Tru Ol i Toktok Wantaim Man i Dai Pinis o Nogat?

OL TIM bilong pilai kikbal long Brasil, sampela taim ol i go long wailis bilong ol spirit bambai ol i ken kisim gutpela tok bilong helpim ol, nogut narapela tim i win. Wanpela nius i tok, planti milion manmeri i save go long wailis bilong ol spirit bambai ol i ken toktok wantaim ol spirit. Ol i ting ol dispela spirit em spirit o tewel bilong man i dai pinis na ol inap givim save long ol bilong stretim kain kain hevi. Long sampela kantri ol bikpela man bilong wok politik, na ol man bilong wokim ol piksa, na ol bisnisman, ol i save go askim long ol spirit. Planti man i gat sik, o ol i gat hevi long Mani, ol i painim rot bilong toktok wantaim ol man i dai pinis, long wanem ol i ting ol daiman i kisim pinis bikpela save moa.

Tasol yu ting i stret yumi ken painim rot bilong toktok wantaim ol man i dai pinis? Yumi inap toktok wantaim ol o nogat? Dispela samting inap nogutim yumi? Taim yu save long tok bilong Baibel long ol dispela samting, ating bai yu kirap nogut.

Olsem Wanem long King Sol?

Orait, tingim wanpela samting i bin kamap tru long bipo na Baibel i stori long en: King Sol bilong Isrel i pret, long wanem ol Filistia i laik pait long ol Isrel, olsem na em i go lukim wanpela meri long Endor, em i save toktok wantaim ol spirit. Profet Samuel i dai pinis, tasol Sol i tokim dispela meri long singautim Samuel. Meri i mekim olsem na wanpela spirit i kamap. Meri i tokim Sol, em i lukim wanpela lapun man i kamap em i pasim longpela saket. Sol i harim dispela tok na em i ting dispela spirit em Samuel. Na spirit i givim wanem tok long Sol? Em i tok, bai God i givim ol Isrel i go long han bilong ol Filistia, na long tumora Sol wantaim ol pikinini man bai i go i stap wantaim em long ples bilong ol man i dai pinis, olsem ol bai bagarap taim ol i pait wantaim ol Filistia na bai ol i dai. (1 Samuel 28:​4-19) Olsem wanem? Ol samting i kamap olsem tasol?

Sampela samting tasol i kamap olsem dispela spirit i bin tok. Sol i kisim bagarap long pait, tasol ol Filistia i no kilim em i dai; em i kilim i dai skin bilong em yet. (1 Samuel 31:​1-4) Na spirit i bin tok olsem olgeta pikinini man bilong Sol bai dai, tasol wanpela i no i dai, em Isboset.

Tasol i stret Sol i go askim long man i dai pinis? I no stret. Em i mekim pasin kranki tru. Olsem na Baibel i tok: “Sol i sakim tok bilong God na em i dai . . . na tu em i bin i go askim long wanpela wailis bilong ol spirit.” (1 Kronikel 10:​13, NW ) Olsem wanem? Dispela samting inap lainim yumi long sampela samting? Em inap lainim yumi. Sol i dai, long wanem em i bin tokim wanpela wailis bilong ol spirit long singautim man i dai pinis. Taim Sol i mekim olsem, em i kalapim tambu bilong God i tok: “Yupela i no ken larim sampela man i stap insait long lain bilong yupela, olsem man i save . . . singautim wailis bilong ol spirit, o glasman, o man bilong singautim man i dai pinis. Long wanem Jehova i nolaik tru long ol man i mekim ol kain pasin olsem.” (Diuteronomi 18:​10-12, NW ) Bilong wanem God i nolaik tru long pasin bilong singautim man i dai pinis? Orait, pastaim yumi ken tingim narapela askim, olsem:

Ol Inap Mekim?

Sapos tru yumi inap toktok wantaim man i dai pinis, orait dispela man i mas i gat tewel na em i stap laip yet long wanpela hap. Tasol Baibel i tok: “Yawe God i kisim graun na em i wokim man long en. Na em i winim win bilong laip i go insait long nus bilong dispela man, na man i kamap laip.”(Jenesis 2:⁠7) Baibel i no tok God i putim wanpela tewel insait long skin bilong man. Nogat. God i no givim tewel long man, God i givim laip long man. Olsem na taim man i dai, em i no gat laip moa. Em i no gat tewel. Taim em i dai em i dai olgeta na tanim i kamap graun gen. (Jenesis 3:19) Na Baibel i tok: “Ol man i stap laip ol i save ol bai dai; tasol ol man i dai pinis ol i no save long wanpela samting, . . . i no gat wok o tingting o save o save pasin long [matmat], em bai yu go long en.”−Eklisiastis 9:​5, 10, NW.

Olsem na ol man i dai pinis ol i no kisim sampela save moa; nogat; tingting bilong ol i pinis na ol i no save long wanpela samting. Olsem na yumi no inap toktok wantaim ol. Na taim yumi bihainim lo bilong God i tambuim yumi long singautim man i dai pinis, dispela i lukautim yumi na no gat wanpela samting bai giamanim yumi. Tasol i gat ol spirit i stap na ol i save givim tok long ol man, olsem dispela spirit i mekim long King Sol.

Wanem As Bilong En?

Ol wailis bilong ol spirit i tok ol inap toktok wantaim ol man i dai pinis, tasol planti ol i save mekim pasin giaman. Wanpela bikpela buk (The World Book Encyclopedia) i tok: ‘Planti wailis i save wokim trik na bai ol man i ting spirit o tewel bilong man i dai pinis em inap toktok wantaim ol man i stap laip yet. Taim ol i bung bilong toktok wantaim ol man i dai pinis na sampela narapela kain samting i kamap, ol saveman bilong saiens i save long as bilong planti kain samting olsem i save kamap. Olsem: Sampela wailis inap tromoi nek na ol man i no save dispela tok i kamap long maus bilong wailis yet; ol i ting narapela man, olsem wanpela man i dai pinis em i toktok. Sampela ol i gat helpim bilong ol na ol i mekim wok long kain kain samting i gat trik long en na i giamanim ol man. Planti man i go lukim wailis bilong ol spirit ol i laik tru bai ol inap toktok wantaim wanpela famili o gutpela pren bilong ol em i dai pinis. Dispela strongpela laik bilong ol i mekim na ol i ting ol tok bilong wailis i kam long ples bilong ol spirit.’

Tasol i no ol dispela wailis tasol i laik giamanim yumi. Nogat. Sapos yumi bihainim tambu bilong God na yumi no singautim ol man i dai pinis, dispela bai lukautim yumi na ol spirit nogut i no ken giamanim yumi. I gat sampela tok i kam long ples bilong ol spirit, tasol husat ol i as bilong en? Em ol spirit i gat bikpela strong na ol i laik giamanim ol man. Baibel i tok ol i “spirit nogut,” em Seten na ol ensel i bikhet na bihainim em. (Efesas 6:12) Taim King Sol i go lukim dispela meri long Endor, wanpela spirit nogut i kamap na em i giamanim Sol na Sol i ting em i Samuel.

Yumi stori pinis long ol samting i bin kamap long King Sol na dispela i makim olsem ol spirit nogut i no inap givim sampela gutpela tok long yumi bilong helpim yumi, o tok bilong ol i helpim ol man inap liklik taim tasol. Ol spirit nogut i wankain olsem bos bilong ol, em Seten, ol i man bilong mekim tok giaman. (Mak 3:22; Jon 8:44) Wanpela man bilong Englan long bipo (Sir Arthur Conan Doyle), em i save skelim ol narapela kain samting i kamap, em ol i ting ol spirit i as bilong en, na em i tok:’ Sori tru, tasol ol dispela spirit i givim tok long mipela, ol i gat save, tasol ol i spirit nogut na ol i save mekim planti tok giaman. Ol man i bin skelim dispela samting, ating olgeta ol i bin kisim sampela tok i kam long spirit i laik giamanim ol, na wan wan taim ol i kisim gutpela tok tru.’ (The New Revelation, pes 72) Tasol yu no laik bai wanpela samting i giamanim yu, a?

Orait, nau yu ken tingim dispela samting, olsem: Stori bilong bipo i stori long ol man i bin stilim sampela man bilong narapela kantri na baim i go long ol man bai ol i wok kalabus long ol, na ol dispela man i karim bikpela hevi. Yu ting i gat wanpela man em i laik larim ol man i kalabusim em na givim ol kain hevi olsem long em? Nogat, a? Orait, yumi no ken larim ol spirit nogut i kalabusim yumi. Ol spirit nogut i save giaman na ol i save kalabusim man na ol inap kirapim em long mekim pasin pait na kisim man i dai. Olsem: Wanpela man bilong Penambuko long Brasil, em i gat 29 krismas na nem bilong em Joseʹ, em i tok, ‘wanpela spirit i go insait long mi na em i subim mi long kilim i dai liklik pikinini meri bilong mi em i gat wanpela krismas.’ Tru tumas, sapos yumi insait long ol samting bilong ol spirit nogut, ol inap kalabusim yumi olsem, na subim yumi long mekim kain kain pasin nogut. Ol man i wok kalabus long bipo, ol i bin painim rot bilong lusim dispela wok kalabus, na ol man long nau, em ol spirit nogut i kalabusim ol, ol tu i mas laik long lusim dispela wok kalabus bilong ol. Wanpela rot bilong lusim dispela kain kalabus, em olsem: No ken singautim wailis bilong ol spirit na painim rot bilong toktok wantaim man i dai pinis. Olsem wanem? . . .

I gat Wok long Singautim Ol Man i Dai Pinis Bilong Helpim Yumi?

Nogat. Olsem pikinini i bilip tru long papa bilong em, olsem tasol yumi ken singautim Papa bilong yumi long heven bilong helpim yumi. Em i laik tru long helpim yumi. (Luk 11:​9-13) Profet bilong God, em Aisaia, em i tok: “Sapos ol i tokim yupela: ‘Yupela i go askim long ol wailis bilong ol spirit na long ol glasman, em ol i save mekim toktok olsem ol pisin na ol i save daunim nek na toktok isi,’ yupela i mas askim long God bilong yupela, a? Yu ting i stret sapos ol man i stap laip ol i askim ol man i dai pinis long helpim ol? Yupela i mas bihainim lo na ol tok bilong lainim yupela!”−Aisaia 8:​19, 20, NW.

Tru tumas, sapos yumi bihainim laik bilong God Jehova na yumi sakim pasin bilong toktok wantaim ol spirit nogut, orait yumi ken bilip tru olsem God bai helpim yumi. Disaipel Kristen Jems i raitim tok olsem: “Yupela i mas daunim bel na stap aninit long God. Yupela i mas sakim Seten, na bai em i lusim yupela na ranawe.” (Jems 4:⁠7) Wanpela man i bin mekim wok bilong ol spirit nogut inap 28 yia, em i kirap long stadi wantaim ol Witnes Bilong Jehova na lainim tok bilong Baibel, na bihain em i tok: “Yu no ken pret long ol samting Seten inap mekim long ol man i lusim wok bilong ol spirit nogut; yu mas bilip tru long God Jehova.”

Sapos yumi putim ol tok i tru bilong Baibel long tingting na long bel bilong yumi na yumi bihainim ol dispela tok, orait bai yumi “pasim olgeta klospait God i save givim long yumi, na bai [yumi] inap long sanap strong na sakim olgeta pasin hait bilong Seten,” na ol spirit nogut i no inap kalabusim yumi. (Efesas 6:11) Na sapos oltaim yu beten long Jehova, dispela bai lukautim yu na givim strong long yu bilong sakim ol spirit nogut.−Provep 18:⁠10.

Yumi save pinis, ol man i dai pinis ol i dai tru na i olsem ol i slip. Dispela i mekim isi bel bilong yumi. (Jon 11:11) Na Krais Jisas i bin mekim tok promis, olsem: Ol man i dai pinis bai ol i kirap bek.−Jon 5:​28, 29.

Wanpela man, bipo em i save mekim wok bilong ol spirit, nau em wantaim meri pikinini bilong em ol i save long ol tok bilong Baibel i makim olsem i no gat wok long yumi singautim ol man i dai pinis long helpim yumi, o singautim ol spirit ol inap giamanim yumi na yumi ting em ol man i dai pinis. Yu tu yu ken lusim kalabus na i stap fri olsem dispela famili na planti manmeri moa long olgeta hap. (Jon 8:32) Yu mas kisim stretpela save long ol samting i painim man i dai pinis, na long ol samting God i laik mekim bilong helpim ol man. Na bai yu inap bilip na wetim nupela taim Jehova i laik kamapim−long dispela taim bai yu inap toktok wantaim ol famili na gutpela pren bilong yu bipo ol i dai pinis, long wanem bai ol i kirap bek, na bai yu inap i stap oltaim long gutpela pasin isi.−Aisaia 25:⁠8.

[Piksa long pes 4]

Profet Samuel i dai pinis na taim King Sol i singautim Samuel bilong givim sampela tok long em, husat tru i toktok wantaim Sol?