Ol Man i Dai Pinis, Ol i Stap Laip Yet? God i Tok Wanem?
LIKLIK balus i lusim wanpela taun long hap bilong saut long Afrika na i go antap. Kepten bilong balus wantaim liklik pikinini meri bilong em i gat 12-pela krismas, tupela tasol i stap long balus. Tupela i laik i go long wanpela taun i stap longwe inap 400 kilomita. Tasol long rot balus i pundaun na i bagarap na papa wantaim pikinini tupela i dai pinis.
Betty, em meri bilong dispela man na mama bilong dispela pikinini, em i tok: “God Jehova tasol i save long bikpela pen na bel hevi bilong mi na long hatwok bilong mi long karim dispela hevi.” Olsem wanem em inap karim dispela hevi? Betty i tok: “Oltaim mi beten askim God long helpim mi na strongim mi bambai mi inap karim dispela hevi na helpim ol narapela tu long karim.” Ol tok bilong God long ol samting i painim ol man i dai pinis na tok promis bilong God long kirapim bek ol man i dai pinis, dispela i bin strongim bel bilong Betty.
God i tok wanem long ol samting i painim man i dai pinis? Baibel i tok: “Ol man i dai pinis ol i no save long wanpela samting.” (Eklisiastis 9:5, NW ) Olsem na ol man i dai pinis ol i dai tru. Em tasol. Orait, olsem wanem na planti man i bilip olsem ol man i dai pinis ol i stap laip yet? Wanpela tok giaman bilong bipo yet i giamanim ol!
I Giamanim Ol Man long Olgeta Hap Bilong Graun
Namba wan tok giaman i as bilong dispela bilip bilong ol man long nau. Long hap bilong Jenesis Baibel i stori long dispela samting, olsem: “Tasol yu no ken kaikai pikinini bilong dispela diwai bilong mekim man i ken save long wanem samting i gutpela na wanem samting i nogut. I tambu tru long yu kaikai pikinini bilong dispela diwai. Sapos yu kaikai bambai yu dai.” (Jenesis 2:17) God Jehova i mekim dispela tok long namba wan man, em Adam. Orait, nau skelim dispela tok wantaim tok bilong Jenesis 3:1-4, em tok Seten i mekim long Iv long maus bilong snek. Em i kirapim Iv long mekim pasin bikhet long God, em i tok: “Yutupela i no ken dai.” Dispela tok i pait wantaim tok bilong God. Olsem na Seten i mekim namba wan tok giaman; em i kamap “man bilong tok giaman, na em i papa tru bilong pasin bilong tok giaman.”−Jon 8:44; Revelesen 12:9.
Tasol Adam tupela Iv i dai pinis, na planti milion milion man moa ol i bin i dai. Orait, man bilong tok giaman, em Seten, em i mekim wanem bilong karamapim dispela? Bihain em i kirapim dispela tingting olsem taim man i dai, skin tasol i dai, na wanpela samting insait long man, olsem tewel samting, em i stap laip yet. Dispela tingting i kamap wanpela bilip bilong ol olpela lotu, na ol saveman bilong Grik i bihainim dispela tingting. Olsem na long olgeta hap bilong graun, klostu olgeta man i bilip olsem yumi gat tewel na taim yumi dai, skin tasol i dai na tewel i stap laip yet. Planti man i bilip olsem ol famili bilong ol i dai pinis ol i stap laip yet long narapela hap, olsem long wanpela ples spirit, na ating dispela i mekim gut bel bilong ol. Tasol bikpela askim, em olsem: Tru yumi gat tewel na tewel i no save dai o nogat?
Yumi No Gat Tewel
Tripela taim, long hap bilong Nupela Testamen, Baibel i tok long man “i no save dai.” Na sapos yumi skelim ol dispela tok bai yumi save, yumi no gat tewel; yumi save dai tru.
Long 1 Timoti 6:15, 16 (NW ) aposel Pol i stori long Krais Jisas na em i tok: “Em i King bilong ol king, na Bikpela bilong ol bikpela. Em wanpela tasol i no save dai.” Orait, olsem wanem Jisas i narapela kain long olgeta narapela “king” na “bikpela”? Long wanem em wanpela tasol “i no save dai.” Ol narapela “king” na “bikpela” ol i save dai.
Tru, Baibel i tok ol manmeri God i singautim ol bilong mekim wok king wantaim Krais long heven, God i tok promis long givim laip tru long ol long heven na ol i no inap bagarap. (1 Pita 1:3, 4) Olsem na long 1 Korin 15:53, 54 Baibel i tok: “Dispela bodi i save dai, em i mas senis na stap laip oltaim. Tru, . . . dispela bodi i save dai, em bai i senis na i stap laip oltaim. Long dispela taim tok bilong Baibel i kamap tru. Baibel i tok olsem: ‘God i winim pait na i daunim dai na pinisim olgeta.’ ” Baibel i tok ol man i kisim dispela kain laip i stap oltaim, ol i mas “senis” bambai ol inap kisim. Dispela kain laip em i prais God i givim long ol Kristen em i makim ol na ol i stap gut long em. Yumi no kisim nating long rot bilong papamama taim yumi kamap long graun. Nogat.
Na Baibel i no tok yumi gat tewel o God i bin givim tewel long yumi. Nogat. Baibel i tok: “Yawe God i kisim graun na em i wokim man long en. Na em i winim win bilong laip i go insait long nus bilong dispela man, na man i kamap laip.” (Jenesis 2:7; skelim wantaim 1 Korin 15:45.) Baibel i tok yumi gat laip; i no tok yumi gat tewel.
Dispela kain laip, olsem i no save dai, God i no givim long olgeta manmeri. Baibel i tok klia, man i dai em i dai tru na em i no i stap moa. “Man i mekim rong, em bai i dai.” (Esikiel 18:4, NW ) “Olgeta man i no laik harim tok bilong dispela profet, bai God i kilim ol i dai. Ol i no ken i stap moa insait long Isrel.”−Aposel 3:23.
Yumi no gat tewel, olsem na taim yumi dai, wanem samting i painim yumi? Yumi save “slip” na long rot bilong ofa bilong Krais yumi inap long kirap bek. (1 Korin 15:22) Taim Lasaras i dai, Jisas i tok: “Pren bilong yumi Lasaras i slip pinis. Tasol mi go kirapim em.” Na bihain em i tok: “Lasarus i dai pinis.” (Jon 11:11-14) Ol man i dai pinis, sapos ol i slip, orait . . .
Ating Bai Ol i Kirap Bek?
Lukim bikpela lain manmeri i bung klostu long wanpela hul bilong ston long Betani, klostu long Jerusalem. Jisas i stap na Maria wantaim Mata, em tupela susa bilong Lasaras. Lasaras i dai pinis na ol i planim em long dispela hul na pasim maus bilong hul long bikpela ston. Jisas i tok: “Yupela tekewe dispela ston.” Tasol Mata i tok: “Bikpela, em i dai na 4-pela de i go pinis. Olsem na smel nogut i kamap nau.” Jisas i beten na bihain em i singaut strong na em i tok: “Lasaras, yu kam ausait!” Na dispela man Lasaras i lusim matmat i kam ausait! (Jon 11:38-44) Olaman! Dispela bikpela lain manmeri ol i kirap nogut na ol i amamas−Maria tupela Mata i amamas tru!
Lasaras i dai pinis na i stap long matmat inap 4-pela de−sapos em i bin i stap laip yet long narapela hap, taim em i kirap bek bai em i stori long dispela samting, a? Tasol no gat sampela tok long Baibel i tok em i bin stori olsem. Olsem na yumi save, man i dai em i dai tru na em i “no save long wanpela samting,” olsem Baibel i tok.−Eklisiastis 9:5, NW.
I gat narapela man tu i bin kirap bek, i no Lasaras tasol. Jisas i go long ples Nen na em i lukim ol man i karim wanpela yangpela man i kam em i dai pinis na ol i laik planim em. Jisas i tokim dispela yangpela man: “Yangpela man, mi tokim yu, yu kirap.” Na wanem samting i kamap? “Dispela man i dai pinis, em i kirap na i sindaun, na em i stat long toktok.” (Luk 7:11-17) Taim em i kirap long toktok, em i stori long wanpela ples ol daiman i go long en, olsem wanpela ples spirit? Nogat, a? Olsem na yumi save, em i dai tasol. Em i no i go long wanpela hap.
Jisas na Pol na Pita na Ilaija na Ilaisa olgeta i bin kirapim bek man i dai pinis. Tasol ol dispela man i kirap bek long matmat−i no gat wanpela i tok taim em i dai pinis em i stap laip long narapela hap. Nogat.
Ol dispela mirakel i makim dispela wanpela rot tasol bilong planti man i dai pinis ol i ken i stap laip gen, em olsem: Taim Kingdom bilong God i bosim graun bai ol i kirap bek na i stap laip long graun. Jisas i tok: “Yupela i no ken tingting planti long dispela. Taim i laik kamap na olgeta man i stap long matmat bai ol i harim maus bilong em, na bai ol i lusim matmat na i kam ausait.” (Jon 5:28, 29) Ol manmeri i stap long graun taim Kingdom bilong Krais i bosim graun inap 1,000 yia, taim ol i lukim ol man i dai pinis ol i kirap bek, bai ol i amamas tru! Dispela gutpela taim i klostu pinis! (Revelesen 20:4, 6) Dispela tok promis olsem ol man i dai pinis bai ol i kirap bek, dispela tok yet i kamapim long ples klia olsem ol man i dai pinis ol i no i stap laip long narapela hap. Bilong kirap bek na i stap laip gen, pastaim ol i mas i dai na i no gat laip moa.
Tasol Ating Sampela i Laik Save . . .
Olsem wanem long tok bilong ol wailis bilong ol spirit na ol narapela man, em ol i tok ol i bin kisim sampela tok i kam long ol man i dai pinis? Ating dispela i makim olsem ol man i dai pinis ol i no i dai tru, ol i stap laip yet long wanpela hap? Nogat. Seten i save tru long pasin bilong giaman. Planti taim “em i kamap olsem ensel bilong lait.” (2 Korin 11:14) Em wantaim ol narapela spirit nogut ol i save giaman na makim ol man i dai pinis, na ol man i stap laip yet ol i ting, ol dispela spirit ol i spirit bilong man i dai pinis. Tasol nogat. Em ol spirit nogut na ol i giamanim ol man! Olsem na Jehova i givim lo long ol Isrel i tok klia, olsem: “Man bilong singautim wailis bilong ol spirit . . . o man bilong singautim man i dai pinis . . . Jehova i nolaik tru long ol man i mekim ol kain pasin olsem.” (Diuteronomi 18:10-12, NW ) Jehova i tok, ol man i mekim wok bilong ol spirit nogut, olsem ol glasman o man i mekim kain kain wok marila o posin, “bai ol i no kisim kingdom bilong God.”−Galesia 5:19-21; Revelesen 21:8.a
Tasol olsem wanem long ol man klostu ol i dai na ol i lukim narapela kain samting na ol i ting olsem taim yumi dai i gat wanpela samting i lusim bodi na i stap laip yet? Dispela samting i painim ol, ating em i makim olsem yumi gat tewel na taim yumi dai, tewel i lusim bodi na i stap laip yet long narapela hap? Nogat. Wanpela man bilong skelim tingting bilong ol man long Amerika (em George Gallup, Jr.) em i skelim dispela samting na em i wokim wanpela buk (Adventures in Immortality) i stori long tingting bilong sampela saveman long dispela samting. Ol i bin toktok wantaim sampela dokta na saveman bilong saiens na ol dispela man i no bilip tumas long tok bilong ol dispela man klostu ol i dai. Wanpela saveman bilong saiens long Merilan, em i tok: “Ol dispela man i lukim samting taim ol i laik i dai, as bilong en em tingting bilong ol i paul nabaut, long wanem ol i gat sik na kru samting bilong ol i no wok gut. . . . Kru bilong yumi i narapela kain tru na em inap giamanim yumi sapos yumi mekim pasin i no stret long en−tingim ol samting i save kamap long tingting bilong man taim em i kisim marasin o drak i save paulim tingting bilong man na em i lukim ol narapela kain samting olsem piksa o driman.” Na wanpela dokta bilong stretim tingting bilong man i gat sik long tingting, em i bilong Ohaio, em i tok: “Ol dispela man i driman tasol.” Na wanpela saveman bilong saiens long Misigan em i tok, “Tingting bilong ol i paul na ol i lukim sampela samting olsem piksa o driman.”
Gallup i tok, stori bilong ol man long ol samting ol i lukim taim ol i klostu i dai, “dispela i no makim olsem yumi save stap oltaim o yumi stap laip bihain long taim yumi dai. Nogat.” Em i tok moa, olsem: ‘Sik i painim ol dispela man na ating dispela samting i mekim na tingting bilong ol i paul na ol i lukim olsem piksa i kamap long tingting.’ Em i tok, sampela man bilong lotu i stori long as bilong dispela samting na ol i tok, “em wanpela wok bilong ol spirit nogut bilong giamanim ol man.” Tasol tok bilong God Jehova bilong bipo tru em i stap yet, em God i tok: “Ol man i dai pinis ol i no save long wanpela samting.”−Eklisiastis 9:5, NW.
Yu Mas Mekim Wanem?
Yu mas was gut long ol tok na tingting em namba wan tok giaman bilong Seten i as bilong en, em Seten i bin tok: “Yutupela i no ken dai.” (Jenesis 3:1-5) Yu mas bilipim tok bilong God long Baibel, em God i tok, taim man i dai, “Long dispela taim ol i no inap mekim olgeta samting ol i bin tok long mekim.” (Sam 146:4) Yu mas bilip tu long dispela tok, olsem: Ol man i dai pinis na ol i slip long matmat bai ol i kirap bek taim Kingdom bilong God i bosim graun na gutpela taim i kamap. Planti man i save beten askim God long kamapim Kingdom bilong em na long dispela gutpela taim bihain “God bai kirapim ol daiman, ol stretpela man na ol man nogut wantaim.”−Aposel 24:15; Matyu 6:9, 10.
Dispela lapun meri i gat sik, em yumi bin stori long em long namba wan tok bilong dispela Wastaua, em i amamas taim em i harim tok bilong God long ol man i dai pinis na long ol spirit nogut i save giamanim ol man. Em i bagarapim olgeta samting em i holim bilong sakim masalai na em i rausim olgeta narapela samting bilong ol spirit nogut em i holim. Mekim pinis na sampela de bihain sik bilong em i pinis na em i orait bek. Nau em i wok long helpim ol narapela man long lusim kalabus bilong ol spirit nogut.
Na dispela meri, em man bilong em wantaim pikinini bilong em i bagarap long balus, dispela tok i mekim isi bel bilong em, olsem: Ol man i dai pinis ol i no save long wanpela samting, olsem na taim ol i kirap bek, long tingting bilong ol bai i olsem wantu tasol ol i stap long paradais long graun aninit long Kingdom bilong God! Dispela meri i amamas long helpim ol narapela manmeri long save, liklik taim na “Jehova bai klinim aiwara i stap long pes bilong olgeta man.” (Aisaia 25:8, NW ) Em i wetim dispela taim bihain, taim ol famili bilong em i kirap bek na i stap laip gen.
[Futnot]
a Lukim tu buklet Ol Spirit Yumi No Inap Lukim−Ol i Save Helpim Yumi? o Ol i Bagarapim Yumi?