Askim

Bilong wanem Pol i tok long ol meri marit Kristen olsem: “Ol meri i ken mekim wok bilong karim pikinini. Ol i mekim olsem, . . . orait God bai i kisim bek ol”?​—1 Timoti 2:15.

Ol tok klostu long dispela ves i kamapim wanem samting bilong helpim yumi long kliagut long dispela tok bilong Pol? Holi spirit i stiaim Pol na em i bin toktok long wok bilong meri Kristen insait long kongrigesen. Em i tok: “Mi laik bai ol meri i mas putim ol gutpela klos samting, inap tasol long ol. Ol i no ken hambak na bilasim gras na skin bilong ol long ol kain kain bis na bilas gol na ol klos i dia tumas. Nogat. Ol meri i laik bihainim tok bilong God, ol i mas mekim ol kain kain gutpela wok. Dispela em i bilas tru bilong ol.” (1 Timoti 2:​9, 10) Pol i laik kirapim ol sista Kristen bilong em long skelim gut ol bilas ol i laik putim, na ‘bilasim’ ol yet long pasin bilong mekim ol gutpela wok.

Bihain, Pol i stori long pasin God i bin putim bilong bosim kongrigesen, na em i tok: “Mi no save larim ol meri i bosim ol man na i skulim ol long tok bilong God. Nogat. Ol meri i mas pasim maus na harim tok tasol.” (1 Timoti 2:​12; 1 Korin 11:3) Bilong kamapim as bilong dispela pasin, em i tok Adam i no bilipim tok giaman bilong Satan, tasol Iv “i bilipim tok giaman, na em i mekim sin.” Wanem samting bai helpim meri Kristen na bai em i no mekim wankain rong olsem Iv? Pol i tok: “Tasol ol meri i ken mekim wok bilong karim pikinini. Ol i mekim olsem, na sapos ol i bilip long Krais oltaim na givim laip bilong ol long em na i stap holi, na sapos ol i bihainim pasin bilong laikim tru ol arapela, na sapos ol i bihainim ol gutpela pasin, orait God bai i kisim bek ol.” (1 Timoti 2:​14, 15) Dispela tok bilong Pol i makim wanem?

Tok bilong sampela man bilong tanim tok i makim olsem meri i mas mekim wok bilong karim pikinini bambai God i ken kisim bek em. Tasol tok bilong Pol i no makim olsem. Planti skripsa i soim olsem bilong God i ken kisim bek wanpela man o meri, em i mas kisim save long Jehova, bilip long Jisas, na kamapim bilip, olsem mekim ol wok i kamapim dispela bilip. (Jon 17:3; Aposel 16:​30, 31; Rom 10:10; Jems 2:​26) Na tu, tok bilong Pol i no makim olsem sapos meri i bilip, em bai stap gut taim em i karim pikinini. Planti meri i bin stap gut taim ol i karim pikinini, maski ol i bilip o nogat. Na sori tru, sampela i bin dai taim ol i karim pikinini, maski ol i bilip o nogat.​—Stat 35:​16-​18.

Sampela tok moa bilong Pol long ol meri long dispela pas i helpim yumi long save tok bilong em i makim wanem. Pol i tok long sampela meri i yangpela liklik, em man bilong ol i dai pinis, olsem: “[Ol i] les na raun nabaut long ol arapela haus. Na ol i no mekim lespasin tasol. Nogat. Ol i save laikim tumas long harim tok long ol samting ol arapela manmeri i mekim na ol i raun na tok baksait long ol. Olsem na ol i mekim planti tok i no stret long yumi mekim.” Pol i tok i gutpela ol i mekim wanem? Em i tok: “Olsem na mi ting mobeta ol meri i yangpela liklik ol i mas marit gen na karim pikinini na bosim haus bilong ol. Sapos ol i mekim olsem, orait bai i no gat wanpela birua inap lukim pasin ol i mekim na tok nogut long yumi.”​—1 Timoti 5:​13, 14.

Pol i kamapim gutpela wok em meri i ken mekim insait long famili. Sapos meri i mekim ol wok olsem “karim pikinini na bosim haus bilong ol,” na em i ‘bilip na i stap holi na laikim tru ol arapela na bihainim ol gutpela pasin,’ bai em i no kirap bihainim ol pasin i no gutpela, nogat. Em bai stap gut long ol samting bilong spirit. (1 Timoti 2:​15) Dispela bai helpim planti yangpela meri long abrusim ol trap bilong Satan.

Tok Pol i givim long Timoti i kirapim yumi olgeta, ol man na meri, long tingim olsem yumi mas mekim gutpela wok long taim bilong yumi. Tok Bilong God i tokim olgeta Kristen: “Yupela i mas lukaut gut long wokabaut bilong yupela. Yupela i no ken wokabaut olsem man i no gat save. Nogat. Yupela i mas wokabaut olsem man i gat save.”​—Efesus 5:​15.