Tok Bilong Jehova i Kamap Strong Long “Graun Bilong Tarangau”

“GRAUN Bilong Tarangau.” Long tok ples bilong ol, ol Albenia i save kolim kantri bilong ol long dispela nem. Dispela kantri i stap klostu long solwara Adriatic long poin bilong Bolkan, namel long kantri Grik na kantri bipo ol i kolim Yugoslavia. Ol man i gat kain kain tingting long dispela lain i kam we, tasol planti saveman i wanbel long tok olsem ol Albenia na tok ples bilong ol i bin kam long wanpela lain bilong bipo yet, em ol Iliria, na buk The Encyclopædia Britannica i tok em wanpela lain i bin kirap long 2000 B.C.E. samting.

Albenia em i naispela kantri, kirap long hap not tru i gat ol maunten em het bilong ol i sap tru, na i kam inap long waitpela wesan bilong ol nambis long hap saut bilong solwara Adriatic. Tasol samting i naispela tru, em ol manmeri bilong dispela kantri. Ol i gat pasin laikim na ol i save mekim gut long ol man, na ol i man bilong toktok, na ol i save lainim kwik ol samting. Ol i strong long kamapim tingting bilong ol na wokim han bilong helpim tok bilong ol.

Wanpela Misineri i Gat Nem i Kam

Ating gutpela pasin bilong dispela lain na ol naispela ples i kirapim tingting bilong wanpela man i bin raun na kam long dispela hap inap planti handet yia i go pinis. Long 56 C.E. samting, aposel Pol, em man bilong raun long planti hap, em i tok: “Mi autim olgeta tok bilong gutnius bilong Krais, na mi raun i go long olgeta hap inap long provins Ilirikum.” (Rom 15:​18, 19) Long nau, hap saut bilong Ilirikum em sentral na noten Albenia. Pol i raitim dispela pas long Korin, long kantri Grik, long hap saut bilong Ilirikum. Em i tok, em i bin autim olgeta tok bilong gutnius i go “inap long provins Ilirikum,” na dispela i makim olsem em i kam inap long boda bilong Ilirikum o em i go insait tru long dispela hap. Olsem na em i bin autim tok long hap nau em i sauten Albenia. Em nau, yumi ken ting Pol em i namba wan man bilong autim tok bilong Kingdom long Albenia.

Orait planti handet yia i go pinis. Ol strongpela gavman i kamap na i pinis. Ol narapela narapela kantri i bosim Albenia i go inap long taim em i kisim indipendens long 1912. Inap 10-pela yia samting bihain, ol i harim gen tok bilong Kingdom Bilong Jehova long Albenia.

Wok i Kirap Long Taim Bilong Yumi

Sampela manmeri bilong Albenia i bin go long Amerika na ol i bung wantaim lain Intenesenel Sumatin Bilong Baibel, em olpela nem bilong ol Witnes Bilong Jehova, na long 1920 samting ol i kam bek long Albenia bilong autim dispela tok ol i bin lainim. Wanpela bilong ol em Nasho Idrizi. Sampela i harim tok. Bilong helpim ol nupela man i laik harim tok, long 1924 brens ofis long Romenia i kirap lukautim wok bilong autim tok long Albenia.

Thanas Duli (Athan Doulis) em wanpela man i bin kisim save long Jehova long Albenia long dispela taim. Em i tok: “Long 1925 i gat 3-pela kongrigesen long Albenia, sampela Sumatin Bilong Baibel na sampela man i laik harim tok bilong Baibel ol i stap nabaut longwe long ol kongrigesen. Pasin bilong laikim tru narapela em i strong tru namel long ol, olsem na ol i narapela kain long ol lain i stap long dispela hap!”a

I no gat ol gutpela rot, olsem na i hatwok tru long raun. Tasol ol lain bilong autim tok i strong long mekim wok bilong ol. Long hap saut long Vlorë, Areti Pina i kisim baptais long 1928, taim em i gat 18 krismas. Dispela meri i holim Baibel long han bilong em na wokabaut i go antap long ol maunten na autim tok long ol man. Long 1930 samting em i insait long wanpela strongpela kongrigesen long Vlorë.

Long 1930, brens ofis long Atens, Grik, i lukautim wok bilong autim tok long Albenia. Long 1932 wanpela wasman raun bilong Grik, em i kam long Albenia bilong strongim bel bilong ol brata. Ol manmeri i kisim save long tok i tru bilong Baibel long dispela taim bipo, klostu olgeta i wet long kisim laip long heven. Ol i gat nem olsem lain bilong i stap klin na i stap stret, olsem na olgeta man i rispek tru long ol. Wok bilong ol dispela gutpela brata i karim planti kaikai. Long 1935 na 1936, ol i tilim inap 6,500 buk na nius bilong Baibel long Albenia.

Wanpela taim long taun Vlorë, Nasho Idrizi i kamapim wanpela tok bilong J. F. Rutherford long masin pikap. Ol man i pasim ol stua samting bilong ol na ol i kam harim dispela tok em Brata Idrizi i tanim long tok Albenia. Ol dispela lain bilong skulim ol man long Baibel long bipo ol i wok strong tru na gutpela samting i kamap. Long 1940 i gat 50 Witnes long Albenia.

Gavman i No Bilip Long God

Long 1939, ol Fasis bilong Itali i bosim kantri. Ol i tambuim wok bilong ol Witnes Bilong Jehova long autim tok. Bihain liklik, ol ami bilong Jemani i kam pait long Albenia. Taim Wol Woa 2 i pinis, wanpela kepten bilong ami, Enver Hoxha, i kamap strong long wok politik. Long 1946 Komiunis Pati bilong em i winim eleksen, na em i kamap praim minista. Ol yia i kam bihain long en, ol i kolim taim bilong i stap fri, tasol long lain bilong Jehova em i taim nogut.

Isi isi gavman i wok long birua long ol lotu. Ol Witnes Bilong Jehova long Albenia i bihainim pasin Kristen na ol i no insait long ol pait samting, olsem na ol i no laik holim gan o insait long wok politik. (Aisaia 2:​2-4; Jon 15:​17-19) Planti i kalabus, na ol i no gat kaikai na ol narapela samting ol i mas i gat. Planti taim ol sista bilong ol long spirit em ol i no kalabus, ol i wasim klos bilong ol na kukim kaikai bilong ol.

Ol i No Pret Long Ol Birua

Long 1942 samting, Frosina Xheka, em yangpela meri bilong wanpela liklik ples klostu long Përmet, em i harim olsem ol bikbrata bilong em ol i stadi wantaim wanpela Witnes i save wokim su, em Nasho Dori.b Gavman i wok strong moa long pasim ol Witnes Bilong Jehova, tasol bilip bilong Frosina i wok long kamap strong, na papamama i no amamas liklik long dispela. Em i tok: “Ol i save haitim su bilong mi na paitim mi sapos mi go long ol miting Kristen. Ol i strong long mi mas maritim wanpela man i no bilip. Taim mi tok nogat, ol i rausim mi long haus. Long dispela de, ais i kam daun na i kol nogut tru. Nasho Dori i askim Brata Gole Flloko long Gjirokastër long helpim mi. Ol i stretim rot bambai mi ken stap wantaim famili bilong em. Ol brata bilong mi i kalabus inap 2-pela yia, long wanem, ol i no laik insait long ami. Taim ol i lusim pinis kalabus, mi go sindaun wantaim ol long Vlorë.

“Ol polis i laik subim mi long go insait long ol samting bilong politik, tasol mi no laik. Ol i holim mi na kisim mi i go insait long wanpela rum na ol i sanap banisim mi. Wanpela i tokim mi: ‘Yu save long ol samting mipela inap mekim long yu, a?’ Mi tokim ol: ‘Yupela inap mekim ol samting Jehova i larim yupela i mekim, na em tasol.’ Em i kros na tok: ‘Yu longlong stret! Yu klia!’ ”

Ol brata bilong Albenia i bin kamapim dispela wankain pasin bilong i stap gut long Jehova insait long ol dispela yia. Long 1957, i gat 75 manmeri i autim tok bilong Kingdom. Long 1963 samting, hetkota bilong ol Witnes Bilong Jehova i salim John Marks, em wanpela man bilong Albenia i bin go sindaun long Amerika, long kam long Tiranë bilong helpim ol brata long stretim gut wok Kristen.c Tasol i no longtaim na gavman i salim Luçi Xheka, Mihal Sveci, Leonidha Pope, na sampela brata moa i holim wok olsem wasman i go long ol banis kalabus.

Kisim Malolo Long Hevi

Long ol yia paslain na i kam inap long 1967, gavman i no orait long olgeta kain lotu long Albenia. Bihain gavman i putim tambu long ol. Ol pris bilong lotu Katolik, Otodoks, na Muslim ol i no inap mekim wok lotu bilong ol. Gavman i pasim ol haus lotu o wokim ol i kamap haus eksasais, haus tumbuna, o maket. Ol i no larim wanpela man i holim Baibel. Na ol man i no ken kamapim tingting bilong ol olsem ol i bilip long God.

I hatwok tru long autim tok na bung wantaim ol bratasista long ol miting. Ol wan wan Witnes yet i traim long painim rot bilong mekim wok bilong Jehova, maski ol i mas i stap wanpis na mekim. Namel long 1960 na 1980 samting, lain Witnes i go liklik tru. Tasol ol i stap strong long ol samting bilong spirit.

Long 1988 samting, isi isi i gat sampela senis i kamap long wok politik long Albenia. Ol klos na kaikai i sot tru. Ol man i no amamas. Ol senis i wok long kamap long ol hap bilong Isten Yurop, na long 1992 samting ol i kamap long Albenia tu. Inap 45 yia pinis hatpela gavman i bin bosim Albenia, tasol nau nupela gavman i larim ol man i stap fri gen long mekim lotu.

Gavening Bodi Bilong Ol Witnes Bilong Jehova i salim tok long brens ofis long Ostria na Grik, na kwiktaim ol i kirap painim ol brata bilong Albenia. Ol brata Grik i gat save long tok ples Albenia ol i kisim sampela nupela nius bilong Baibel ol i tanim nau tasol na karim i kam long Tiranë na Berat. Ol dispela brata em bipo ol i stap nabaut, ol i amamas nogut tru long bungim ol dispela Witnes bilong ol narapela kantri. Inap planti yia ol i no bin bungim ol Witnes bilong narapela hap.

Ol Painia Bilong Narapela Kantri i Go Pas Long Wok

Long 1992, Gavening Bodi i stretim rot bambai Michael na Linda DiGregorio, em tupela marit i wok misineri na ol tumbuna bilong ol i bilong Albenia, ol i ken i kam mekim wok long Albenia. Ol i go lukim ol lapun i bin stap gut long God, na helpim ol long bung wantaim gen olsem hap bilong famili spirit i stap long olgeta hap bilong graun. Long Novemba i gat 16 strongpela painia salim bilong Itali, olsem ol lain bilong autim gutnius fultaim, na 4-pela painia bilong Grik, ol i kam. Ol i stretim rot bilong kamapim wanpela skul bilong helpim ol long lainim tok ples Albenia.

Sindaun bilong ol dispela painia bilong narapela kantri i hatwok. Planti taim i no gat pawa. Long taim bilong kol, em i kol nogut tru. Ol manmeri i sanap long lain inap planti aua bilong baim kaikai na ol narapela samting ol i mas kisim. Tasol bikpela hatwok tru bilong ol brata, em bilong painim ol bikpela haus bilong bung em bai inap long ol planti nupela man i laik kisim save long tok i tru!

Ol painia i hatwok long lainim tok Albenia i kisim save olsem pasin bilong mekim gut tok ples em bilong helpim ol tasol long mekim ol narapela bikpela samting. Wanpela gutpela tisa bilong Baibel i tok: “I no olsem yumi mas save long kolim stret olgeta tok na bai yumi ken mekim gut long ol brata, olsem smail o holimpas ol. Sapos yu laikim ol tru long bel bilong yu, dispela yet bai kirapim ol Albenia long mekim wankain pasin long yu, maski yu no save gut long mekim tok ples bilong ol. Olsem na yu no ken tingting planti.”

Taim namba wan skul bilong lainim tok Albenia i pinis, ol painia i kirap mekim wok bilong ol long Berat, Durres, Gjirokastër, Shkodër, Tiranë, na Vlorë. I no longtaim na i gat ol kongrigesen i kamap long ol dispela taun. Areti Pina i sindaun yet long Vlorë, em i winim pinis 80 krismas na skin i no strong moa. Ol i salim tupela painia salim i go long dispela hap bilong autim tok wantaim Areti. Ol manmeri i kirap nogut taim ol i lukim ol lain bilong narapela kantri i mekim tok Albenia. Ol i tok: “Ol misineri bilong ol narapela lain ol i save strong long mipela i mas lainim tok Inglis o tok Itali sapos mipela i laik lainim samting. Ating yupela i laikim tumas mipela na yupela i gat sampela bikpela tok bilong givim long mipela, long wanem, yupela i bin lainim tok Albenia!” Areti i stap gut long God i go inap long taim em i dai na pinisim wok bilong em long graun long Janueri 1994. Em i bin mekim wok autim tok i go inap long laspela mun em i stap laip. Em wantaim ol painia i bin wok strong tru na Jehova i blesim wok bilong ol. Ol i kamapim gen wanpela kongrigesen long Vlorë long 1995. Long nau i gat 3-pela strongpela kongrigesen long dispela taun i stap long nambis.

Long olgeta hap bilong kantri, ol manmeri i hangre tru long kaikai bilong spirit na ol i no bel nogut long ol narapela lotu. Kwiktaim ol i ritim olgeta buk na nius bilong Baibel ol Witnes i givim long ol. Planti yangpela i kirap stadi na ol i kamap strong hariap.

I gat olsem 90 kongrigesen na grup em “bilip bilong ol . . . i kamap strong moa, na namba bilong ol i go bikpela moa long olgeta de” long olgeta hap bilong kantri. (Aposel 16:⁠5) Ol 3,513 Witnes long Albenia i gat planti wok yet long mekim. Long Mas 2005, i gat 10,144 manmeri i bung long Memorial bilong tingim dai bilong Krais. Ol manmeri bilong Albenia i gat pasin bilong mekim gut long ol man, olsem na taim ol Witnes i autim tok long ol, dispela i opim rot long ol inap mekim 6,000 Baibel stadi. Planti tausen manmeri bai kisim helpim long Baibel New World Translation long tok ples Albenia, em nau tasol ol i kisim. Tru tumas, tok bilong Jehova i kamap strong long “Graun Bilong Tarangau,” na dispela i litimapim nem bilong Jehova.

[Ol Futnot]

[Blok long pes 20]

PASIN BIRUA I PINIS LONG KOSOVO!

Long 1997 samting, kros pait long graun na pasin birua namel long ol narapela narapela lain insait long Kosovo i mekim na bikpela pait i kirap, na lain bilong ol narapela kantri i mas mekim ol samting bilong pinisim pait.

Long taim bilong dispela pait long Bolkan, planti Witnes i mas ranawe i go long ol kantri i stap klostu. Taim pait i pinis, wanpela liklik lain bilong ol i kam bek long Kosovo na ol i redi long mekim wok autim tok. Sampela painia salim bilong Albenia na Itali i orait long go sindaun long Kosovo na helpim 2,350,000 manmeri bilong dispela hap. Long nau i gat 4-pela kongrigesen na 6-pela grup, inap olsem 130 pablisa, ol i mekim wok bilong Jehova long dispela hap.

Wanpela spesel de kibung i kamap long Priština long 2003, na 252 i kam bung. Sampela em ol Albenia, Itali, Jeman, , Jipsi, na Serbia. Long pinis bilong tok bilong baptais, man bilong mekim tok i kamapim tupela askim. Tripela manmeri i sanap bilong tok “Yes” long tupela askim, em wanpela Albenia, wanpela Jipsi, na wanpela Serbia.

Odiens i kirap paitim han strong tru taim ol i harim tripela wantaim i tokaut strong: “Va!,” “Da!,” na “Po!” Tripela hia i holimpas narapela narapela. Ol i painim pinis rot bilong stretim hevi i bin stap longtaim namel long ol narapela narapela lain long kantri bilong ol.

[Mep long pes 17]

(Bilong save ol dispela rait i stap we long pes, lukim buk o magasin)

Solwara Mediterenian

ITALI

ALBENIA

GRIK

[Piksa long pes 18]

Ol yangpela Witnes i bihainim pasin bilong ol Witnes i bikpela pinis long wok strong

[Piksa long pes 18]

Areti Pina i stap gut long wok bilong Jehova kirap long 1928 i go inap long taim em i dai long 1994

[Piksa long pes 19]

Namba wan lain painia bilong ol narapela kantri i mekim skul bilong lainim tok ples

[Piksa Kredit Lain long pes 16]

Eagle: © Brian K. Wheeler/VIREO