Ol Menonait i Laik Painim Tok i Tru Bilong Baibel

LONG wanpela moningtaim long Novemba 2000, sampela misineri bilong ol Witnes Bilong Jehova long Bolivia i lukluk i go ausait long windo bilong haus na ol i lukim sampela man na meri i sanap long geit. Taim ol misineri i opim geit, ol dispela lain i tok, “Mipela i laik painim tok i tru bilong Baibel.” Dispela lain em ol Menonait. Ol man i werim ovarol, na ol meri i pasim blakpela laplap long klos bilong ol, na ol i toktok wantaim long tok ples Jeman. Ol i luk olsem ol i pret. Ol i wok long sekim olsem wanpela i bin bihainim ol i kam o nogat. Taim ol i wokabaut i go antap long ol step bilong haus, wanpela yangpela man i tok, “Mi laik save long ol lain i save kamapim nem bilong God.”

Taim ol i go insait pinis na ol misineri i givim liklik kaikai na kol dring long ol, bel bilong ol i stap isi. Ol i bin kam long wanpela longwe hap we ol man i mekim wok olsem fama. Inap 6-pela yia pinis ol i wok long kisim nius Wastaua long rot bilong posofis. Ol i askim olsem: “Mipela i bin ritim tok olsem bihain bai i gat paradais long graun. Dispela tok i stret?” Ol Witnes i soim ol long tok bilong Baibel i bekim dispela askim bilong ol. (Aisaia 11:9; Luk 23:​43, NW; 2 Pita 3:​7, 13; KTH 21:​3, 4) Wanpela fama i tokim ol narapela: “Lukim! Dispela tok i tru. Paradais bai kamap long graun.” Ol narapela i tok: “Ating yumi painim pinis tok i tru.”

Ol Menonait ol i husat? Ol i gat wanem ol bilip? Bilong bekim ol dispela askim, yumi mas stori long ol samting i bin kamap olsem 450 yia i go pinis.

Ol Menonait i Husat?

Inap 450 yia samting i go pinis, ol i mekim bikpela wok long tanim tok bilong Baibel na prinim Baibel long tok ples bilong ol man nating bilong Yurop, na dispela i mekim na planti man long Yurop i laik stadi long Baibel. Martin Luther na sampela lain moa i bin sakim planti tok bilong Misin Katolik. Tasol ol nupela lotu Talatala i kamap, ol i holim yet planti pasin bilong lotu i no stap long Baibel. Wanpela i olsem: Ol i ting olgeta nupela bebi i mas kisim baptais bilong makim ol i bilong dispela lotu. Tasol sampela man em ol i laik painim tok i tru bilong Baibel ol i kisim save olsem, bilong go insait long kongrigesen Kristen, pastaim man i mas kisim save long Baibel na bihain em i pasim tok long bel olsem em bai kisim baptais. (Matyu 28:​19, 20) Ol man i givim bel long autim tok na ol i holim dispela bilip, ol i kirap raun long ol taun na ples na ol i skulim ol man long Baibel na givim baptais long ol manmeri i bikpela pinis. Olsem na ol man i kolim ol olsem Anabaptis, insait bilong en i olsem “baptais gen.”

Wanpela pris Katolik, em Menno Simons bilong ples Witmarsum long hap not bilong Netelan, em i laik painim tok i tru na em i bung wantaim ol Anabaptis. Long 1536 em i rausim nem bilong em long misin na nau ol bikman bilong misin i wok long painim em. Long 1542, Empera Charles Namba 5 i tok promis long givim mani olsem 100 gilda long man i painim Menno na bai ol i ken kotim em. Tasol maski ol i laik mekim olsem, Menno i kirapim pasin bilong bung wantaim namel long sampela Anabaptis. I no longtaim na em wantaim ol lain bilong em i kisim nem olsem ol Menonait.

Ol Menonait Long Nau

Bihain ol Menonait i karim hevi long ol man i mekim nogut long ol, olsem na planti tausen i lusim Westen Yurop na ol i ranawe i go long Not Amerika. Long dispela hap ol i gat rot long painim tok i tru na autim tok long planti man. Tasol planti ol i lusim pasin bilong ol tumbuna bilong ol long givim bel tru long stadi long Baibel na autim tok. Planti ol i holimpas sampela bilip i no stap long Baibel, olsem God Triwan, na man i gat sampela samting i stap laip yet taim bodi i dai, na helpaia. (Saveman 9:5; Esekiel 18:4; Mak 12:29) Long nau, bikpela wok ol misineri bilong ol Menonait i mekim em long sait bilong haus sik na wok bilong helpim sindaun bilong ol man, na ol i no tingting tumas long autim gutnius.

Long nau i gat klostu 1,300,000 Menonait i save sindaun long 65 kantri. Tasol ol Menonait bilong nau i lukim olsem ol i no save stap wanbel, olsem Menno Simons i bin lukim inap planti handet yia i go pinis. Long taim bilong Wol Woa 1 ol i gat narapela narapela tingting long ol pait bilong graun, na dispela i mekim na ol i bruk bruk. Planti long Not Amerika i tingim tok bilong Baibel na ol i no orait long go insait long ami. Tasol buk An Introduction to Mennonite History i tok: “I kam inap long 1914, ol lain bilong lotu Menonait long Westen Yurop i lusim pinis bilip bilong ol olsem ol i no ken insait long ol pait bilong graun.” Long nau sampela Menonait i kisim ol pasin bilong ol lain bilong nau. Tasol sampela i holim yet ol pasin bilong bipo​—⁠olsem mekim wok long ol liklik huk bilong pasim klos, na maski long yusim ol baten, na ol i bilip olsem ol man i no ken sevim mausgras bilong ol.

Sampela Menonait ol i strong long i stap narapela kain long ol lain bilong graun, olsem na ol i go sindaun long ol hap em gavman i orait long ol i ken bihainim ol pasin bilong ol yet. Long Bolivia, inap olsem 38,000 Menonait i bikpela pinis em ol i sindaun long planti longwe hap long ol komiuniti bilong ol yet, na ol wan wan komiuniti i gat ol lo bilong ol yet long bihainim. Sampela i tambuim ol ka samting, na ol man i ken raun long hos tasol na ol wilka em hos i pulim. Sampela komiuniti bilong ol i save tambuim redio, TV, na musik. Na sampela i tambu long lainim tok ples bilong kantri ol i sindaun long en. Wanpela man bilong komiuniti i tok: “Ol hetman bilong lotu i no larim mipela i lainim tok Spen, long wanem, ol i laik bosim strong mipela.” Planti ol i pilim olsem ol hetman bilong ol i daunim ol na ol i save pret, nogut ol hetman i rausim ol long komiuniti​—⁠em samting nogut tru long man i no bin sindaun na mekim wok namel long ol lain bilong ausait.

Tok i Tru i Kamap Long Ol

Long wanpela komiuniti olsem, wanpela fama bilong lain Menonait, nem bilong em Johann, em i lukim wanpela nius Wastaua long haus bilong neiba bilong em. Famili bilong Johann i bin lusim Kanada na i go long Meksiko na bihain ol i go sindaun long Bolivia. Tasol oltaim Johann i wok long painim tok i tru bilong Baibel. Em i askim neiba long em i ken kisim dispela Wastaua.

Bihain Johann i go long taun bilong maketim ol kaikai bilong em na em i go toktok long wanpela meri Witnes i tilim ol Wastaua long maket. Meri i salim em i go long wanpela misineri i save mekim tok Jeman, na i no longtaim na Johann i kisim ol Wastaua long tok Jeman long rot bilong posofis. Em i stadi gut long olgeta wan wan Wastaua na bihain em i givim long ol wan wan famili long komiuniti i go inap long taim ol dispela nius i bruk pinis. Sampela famili ol i save bung wantaim na stadi long wanpela Wastaua i go inap biknait, na ol i ritim ol ves bilong Baibel i stap long en. Johann i bilip tru olsem ol Witnes Bilong Jehova tasol i stap wanbel long mekim laik bilong God long olgeta hap. Paslain long em i dai, Johann i tokim meri pikinini bilong em: “Oltaim yupela i mas ritim Wastaua. Em bai helpim yupela long kliagut long ol tok bilong Baibel.”

Sampela long famili bilong Johann i kirap toktok wantaim ol neiba long ol tok bilong Baibel ol i lainim. Ol i tok: “God i no inap bagarapim graun, nogat. Em bai mekim i kamap wanpela paradais. Na God i no save givim pen long ol man long hel.” I no longtaim na ol hetman bilong lotu bilong ol Menonait i harim ol dispela tok na ol i tokim famili bilong Johann olsem ol bai rausim ol long sios sapos ol i wok yet long autim ol dispela kain tok. Bihain famili i bung wantaim na toktok long ol hevi ol dispela elda bilong ol Menonait i putim long ol, na wanpela yangpela man i kirap na i tok: “Olsem wanem na yumi toktok planti long ol elda bilong lotu bilong yumi? Yumi olgeta i save wanem lotu i tru na yumi no mekim wanpela samting long dispela.” Papa bilong yangpela man i pilim tru tok bilong em. I no longtaim na long pasin hait tenpela bilong dispela famili ol i go bilong painim ol Witnes Bilong Jehova, na bihain ol i kamap long haus bilong ol misineri olsem pastaim yumi stori long en.

Long de bihain, ol misineri i go lukim ol nupela pren bilong ol long komiuniti. Ka bilong ol misineri tasol i ran long rot​—⁠i no gat narapela. Ol i draiv isi i go na abrusim ol wilka em hos i pulim, na ol i lukluk long ol asples, na ol asples i kirap nogut long ol dispela misineri. Bihain liklik ol misineri i sindaun long tebol wantaim 10-pela Menonait, em tupela famili.

Long dispela de ol i lusim 4-pela aua long stadi long sapta 1 bilong buk Save i Bringim Man Long Laip Oltaim.a Long olgeta wan wan paragraf, ol fama i ritim ol narapela skripsa bilong Baibel i no stap long buk, na ol i laik save, ol i kisimgut as bilong ol tok bilong en o nogat. Taim ol misineri i kamapim askim bilong wanpela paragraf, ol fama i toktok namel long ol yet long tok Jeman, na bihain wanpela i stap olsem maus bilong ol na bekim dispela askim long tok Spen. Em wanpela de ol i no inap lusim tingting long en, tasol taim nogut i laik painim dispela lain. Sampela bikpela hevi bai kamap long ol, olsem i bin kamap long Menno Simons taim em i kirap long painim tok i tru bilong Baibel inap sampela handet yia i go pinis.

Karim Hevi Long Holimpas Tok i Tru

Sampela de bihain, ol elda bilong lotu Menonait i kam long haus bilong famili bilong Johann na ol i givim strongpela tok long ol manmeri i laik save long tok bilong ol Witnes Bilong Jehova. Ol i tok: “Mipela i harim olsem ol Witnes Bilong Jehova i bin kam lukim yupela. Yupela mas tambuim ol long kam bek, na givim ol buk na nius bilong ol long mipela na bai mipela i kukim long paia, sapos nogat, bai mipela i rausim yupela.” Ol i bin stadi long Baibel wantaim ol Witnes inap wanpela taim tasol, olsem na dispela em i wanpela bikpela traim tru.

Papa bilong wanpela famili i tok: “Mipela i no inap mekim olsem yupela i tok. Ol dispela lain i bin kam bilong skulim mipela long Baibel.” Orait ol elda i mekim wanem? Ol i rausim ol, long wanem, ol i bin stadi long Baibel! Dispela em wanpela bikpela hevi tru i kamap long ol. Wilka bilong faktori bilong komiuniti long wokim sis i abrusim haus bilong wanpela famili na i no kisim susu bilong bulmakau ol i bin putim ausait bilong salim, dispela famili i no gat narapela rot bilong kisim liklik mani. Ol i rausim wanpela papa bilong famili long wok mani bilong em. Na ol i rausim narapela long stua bilong komiuniti, na pikinini meri bilong em i gat 10-pela krismas, ol i rausim em long skul. Ol neiba i banisim wanpela haus bilong kisim meri bilong wanpela yangpela man; ol i tok em i no inap sindaun moa wantaim man bilong em ol i rausim pinis. Tasol maski ol dispela hevi i kamap, ol famili i bin stadi long Baibel ol i no les na lusim wok bilong painim tok i tru.

Ol misineri i wok yet long raun longwe long ka long olgeta wik bilong kam na mekim Baibel stadi wantaim ol. Ol dispela stadi i strongim tru ol dispela famili! Sampela bilong ol dispela famili i raun inap tupela aua long wilka em hos i pulim na bai ol i ken insait long stadi. Taim ol famili i askim ol misineri long mekim beten long namba wan taim, bel bilong ol i pilim tru. Long ol dispela komiuniti, ol Menonait i no save beten long maus, olsem na ol i no bin harim wanpela man i mekim beten bilong ol. Aiwara i pulap long ai bilong ol man. Na ol i kirap nogut tru taim ol misineri i kisim wanpela liklik masin bilong pilaim kaset i kam. I gat tambu long harim musik long komiuniti bilong ol. Ol i amamas tru long harim ol naispela singsing bilong Kingdom, olsem na ol i tok ol i laik mekim wanpela singsing bihain long olgeta stadi! Tasol olsem wanem ol inap winim dispela bikpela hevi i kamap long sindaun bilong ol?

Ol i Painim Gutpela Lain Brata

Ol dispela famili i raus long komiuniti, olsem na ol yet i kirap na wokim sis. Ol misineri i helpim ol long painim ol man bilong baim. Wanpela Witnes bilong longtaim long Not Amerika em i bin i go bikpela long wanpela komiuniti Menonait long Saut Amerika na em i harim stori bilong bikpela hevi i bin painim ol dispela famili. Em i gat bikpela laik tru long helpim ol. Long dispela wik yet em i kisim balus na i go long Bolivia bilong lukim ol. Em i givim gutpela tok long ol bilong strongim ol long ol samting bilong spirit, na tu, em i helpim ol dispela famili long baim wanpela trak bambai ol i ken kisim ol lain i stadi long Baibel na go long ol miting long Haus Kingdom, na karim ol kaikai samting bilong fam i go long maket.

Wanpela long famili i tingim dispela na em i tok: “Taim ol i rausim mipela long komiuniti, dispela i givim hatwok long mipela. Taim mipela i raun i go long Haus Kingdom mipela i bel hevi, tasol taim mipela i kam bek bel bilong mipela i amamas tru.” Na tru tumas, ol Witnes bilong dispela hap i helpim ol gut. Sampela i lainim tok Jeman, na sampela Witnes i mekim tok Jeman ol i lusim Yurop na i kam sindaun long Bolivia bilong helpim ol Witnes long mekim ol miting Kristen long tok Jeman. I no longtaim na 14 manmeri long dispela komiuniti bilong ol Menonait ol i kirap autim gutnius bilong Kingdom long ol man.

Long Oktoba 12, 2001, klostu wanpela yia bihain long namba wan taim ol i bin go lukim ol misineri, 11-pela bilong ol dispela manmeri pastaim ol i bilong lain Anabaptis ol i kisim baptais gen, tasol dispela baptais i bilong makim olsem ol i dediketim laip bilong ol long Jehova. Bihain i gat sampela moa i kisim baptais. Wanpela i tok: “Taim mipela i kisim save pinis long tok i tru bilong Baibel, mipela i pilim olsem mipela i bin i stap kalabus na nau mipela i kamap fri.” Narapela i tok: “Planti Menonait i tok i no gat pasin bilong laikim tru ol narapela insait long komiuniti bilong ol. Tasol ol Witnes Bilong Jehova i save tingim ol narapela insait long lain bilong ol. Mi save stap bel isi namel long ol.” Sapos yu wok long painim gutpela save long tok i tru bilong Baibel, ating i gat sampela hevi bai painim yu tu. Tasol sapos yu askim Jehova long helpim yu na yu bilip na yu gat strongpela bel olsem ol dispela famili, orait yu tu bai painim tok i tru na bai yu stap amamas.

[Futnot]

[Piksa long pes 25]

Ol i amamas long kisim ol nius bilong Baibel long tok Jeman

[Piksa long pes 26]

Maski ol i gat tambu long harim musik, nau ol i save mekim singsing bihain long olgeta Baibel stadi