Askim

I gat wanem as na ol dispela hap tok olsem “em wanpela tasol i no inap i dai” na “i no gat wanpela man i bin lukim Em, o inap lukim Em,” i makim Jisas na i no makim God Jehova?

Aposel Pol i tok: “Long ol taim bilong Em yet, Em bai soim husat God i blesim na husat wanpela i stap Bosman tru na King bilong ol king na Bikpela bilong ol bikpela. Em wanpela tasol i no inap i dai. Em i stap long lait i no gat wanpela man inap i go klostu long dispela. I no gat wanpela man i bin lukim Em, o inap lukim Em.”​—⁠1 Timoti 6:​15, 16, King Jems Nupela Testamen.

Ol man bilong kamapim as bilong ol tok bilong Baibel, ol i tok: ‘Ol dispela hap tok olsem “em wanpela tasol i no inap i dai,” na em “wanpela i stap Bosman tru,” na “i no gat wanpela man i bin lukim Em, o inap lukim Em,” olsem wanem ol dispela hap tok inap makim narapela man na i no makim God i Gat Olgeta Strong?’ Tru, ol kain tok olsem inap makim Jehova. Tasol ol narapela tok i stap klostu i makim olsem long 1 Timoti 6:​15, 16, Pol i stori long Jisas.

Long pinis bilong ves 14 (King Jems Nupela Testamen), Pol i tok olsem “taim yu lukim Bikpela bilong yumi Jisas Kraist.” (1 Timoti 6:14) Olsem na long ves 15, taim Pol i tok “long ol taim bilong Em yet, Em bai soim husat God i blesim na husat wanpela i stap Bosman tru,” em i tok long Jisas, na em i no tok long God Jehova. Sapos olsem, orait husat em “wanpela i stap Bosman tru”? I stret long yumi ken tok olsem Jisas em i dispela Bosman em Pol i toktok long en. Bilong wanem? Ol narapela tok i stap klostu i kamapim klia olsem Pol i skelim Jisas wantaim ol king bilong graun. Pol i tok, Jisas em i “King bilong ol king [bilong graun] na Bikpela bilong ol bikpela [bilong graun].”a Yes, taim yumi skelim Jisas wantaim ol king bilong graun, Jisas tasol em “wanpela i stap Bosman tru.” Jisas i bin kisim “strong na biknem . . . na olgeta manmeri bilong olgeta kantri na olgeta lain na olgeta tok ples bai i stap aninit long en.” (Daniel 7:14) I no gat wanpela king bilong graun inap tok olsem!

Olsem wanem long dispela hap tok “em wanpela tasol i no inap i dai”? Long dispela ves tu, Pol i skelim Jisas wantaim ol king bilong graun. I no gat wanpela bilong ol dispela king inap tok olsem em i no inap i dai, nogat, Jisas tasol inap mekim dispela tok. Pol i tok: “Yumi save, Krais i kirap bek pinis long matmat, olsem na bai em i no ken i dai moa. Dai i no gat strong moa bilong daunim em.” (Rom 6:⁠9) Olsem na Jisas em i namba wan man Baibel i stori long em olsem em i bin kisim dispela laip i no inap long bagarap. Tru tumas, long taim Pol i raitim dispela tok, Jisas wanpela tasol i bin kisim pinis dispela kain laip.

Yumi mas tingim tu olsem em bai i no stret sapos Pol i tok olsem God Jehova wanpela tasol i gat laip i no inap long bagarap, long wanem, long taim Pol i bin raitim dispela tok, Jisas tu i bin kisim pinis dispela kain laip. Tasol Pol inap tok Jisas wanpela tasol i gat laip i no inap long bagarap taim em i skelim Jisas wantaim ol king bilong graun.

Na tu, taim Jisas i kirap bek na i go bek pinis long heven, i stret long tok olsem “i no gat wanpela man i bin lukim Em, o inap lukim Em.” Tru, ol disaipel em God i bin makim ol long holi spirit, ol bai lukim Jisas taim ol i dai na kirap bek na i go long heven long bodi spirit. (Jon 17:24) Tasol i no gat wanpela man i stap long graun inap lukim Jisas taim em i stap long heven. Olsem na yumi inap tok tru olsem taim Jisas i kirap bek na i go bek pinis long heven, “i no gat wanpela man” i bin lukim em.

Tru, taim yumi lukim tok bilong 1 Timoti 6:​15, 16 long namba wan taim, yumi inap ting olsem dispela skripsa i stori long God. Tasol ol narapela tok bilong Pol​—⁠na ol narapela skripsa bilong Baibel​—⁠i makim olsem Pol i stori long Jisas.

[Futnot]