wanpela oganaisesen long dispela graun inap mekim olsem, a? I no gat wanpela man inap mekim, long wanem, olsem Baibel i tok: “Yumi olgeta man yumi bin mekim sin.”—Rom 3:23.
Yumi ken amamas, long wanem Jehova, em God bilong heven, em i givim save long yumi long rot bilong buk bilong em, em Baibel. Taim Pikinini bilong em, Krais Jisas, i stap long graun, em i save gut long tok bilong God long Baibel na lainim ol man long en. Wanpela taim Jisas i autim tok antap long maunten na em i stori long gutpela pasin yumi mas bihainim. Em i tok, yumi mas mekim gut long ol narapela man na long ol man i birua long yumi tu. Planti man i harim dispela tok bilong Jisas ol i ting dispela tok i narapela kain tru. Jisas i tok: “Yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela. Olsem bai yupela i stap pikinini bilong Papa bilong yupela em i stap long heven. Em i save mekim san bilong en i kamap antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man bilong mekim pasin i no stret tu. Sapos yupela i laikim tasol ol man i save laikim yupela, bai yupela i kisim wanem pe? Ol man bilong kisim takis, ol tu i save mekim wankain pasin.”—Matyu 5:44-46.
Taim Jisas i stap long graun, hap wok bilong em i bilong lainim ol man long tingim na mekim gut long narapela man, na bihain ol i ken lainim ol narapela tu long bihainim dispela gutpela pasin. Aposel Pol em i kamap wanpela man bilong lainim ol man olsem. Em i kirap mekim dispela wok bihain long taim Jisas i dai na kirap bek. Long sampela pas em spirit holi i kirapim Pol long raitim, Pol i kirapim ol man long lusim pasin mangal. Taim em i raitim pas long ol Efesus, em i tok: “Yupela i no ken mekim pasin pamuk na olgeta kain pasin doti, na yupela i no ken mangalim ol samting bilong ol arapela. Tok bilong ol dispela pasin tu i no ken kamap liklik namel long yupela. I no inap yumi manmeri bilong God i toktok long ol dispela kain pasin.”—Efesus 5:3.
Olsem tasol long nau ol Witnes Bilong Jehova i save lainim ol man na meri long lusim olgeta kain pasin bilong mangal. Taim ol i kisim gut save na lain long mekim olsem, ol i go na lainim ol narapela man long ol kain pasin God i laikim.
Tok i Tru Bilong Baibel i Mekim Wok
Tasol ating yu bai askim yu yet olsem: ‘Ol sinman, em pasin mangal i pas strong long bel bilong ol, ol inap long rausim dispela pasin o nogut?’ Ol inap long rausim. Tru, ol i no inap kamap gutpela olgeta, tasol ol inap senisim tru pasin bilong ol na bai ol narapela man i kirap nogut long dispela samting. Yumi ken tingim stori bilong wanpela man i bin mekim olsem.
Wanpela stilman i stap long Spen. Ol samting em i bin stilim i pulap long haus bilong em. Bihain ol Witnes Bilong Jehova i stadi wantaim em long Baibel. Nau em i tingting long bekim ol samting em i bin stilim, long wanem bel bilong em i gat tok. Em i go long olpela bos bilong em long ples em i bin wok long bipo, na tokim em, em i bin stilim wanpela nupela masin bilong wasim klos. Olpela bos bilong em i kirap nogut tru, long wanem pasin bilong em i senis, i no olsem long bipo. Bos i tok em i no ken tokim polis long dispela samting, tasol em i tokim dispela man long bekim mani long em bilong baim dispela masin em i bin stilim.
Dispela man, bipo em i stilman, em i tingting strong long i go lukim ol man bipo em i bin stilim ol samting bilong ol na bai em i ken bekim samting bilong ol. Olgeta man em i bin i go lukim, ol i kirap nogut long pasin bilong em, long wanem em i bihainim ol lo bilong Baibel na nau em i senisim tru pasin bilong em.
Tasol wanpela hevi i stap yet. Em i holim yet planti samting em i bin stilim na em i no save long papa bilong ol dispela samting. Olsem na em i beten long Jehova, na bihain em i kisim 6-pela redio bilong ka em i bin stilim na em i go givim long ol polis. Ol polis i kirap nogut long dispela, long wanem em i no gat nem nogut long ol. Olsem na ol i tokim em long baim kot na go kalabus long liklik taim tasol.
Dispela man bipo em i stilman, em i lusim pasin nogut na pasin mangal, na nau bel bilong em i stap gutpela, bel bilong em i no kotim em moa. Em i senisim pasin bilong em na em i kamap wanpela Witnes Bilong Jehova, em dispela lain i stap long olgeta hap bilong graun.
I gat planti kain stori olsem. Planti tumas manmeri i stap long dispela graun, na liklik lain tasol i senisim pasin bilong ol. Tasol ol i planti liklik na dispela i kamapim long ples klia olsem sapos man i kisim save long Baibel na bihainim ol lo bilong Baibel, dispela inap helpim em long mekim gutpela pasin.
Long olgeta yia planti man moa i kirap bihainim gutpela pasin. I gat inap olsem 60,000 kongrigesen bilong ol Witnes Bilong Jehova i stap long olgeta hap bilong graun, na ol i save lainim ol tok bilong Baibel. Ol Witnes i no inap senisim pasin bilong olgeta manmeri i stap long dispela graun na pinisim pasin mangal. Tasol ol tok profet long Baibel i soim yumi olsem long liklik taim bihain, bai nupela taim i kamap, na bai i no gat pasin mangal i stap!
Wanpela Nupela Taim i No Gat Pasin Mangal
Nupela taim bai kamap na long dispela nupela taim bai i no gat pasin mangal o pasin bilong ol man i laikim ol yet tasol na ol i no tingim ol narapela man. Aposel Pita i tokaut long yumi olsem stretpela pasin bai stap long taim bilong “nupela skai” na “nupela graun.” (2 Pita 3:13) Pasin mangal, na sik, na bel hevi, na dai tu bai pinis olsem Baibel i tok: “Ol dispela samting bilong bipo ol i pinis olgeta.”—Kamapim Tok Hait 21:4.
Olsem na sapos nau yu bel hevi, long wanem pasin mangal i go bikpela na ol manmeri i save tingim ol yet tasol, yu ken strongim bel na amamas, long wanem liklik taim bihain bai nupela taim i kamap long dispela graun! Sapos yu laik i stap long dispela nupela taim, yu mas redi long nau. God bai helpim yu taim yu wok strong long lusim olgeta kain pasin bilong mangal. I gat wanpela lain long nau i wok long helpim ol man long save long gutpela samting bai painim ol sapos ol i bihainim pasin Kristen. Yu ken wok wantaim dispela lain long helpim ol man long dispela samting. Yu mas bilip long tok promis bilong God Jehova olsem liklik taim bihain bai olgeta pasin nogut i pinis na pasin mangal tu bai pinis. Na Baibel i tok: “Ol man bai i no inap tingim moa ol samting i bin kamap bipo.”—Aisaia 65:17.
[Piksa long pes 25]
Jisas i stori long gutpela pasin i kirapim ol man long lusim pasin mangal na tingim gut ol narapela man
[Piksa long pes 27]
Liklik taim—bai i no gat pasin mangal