Wokabaut i Go Long Ples The Bottom Long Saba

AILAN Saba em ailan ol Netelan i bosim, em i bin stap olsem ples hait bilong ol raskol bilong solwara husat i save ron long sip long solwara Karibian na stilim ol mani samting bilong ol arapela man. Nau dispela liklik ailan, em i stap 240 kilomita longwe long hap is bilong Pueto Riko, i gat 1,600 samting manmeri long en, na 5-pela bilong ol i Witnes Bilong Jehova. Tasol dispela 5-pela strongpela man bilong autim tok i painim samting i gutpela moa winim ol mani samting ol raskol bilong solwara i bin stilim. Ol i givim bel tru long painim ol manmeri husat i gat laik long “kisim laip i stap gut oltaim.”​​—⁠Aposel 13:⁠48.

Namba wan taim gutnius bilong Kingdom Bilong God i go kamap long ailan em long Jun 22, 1952, taim sip Sibia, em ol Witnes Bilong Jehova i ranim, i go sua long nambis bilong Saba. (Matyu 24:14) Tupela misineri, Gust Maki na Stanley Carter i wokabaut long ol step i go antap em ol i kolim The Ladder, em wanpela liklik rot i gat 500 step ston i go antap long ples The Bottom, biktaun bilong Saba.a Inap sampela handet yia, dispela liklik rot i bin stap olsem rot bilong i go bungim ol manmeri bilong ailan.

Namba wan taim ripot i tok long ol Kristen i mekim wok autim tok long Saba i bin kamap long 1966 Yearbook of Jehovah’s Witnesses. Olsem ripot i tok, wanpela Witnes tasol i mekim wok autim tok long ailan. Bihain, wanpela famili bilong Kanada i bin go na mekim wok autim tok long ailan inap sampela yia. I no longtaim i go pinis, tupela marit bilong Amerika, Russel na Kathy, i go na mekim wok autim tok long ailan Saba. Nau skelim stori bilong ol.

Visitim Saba

Mi na meri bilong mi i kam long balus. Mipela i go bilong visitim Ronald, em tasol i Witnes long ailan long 1993 samting i go 1999. Em i wetim mipela long ples balus. Em i amamas long liklik kumu mitupela i karim i kam olsem presen, long wanem, Saba i no gat wok gaden samting. Mipela i kalap long wanpela liklik trak, na isi isi mipela i ron arere long maunten Scenery i go antap tru long wanpela volkeno i no pairap moa.

Mipela i stop long ples Hell’s Gate, na Ronald i go sekim notisbot bilong luksave olsem toksave bilong singautim ol man i kam long pablik tok long Sande i stap yet o nogat. Mipela i amamas long lukim toksave i stap yet. Em i kalap gen long trak, na mipela i ron i go antap long bikpela ples bilong ailan, Windwardside. Olsem nem i makim, dispela ples i stap long hap sait bilong ailan em win i save kam long en. Em i stap 400 mita antap long mak bilong solwara. Taim mipela i kamap pinis long haus bilong Ron, mitupela i lukim wanpela naispela sain long ai bilong veranda i tok Haus Kingdom bilong ol Witnes Bilong Jehova.

Taim mipela i kaikai long belo mi askim olsem: “Olsem wanem yu bin kamap man bilong autim tok long ailan Saba?”

Ron i tok: “Taim wok bilong sanapim brens bilong ol Witnes Bilong Jehova long Pueto Riko i pinis long 1993, mi na meri bilong mi i gat bikpela laik yet long mekim wok long ol narapela kantri.” Paslain, mitupela i bin visitim Saba wantaim tupela narapela painia marit na mitupela i kisim save olsem i gat 1,400 manmeri i stap, tasol i no gat ol Witnes. Olsem na mitupela i toktok wantaim Brens Komiti bilong Pueto Riko long tingting bilong mitupela long kam long hia.

“Ol samting i bin wok gut tru, olsem na mitupela i bin kisim tok orait long kam na sindaun long hia na mekim wok. Tasol sori tru, tupela yia bihain meri bilong mi i sik nogut tru, na mitupela i mas go bek long Kalifonia. Bihain long em i dai, mi bin kam bek gen long hia. Em nau, mi no laik statim wanpela samting na mi no pinisim.”

Autim Tok Long Ol Haus Long Saba

Wanpela rum bilong haus bilong Ron i stap olsem Haus Kingdom.b Taim mipela i kaikai long moningtaim na redi long go autim tok, liklik ren i pundaun antap long haus kuk. Bihain long kaikai, mipela i kirapim wok bilong autim tok long ol haus long ples The Bottom. Long olgeta wan wan haus, Ron i givim gude na kolim nem bilong man bilong haus. Mipela i stori long samting i bin kamap long ples i no longtaim i go pinis. Planti manmeri i save long Ron na wok bilong em, na planti i redi long kisim ol nius bilong Baibel.

Taim yu bungim man i gat laik long tok bilong Kingdom, i hatwok long tingim em i stap long wanem haus sapos yu no save gut long ol manmeri bilong ples. Bilong wanem? Long wanem, olsem Ron i tok, “lo i makim olsem ol i mas penim olgeta haus long wankain kala.” Mi luksave olsem em i tru, taim mi tanim na mi lukim olgeta haus long Saba i waitpela na olgeta rup i retpela.

Taim mipela i pinisim stori bilong Baibel wantaim man bilong haus, mipela i singautim em long kam na harim pablik tok bilong Baibel long Sande long Haus Kingdom. Taim Ron i stap long ailan, em i save mekim pablik tok long olgeta wik. Long nau, i gat 17 man i stadi long Baibel long ailan Saba. Inap 20 manmeri i kam bung long Memorial bilong tingim dai bilong Krais long 2004. Maski dispela namba i liklik, em i makim 1 pesen bilong olgeta manmeri long Saba!

Tru tumas, ol Witnes Bilong Jehova i wok strong tru bilong helpim planti manmeri long harim tok bilong God long kisim bek ol man. Maski em i liklik ailan olsem Saba o bikpela kantri, ol Witnes Bilong Jehova i stap gut long wok bilong “mekim olgeta lain manmeri i kamap disaipel.”​​—⁠Matyu 28:⁠19.

Tasol sori tru, raun bilong mitupela long Saba i pinis. Taim mitupela i kalap long balus, mitupela i tromoi han long brata. Oltaim mitupela bai tingim raun bilong mitupela long Saba na taim mitupela i bin wokabaut i go long ples The Bottom!

[Ol Futnot]

[Ol Mep long pes 10]

(Bilong save ol dispela rait i stap we long pes, lukim buk o magasin)

PUETO RIKO

[Piksa Kredit Lain long pes 10]

Background: www.sabatourism.com