Askim
Taim Devit wantaim lain bilong em i kaikai bret tambu ol i bin givim long God, dispela i makim olsem yumi inap brukim lo bilong God long taim bilong bikpela hevi na i no gat strafe bilong en?—1 Samuel 21:1-6.
Olsem Wok Pris 24:5-9 i tok, ol bret tambu ol i save senisim long olgeta Sabat, em bilong ol pris tasol i ken kaikai. I stret ol pris tasol i kaikai dispela bret, long wanem, dispela bret i holi na em i stap olsem kaikai bilong ol man i mekim wok bilong God—em ol pris. Sapos ol i givim long ol wokman nating o ol i kaikai nating bilong amamas tasol, bai i gat rong long en. Tasol pris Ahimelek i no mekim rong taim em i givim sampela bret tambu long Devit wantaim lain bilong em.
I luk olsem Devit i kam bilong mekim wanpela wok stret bilong King Sol. Devit wantaim lain bilong em ol i hangre. Ahimelek i skelim pinis olsem ol i stap klin long ol samting bilong lotu. Tru, pasin bilong ol long kaikai bret ol i bin givim long God, em i tambu long mekim, tasol em i stret wantaim wok God i bin makim bilong dispela bret tambu. Ahimelek i tingim dispela na em i larim Devit i kisim dispela bret bilong ol pris. Jisas Krais yet i stori long dispela samting i bin kamap bilong soim olsem i no stret ol Farisi i putim ol strongpela tambu tru long ol man i mas bihainim na ol i tok ol dispela tambu i insait long lo bilong Sabat.—Matyu 12:1-8.
Tasol ol dispela tok i no makim olsem yumi inap kalapim lo bilong God taim sampela hevi i painim yumi. Olsem: Wanpela bikpela hevi i kamap taim ol ami bilong Israel i mekim pait long ol Filistia. King Sol i bin tok: “Nau tasol mi mas bekim rong bilong ol birua bilong mi na mekim save long ol. Olsem na yupela olgeta man i no ken kaikai wanpela samting inap san i go daun. Sapos man i kaikai, orait bai God i ken bagarapim em.” Baibel i tok: “Long dispela de ol Israel i pait long ol Filistia.” Ol soldia i no gat strong moa na ol i hangre nogut tru, olsem na ‘ol i kisim ol sipsip na bulmakau na ol i kukim na kaikai mit i gat blut i stap yet long en.’ (1 Samuel 14:24, 31-33) Ol i bin kalapim lo bilong Jehova long blut na ol i mekim sin long Jehova. Pasin ol i mekim i no stret wantaim wanpela wok tasol God i bin makim bilong blut, olsem bilong “rausim sin” bilong ol man. (Wok Pris 17:10-12; Stat 9:3, 4) Long pasin marimari Jehova i orait long kisim ol ofa bilong helpim ol man i bin mekim sin.—1 Samuel 14:34, 35.
Tru tumas, Jehova i laik bai yumi mas bihainim ol lo bilong em long olgeta taim. Aposel Jon i tok: “Sapos yumi laikim tru God, orait yumi save bihainim ol lo bilong en.”—1 Jon 5:3.
[Piksa long pes 30]
Ol i save putim nupela bret tambu insait long haus lotu sel long olgeta wan wan de Sabat