Ol Man i Dai Pinis, Ol i Stap Laip Yet? Ol Man i Tok Wanem?
LAPUN meri blakskin i wokabaut olsem em i gat sik. Lek bilong em i pen nogut tru. Ol hap hap retpela graun malumalum i pas long gras bilong em na em i pasim hap laplap long het; long han na long lek em i pasim planti samting bilong sakim masalai. Bilong wanem em i pasim ol dispela samting? Inap 50 yia em i bilip olsem tewel bilong ol tumbuna i stap insait long em na mekim nogut long em. Ol “dokta bilong ples” i tok em i mas putim graun malumalum long gras na pasim hap laplap long het na pasim planti samting bilong sakim masalai bambai em i ken “orait bek.”
Yu ting wan wan man tasol i gat kain bilip olsem? Nogat! Long hap bilong Afrika na long ol narapela hap tu, planti planti man i bilip olsem ol tumbuna i dai pinis ol i gat strong “bilong lukautim lain tumbuna pikinini bilong ol, o bilong givim strafe long ol, olsem givim liklik sik long ol o mekim wanpela samting nogut i kamap long ol.” (Buk African Heritage) Ating as bilong dispela bilip i wankain olsem as bilong bilip bilong ol man bilong lotu long hap bilong yu. Olsem wanem?
Ol Hindu na ol man bilong sampela narapela lotu ol i bilip olsem taim yumi dai, hap samting bilong yumi, olsem tewel samting, i save stap laip yet na bai i kamap nupela gen long narapela skin. Ol man i bilip long ol spirit ol i ting ol inap toktok wantaim ol man i dai pinis long rot bilong ol wailis bilong ol spirit. Misin Katolik i lainim ol man olsem planti man i dai pinis ol i go long klinpaia (pegatori) pastaim bambai paia i ken klinim sin bilong ol na bihain ol inap i go i stap long heven, na ol man nogut ol i go long bikpaia (hel). Planti Talatala i bilip olsem ol gutpela man i go long heven na ol man nogut i kisim pen long bikpaia. Planti man i bilip tru olsem Baibel i as bilong ol dispela tok. Sampela man, klostu ol i dai, ol i bin lukim sampela samting na ol i ting olsem bihain long taim man i dai em i stap laip long narapela hap. Ol dispela man i bilip tru olsem i gat wanpela samting insait long skin bilong yumi olsem tewel na taim yumi dai dispela samting i save kam ausait na i stap laip yet.
Ol misin i gat kain kain tingting long ol samting i painim man i dai pinis na long ples ol man i dai pinis i go long en, tasol olgeta i bilip olsem ol man i dai pinis ol i stap laip yet long narapela hap.
Dai em i birua nogut bilong yumi. Dai i save painim ol man bilong olgeta lain−ol rabisman na ol maniman, ol yangpela na ol lapun. Olsem Baibel i tok: “Yupela i olsem smok i save kamap na i stap liklik taim tasol na i pinis.” (Jems 4:14) Long olgeta de sampela manmeri i dai pinis, na ol man i bin laikim tumas ol ol i bel hevi i stap.
Olsem na planti man i laik save: ‘Ol man i dai pinis ol i go we? Ol i dai tru o ol i stap laip yet long narapela hap? Bai yumi inap lukim ol gen? Yumi inap painim we bekim stret bilong ol dispela askim?