Baibel Berleburg

LOTU Pietis i bin kirap insait long Misin Luteran bilong Jemani namel long yia 1600 na 1800. Ol i holim strong bilip bilong ol, olsem na ol man i tok bilas long sampela na mekim nogut long ol. Dispela i mekim na sampela saveman bilong dispela lain Pietis i ranawe i go long Berleburg, em i stap long hap not bilong Frankfurt long wara Main inap olsem 150 kilomita. Wanpela bikman bilong dispela ples, em Casimir von Wittgenstein Berleburg, em man bilong tingim tru lotu, olsem na em i kisim ol dispela lain na mekim gut long ol. Ol dispela man bilong autim tok na ol saveman bilong bikpela skul ol i kam i stap long Berleburg, na dispela i mekim na i gat wanpela nupela Baibel ol i tanim long tok Jemani. Long nau ol i kolim olsem Baibel Berleburg. Wanem samting i mekim na ol i wokim dispela Baibel?

Wanpela man i bin ranawe i kam long dispela ples, em Johann Haug, em ol tisa bilong lotu long ples bilong em ol i bin mekim nogut long em na em i mas lusim haus bilong em long Strasbourg. Haug em wanpela saveman i bin winim bikpela skul na em i save gut long ol tok ples. Em i tokim ol wanlain saveman long Berleburg long bikpela laik bilong em long “kamapim wanpela Baibel i no gat sampela tok kranki long en, na bilong stretim ol tok bilong Baibel em Luther i bin tanim, na kamapim stret insait tru bilong Tok Bilong God.” (Die Geschichte der Berlenburger Bibel [Stori Bilong Baibel Berleburg]). Em i laik wokim wanpela Baibel i kamapim insait bilong sampela tok bilong en, na sampela toksave, na tok bilong en i mas klia na bai ol man nating inap ritim na kisimgut. Haug i singautim sampela saveman long ol narapela kantri bilong Yurop bilong helpim em, na em i mekim wok bilong tanim Baibel i go inap 20 yia. Ol i kirap prinim dispela Baibel Berleburg long 1726. Ol i bin raitim insait bilong planti ves na planti toksave, olsem na dispela Baibel i gat 8-pela volium.

Baibel Berleburg i gat sampela tok i kirapim tru tingting bilong yumi. Olsem: Kisim Bek 6:​2, 3 i tok: “Na God i toktok wantaim Moses na i tokim em: Mi BIKPELA! Na mi bin kamap long Abraham, long Aisak na long Jekop olsem wanpela God i gat olgeta strong: tasol mi no bin kamapim nem bilong mi long ol.” I gat wanpela toksave i tok: “Nem JEHOVA . . . em dispela nem i stap narapela kain, o nem em i bin autim.” Na i gat nem bilong God, Jehova, long sampela toksave bilong Kisim Bek 3:15 na Kisim Bek 34:⁠6.

Baibel Berleburg em wanpela bilong planti Baibel Jeman i bin kamapim nem Jehova long sampela ves, o long sta daunbilo, o long sampela toksave ol i bin raitim. Wanpela Baibel bilong nau i litimapim nem tru bilong God, em New World Translation of the Holy Scriptures, ol Witnes Bilong Jehova i wokim.