Ol i Sanap Strong Taim Ol Man i Birua Long ol

WANPELA lain i kros na singaut bikmaus ol i pulim Gaius na Aristarkus, tupela poroman bilong aposel Pol, i go insait long ples kibung bilong Efesus. Long hap, inap tupela aua ol i singaut strong olsem: “Artemis bilong yumi Efesus em i nambawan tru.” (Aposel 19:​28, 29, 34) Olsem wanem? Ol poroman bilong Pol i sanap strong taim dispela pasin birua i painim ol? Na wanem samting i bin kamapim dispela pasin birua?

Pol i bin autim gut tok long taun Efesus inap tripela yia. Dispela i mekim na planti man bilong Efesus i no moa lotuim ol piksa bilong ol god giaman. (Aposel 19:26; 20:31) Wanpela imis bilong ol Efesus em wanpela liklik piksa bilong haus lotu bilong Artemis, em god meri bilong kamapim pikinini, na traipela haus lotu bilong em i stap klostu long taun. Ol manmeri i save mekim wok long dispela liklik imis olsem paspas na olsem bilas bilong haus. Yumi save ol Kristen i no inap baim ol dispela imis.​—1 Jon 5:​21.

Demitrius, em wanpela bilong ol man i save wokim samting long silva, em i ting olsem wok autim tok bilong Pol bai bagarapim wok bisnis bilong ol. Em i mekim sampela tok giaman long ol narapela man i save wokim samting long silva olsem ol manmeri long olgeta hap bilong Esia Maina bai pinis long lotu long Artemis. Taim ol dispela man i belhat na singaut na litimapim nem bilong Artemis, bikpela kros pait i kamap na olgeta manmeri long taun i longlong nabaut.​—Aposel 19:​24-​29.

Planti tausen manmeri i go long ples kibung, em bikpela inap long 25,000 manmeri i ken sindaun long en. Pol i laik toktok long ol dispela manmeri, tasol sampela gutpela wokman bilong gavman ol i tok strong long em i no ken go insait long ples kibung. Bihain, kuskus bilong taun Efesus i toktok wantaim ol manmeri na ol i stap isi, na Gaius na Aristarkus i ranawe na i no kisim bagarap.​—Aposel 19:​35-​41.

Long nau tu, taim ol manmeri bilong God i mekim wok bilong ol long autim tok ol man i save birua long ol na i laik paitim ol. Planti taim ol i autim tok long ol taun em pasin bilong lotu long ol god giaman, pasin pamuk, na sakim lo i bikpela tru. Tasol maski i olsem, ol i strongim bel na bihainim pasin bilong aposel Pol, em i ‘no surik long autim tok long ol bung bilong ol manmeri na long olgeta haus’ long taun Efesus. (Aposel 20:20) Na olsem Pol, ol tu i amamas taim ol i lukim olsem “tok bilong Bikpela i wok strong long ol manmeri, na i kamap strong long laip bilong ol.”​—Aposel 19:20.

[Piksa long pes 30]

Ol pipia ston bilong haus bung bilong Efesus