Yu Ting Ol Daiman Inap Helpim Ol Man i Stap Laip?

TAMBA, wanpela yangpela man long Wes Afrika, i laik mekim eksem long skul.a Mama bilong em i strong long em i mas kisim helpim long ol wanblut i dai pinis bambai em i ken wokim gut eksem. Long Palermo, Sicily, ol turis i go lukim ol ples matmat i stap aninit long graun we i gat planti handet bodi em ol man i bin putim marasin long ol bambai ol i no ken bagarap na ol man i ken lukim. Sampela i bilip olsem ol dispela bodi i lukautim ol man i stap laip. Long olgeta yia, ol manmeri i save go visitim Lily Dale, em wanpela taun long westen New York State, Amerika. Dispela taun i gat nem long planti glasman tru i stap long en. Ol man i kam long dispela hap ol i gat laik long toktok wantaim ol wanblut o ol pren i dai pinis na kisim helpim long ol.

Long olgeta hap bilong graun, i gat ol man i bilip olsem ol daiman inap helpim ol man i stap laip. Yu gat wanem tingting long dispela? Ating sampela i bin skulim yu long kain bilip olsem, o famili o pren bilong yu i gat dispela bilip. Yumi gat bikpela laik long lukim gen ol famili na ol pren i dai pinis. Ol glasman i tok promis long helpim yumi long mekim olsem. Nius Time i kamapim tok bilong wanpela glasmeri, em i tok, ol spirit “i save redi i stap oltaim sapos wanpela i singaut long kisim helpim.” Olsem wanem? Dispela em i tru? Tru tru ol daiman inap helpim ol man i stap laip? Ating bai yu kirap nogut long tok Baibel i mekim long dispela.

Yu Ting Ol Daiman i Stap Laip Long Sampela Hap?

Taim Baibel i stori long wanem samting i painim ol man i dai pinis, tok bilong en i klia na isi long kisimgut. Lukim tok bilong Saveman 9:​4, 5: “Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting.” Yu ting ol daiman inap pilim sampela samting? Ves 6 i tok: “Taim ol manmeri i dai, laik na kros na mangal bilong ol i pinis olgeta, na ol dispela manmeri i no inap mekim wanpela samting moa long graun.” Lukim tok bilong ves 10 long dispela seim sapta we em i tok “bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.” Ol Skripsa Grik tu i tok olsem Jisas Krais i bin stap long matmat inap sotpela hap taim bihain long em i dai.​—Aposel 2:31.

Jisas i bin helpim planti man taim em i stap laip, tasol em i save olsem em i mas i dai. Olsem wanem? Em i bin ting olsem em inap long helpim yet ol man taim em i stap long matmat? Nogat, em i no ting olsem. Em i tok piksa olsem dai bilong em i olsem tudak long nait, em taim we ol man i no inap mekim wok. (Jon 9:4) Jisas i save olsem taim ol man i dai, ol i no gat strong moa long mekim wanpela samting.​—Aisaia 26:14.

Jisas i mekim narapela tok piksa i kamapim klia wankain poin long samting bilong dai. Taim pren bilong em Lasarus i dai, Jisas i tok dai i olsem man i slip. (Jon 11:​11-13) Yumi no save ting man i slip em bai helpim yumi, a? Man i slip em i no save long wanpela samting, em i no inap mekim wanpela samting bilong helpim narapela.

Yu Ting Man i Gat Wanpela Spirit i No Save Dai?

Olsem wanem? Ol man i gat wanpela “spirit” i no save dai? Baibel i tok God i putim strong bilong laip, o spirit, insait long ol man na animal, na ol i mas pulim win bambai dispela strong i ken i stap yet. Dispela strong bilong laip i helpim bodi long i stap laip. Tasol taim ol man na animal i no pulim win moa na i no helpim moa dispela strong bilong laip long i stap​—em God i bin givim long ol​—orait long dispela taim ol i save dai. Ol i no save moa long wanpela samting.​—Stat 3:​18, 19; Saveman 3:​19-21; 9:​4, 5.

Tasol sampela inap tok, ‘Olsem wanem long planti stori ol man i save mekim long ol i bin toktok wantaim ol man i dai pinis, harim nek bilong ol, na lukim ol tu?’ Long planti hap bilong graun i gat ol kain stori olsem. Ol dispela stori i strongim bel bilong ol man em famili o ol gutpela pren i dai pinis, na i kirapim ol long go lukim glasman husat i tok em inap toktok wantaim ol man i dai pinis.

Olsem wanem? Ol dispela kain stori i tru? Sapos olsem, orait ol i pait wantaim ol tok bilong Baibel em yumi skelim pinis. Krais Jisas i tok olsem Tok Bilong God em i tru. (Jon 17:17) Tok i tru bilong Baibel i no save pait wantaim. Baibel i tokaut stret long tingting yumi mas i gat long ol kain tok olsem ol daiman inap helpim ol man i stap laip. Baibel i stori long wanpela man husat i laik kisim helpim long daiman. Taim yumi ritim gut dispela stori, bai yumi kisim stretpela save long dispela samting.

Wanpela King i Laik Kisim Helpim Long Daiman

Pait i kamap long noten Israel. Ami bilong ol Filistia, em ol man i save pret long ol, i laik pait long King Sol na ami bilong em. Taim Sol i lukim kem bilong ol Filistia, “em i pret nogut tru.” Taim dispela samting i kamap, Sol i bin lusim pinis lotu i tru. Olsem na Jehova i no harim ol beten bilong em. Orait Sol bai askim husat long helpim em? Profet bilong God, Samuel, em i dai pinis.​—1 Samuel 28:​3, 5, 6.

Sol i askim wanpela glasmeri long Endor long helpim em. Em i askim glasmeri long “singautim Samuel” long kamaut long matmat. Glasmeri i singautim wanpela spirit. Dispela “Samuel” i tokim Sol olsem ol Filistia bai winim pait na Sol na ol pikinini man bilong em bai i dai long pait. (1 Samuel 28:​7-19) Yu ting em Samuel tru tru i kamaut long matmat?

Tingim dispela. Baibel i tok taim man i dai em i “tanim i kamap graun gen” na em i ‘no inap mekim olgeta samting em i bin tok long mekim.’ (Song 146:4) Sol tupela Samuel i save olsem God i no orait long pasin bilong kisim helpim long ol glasman. Tingim, bipo Sol i bin go pas long pinisim pasin bilong mekim wok bilong ol spirit nogut!​—Wok Pris 19:31.

Skelim dispela samting. Sapos gutpela man Samuel i stap laip yet olsem wanpela spirit, yu ting em bai brukim lo bilong God na wok wantaim glasmeri bambai em i ken bungim Sol? Jehova i no laik toktok wantaim Sol. Yu ting wanpela glasmeri inap fosim God i Gat Olgeta Strong long toktok wantaim Sol long rot bilong Samuel husat i dai pinis? Nogat tru. Em i klia tru olsem, dispela “Samuel” em i no gutpela profet bilong God. Em i wanpela spirit​—em i spirit nogut i giaman olsem em i Samuel i dai pinis.

Ol spirit nogut em ol ensel husat i bin bikhet long wok bos bilong God long bipo yet. (Stat 6:​1-4; Jut 6) Ol dispela spirit nogut inap skelim gut ol man taim ol i stap laip yet; ol i save long ol pasin bilong ol, wei bilong ol long toktok, na lukluk bilong ol. Ol i laik strongim dispela tingting olsem tok bilong Baibel i no tru. Olsem na i gat as na Baibel i mekim tok lukaut long yumi no ken toktok wantaim ol spirit nogut! (Lo 18:​10-12) Ol dispela spirit nogut i mekim yet wok bilong ol long nau.

Ating nau yumi inap save long as na planti man i tok ol i “harim” o “lukim” wanpela long famili o pren i dai pinis. Sampela taim i luk olsem ol kain samting olsem i bilong helpim yumi, tasol tru tru ol spirit nogut i laik giamanim ol man.b (Efesus 6:12) Na tingim dispela tu: Jehova em i God bilong pasin laikim na em i save tingim tru yumi. Sapos ol daiman i stap laip long sampela hap na ol inap kam bilong helpim ol pren na famili, orait yu ting Man Bilong Wokim yumi bai tambuim yumi long toktok wantaim ol daiman na tok dispela pasin em i “pasin nogut”? Nogat tru! (1 Pita 5:7) Orait olsem wanem? I gat samting inap helpim tru yumi?

Samting Tru Bilong Helpim Ol Daiman na Ol Man i Stap Laip

Ol tok yumi skelim pinis i soim olsem ol daiman i no gat strong long helpim ol man i stap laip. Na tu, pasin bilong askim ol daiman long helpim yumi em pasin i nogut tru; dispela pasin inap bagarapim tru yumi, long wanem, em i no stret wantaim lo bilong God na i opim rot long ol spirit nogut long stiaim yumi.

Baibel i stiaim yumi i go long nambawan gutpela Helpim​—em Man Bilong Wokim yumi, Jehova. Em inap kisim bek yumi long indai. (Song 33:​19, 20) Em i stap bilong helpim yumi long nau. Olsem na em i helpim yumi long bilip na wet long samting tru bai kamap, em i no olsem ol glasman i save giaman.

Tamba, em yumi bin stori long em long pastaim, em i kisim save olsem ol tok giaman bilong ol glasman i narapela kain long tok i tru em Jehova i givim long yumi. Ol glasman i tok olsem sapos em i no mekim ofa long ol tumbuna bilong em i dai pinis, em bai feil long eksem bilong skul. Tamba i bin kirap stadi long Baibel wantaim ol Witnes Bilong Jehova. Em i bin kisim save long wanem samting tru i painim ol man i dai pinis, na em i kisim save tu long husat i as bilong ol lain i giaman olsem ol i tumbuna i dai pinis. Maski mama bilong em i putim bikpela presa long Tamba na tok em i mas kisim helpim long wanpela glasman, Tamba i no laik mekim olsem na em i tokim mama bilong em olsem, “Sapos mi feil, neks yia bai mi wok strong moa.”

Wanem samting i kamap? Em i kamap namba wan long eksem! Mama bilong em i kirap nogut tru, na em i no bilip moa long ol glasman, na em i no toktok moa long pasin bilong givim ofa long ol tumbuna i dai pinis. Tamba i kisim save olsem Jehova i tok yumi no ken “ran i go long ol manmeri i dai pinis long kisim tingting bilong ol.” (Aisaia 8:19) Tamba i stadi long Baibel na dispela i strongim em long bilip olsem sapos em i amamas long lo bilong God, ol samting em i mekim bai kamap gutpela.​—Song 1:​1-3.

Tasol olsem wanem long famili na ol pren husat i dai pinis? Gutpela samting bai painim ol? Jehova i save helpim yumi ol man i stap laip, na tu, em i promis long helpim ol man i slip long matmat. Profet Aisaia i tok ol daiman i no inap mekim wanpela samting, na long sapta 26, ves 19, em i tok: ‘Ol dispela lain bilong yu i dai pinis, ol bai i kirap bek. Yupela ol lain i slip long matmat, yupela kirap na amamas na singaut.’ Dispela tok profet i tok moa olsem “ol lain i slip long matmat” ol bai stap laip gen.

Tingim dispela! Planti bilion manmeri i slip long matmat, ol bai kisim laip gen! Baibel i tok Jehova i gat laik long givim laip long ol man i dai pinis. (Jop 14:​13-15) Olsem wanem? I hatwok long bilip olsem ol kain tok promis olsem bai kamap tru? Jisas Krais i bilip tru olsem dispela gutpela samting bai painim ol man i dai pinis, olsem na em i tok olsem long ai bilong Jehova ol daiman i stap laip.​—Luk 20:​37, 38.

Yu laik bilip na wet long dispela gutpela samting?c Sapos olsem, wok yet long kisim stretpela save long Baibel. Taim yu stadi long Baibel, bai yu bilip tru olsem Jehova inap helpim ol man i stap laip na ol daiman tu, na ol tok promis bilong em ol “i tru olgeta.”​—KTH 21:​4, 5.

[Ol Futnot]

[Rait long pes 19]

Yumi gat bikpela laik long lukim gen ol famili na ol pren i dai pinis

[Piksa long pes 20]

Yu ting profet Samuel i kamaut long matmat na toktok wantaim King Sol?