Laip Stori

Jehova i Mekim Gut Tru Long Laik Bilong Mi Long Kamap Misineri

Stori bilong Sheila Winfield da Conceição

Bipo wanpela misineri long Afrika i kam raun long ples bilong mipela na em i tokim mipela olsem, long hap em i autim tok long en olgeta manmeri i save singautim em i go insait long haus na ol i putim gut yau long gutnius bilong Kingdom Bilong God. Mi tingting: “Man! Mi gat bikpela laik tru long autim tok long kain ples olsem!” Long dispela taim mi gat 13 krismas, na dispela tok bilong em i kirapim laik long bel bilong mi long kamap misineri.

TASOL paslain tru long dispela, famili bilong mi i bin kirap kisim save long Jehova. Long wanpela moningtaim long 1939, tupela yangpela man i bilas gut ol i paitim dua bilong mipela long taun Hemel Hempstead, i stap ausait long London, Inglan. Tupela i Witnes Bilong Jehova. Mama i bin karim mi long yia paslain long dispela, olsem na mi no inap tingim dispela taim tupela man hia i kam lukim mipela. Mama i laik bai ol i go, olsem na em i tokim tupela olsem em i ting Papa i gat laik long harim dispela tok, tasol em bai no inap kam bek hariap long haus​—em bai kam long 9 klok long nait samting. Mama i kirap nogut taim tupela i kam bek long dispela nait! Taim papa bilong mi, Henry Winfield, i save gut long tingting bilong ol long wok politik na ol pait samting bilong graun, em i tokim tupela long kam insait long haus na em i orait long stadi long Baibel. Em i wok long kamap strong hariap na em i kisim baptais. Sampela yia bihain mama bilong mi, Kathleen, em tu i kirap long stadi. Em i kisim baptais long 1946.

Long 1948, mi kirap mekim wok bilong autim gutnius bilong Kingdom Bilong God. Mi ting mi mas i gat wanpela hanwas bilong wokim stret ripot bilong ol aua mi lusim long autim tok. Sapos mipela ol pikinini i stap gut na i no bikhet, mipela i save kisim wanpela mani sikspens (20 toea samting) long olgeta Sarere. Mi bungim dispela mani i go inap tupela yia pinis na nau mi baim wanpela hanwas i gat liklik pe. Tasol Ray, em liklik brata bilong mi, oltaim em i save askim papa long tupela mani tripens​—em i no laikim wanpela sikspens. Wanpela taim em i strong tumas long kisim tupela tripens na Papa i kros. Ray i kirap long krai na em i tok em i mas i gat tupela tripens, long wanem, em i bin mekim wanpela tok hait long Jehova. Bihain Ray i tokaut olsem: “Wanpela tripens bai mi putim long bokis kontribiusen na wanpela tripens i bilong mi.” Mama i amamas na em i krai, na kwiktaim Papa i givim tupela tripens long Ray. Dispela i lainim mi olsem, em i bikpela samting long putim mani bilong helpim wok bilong Kingdom.

Long dispela taim Papa i stretim rot bilong go sindaun long hap i sot long ol lain bilong autim tok bilong Kingdom. Long 1949, em i salim fam wantaim liklik bisnis bilong em long salim wesan na gravel, na em i kirap mekim wok painia, olsem wanpela Witnes Bilong Jehova i autim tok fultaim. Mi kisim baptais long Septemba 24, 1950, bilong makim olsem mi dediket pinis long Jehova. Kirap long dispela taim, mi save mekim wok painia haptaim long taim i gat malolo long skul, mi autim tok inap 100 aua insait long wanpela mun. Tasol i no longtaim na mi kisim strongpela laik long bel bilong mi long mekim bikpela wok moa bilong helpim lotu i tru.

Laik Bilong Mi Long Kamap Misineri

Long 1951, Papa i kisim nupela asainmen bilong mekim wok autim tok, em Bideford, long Not Devon. Bihain liklik long taim mipela i kamap pinis long dispela ples, dispela misineri i wok long Afrika i kam raun na visitim kongrigesen bilong mipela, olsem mi stori pinis long en. Bihain long dispela, laik bilong mi long kamap misineri i stiaim tingting bilong mi long olgeta samting mi laik mekim. Ol tisa i save pinis long laik bilong mi, na ol i strong tru long daunim dispela tingting, long wanem, ol i laik bai mi kisim wanpela gutpela wok skin. Tasol long laspela de bilong mi long skul, taim mi go long rum bilong ol tisa bilong tok tenkyu long ol na tok gutbai long ol, wanpela i tok: “Mi laik tok amamas long yu! Long olgeta sumatin, yu wanpela tasol i save tru long mak yu laik winim. Mipela laik bai yu winim dispela mak.”

Kwiktaim mi painim wanpela wok haptaim, na long Disemba 1, 1955, mi kamap wanpela painia oltaim. Bihain, Mama na ol brata bilong mi ol tu i kamap painia, olsem na inap sampela yia, olgeta insait long famili i autim tok fultaim.

Go Long Aialan

Wanpela yia bihain, mi kisim pas i singautim mi i go mekim wok autim tok long Aialan. Em nau, mi wok long kamap klostu moa long mak mi laik winim long kamap misineri. Long Februeri 1957, mi wantaim tupela yangpela painia moa, em June Napier na Beryl Barker, mipela i kamap long Cork, long sauten Aialan.

Wok autim tok long Aialan i hatwok. Misin Katolik i birua tru long mipela. Taim mipela i autim tok long ol bikpela haus i gat planti flet o wanpela kompaun samting, mipela i lain long sekim gut ol dua bilong go ausait, nogut birua i painim mipela na mipela i mas ranawe hariap. Mipela save haitim ol baiskol i stap longwe liklik, tasol sampela taim ol i painim na ol i katkatim ol taia o rausim win long en.

Wanpela taim mitupela Beryl i autim tok long wanpela hap i gat planti haus, na sampela pikinini ol i kirap singaut na kolim ol tok nogut long mipela na tromoi ston long mipela. Olsem na mipela i go insait long wanpela stua i salim susu, em i hap bilong haus slip bilong wanpela man. Sampela bikhetlain i wok long bung ausait long haus. Beryl i save laikim tru susu, olsem na isi isi em i dring tupela o 3-pela kap​—em i ting dispela lain bai les na ol bai go. Tasol nogat. Orait nau wanpela yangpela pris i kam insait long stua. Em i ting mipela i turis na em i tok em i laik soim mipela long ol samting bilong dispela ples. Tasol pastaim em i kisim mipela i go insait long narapela rum em wanpela lapun man i slip i stap na i laik i dai, na taim mipela i sindaun i stap, pris i mekim beten long em. Nau mitupela Beryl na pris i lusim haus. Dispela bikhetlain i lukim mipela i toktok wantaim pris na ol i lusim mipela na ol i go.

Go Long Gileat

Long 1958 ol i laik mekim Kibung Intenesenel (Divine Will) long New York. Papa bai go, na mi tu i laik i go, tasol mi no gat mani. Tasol lapun bubu meri bilong mi i dai na em i makim 100 paun (K490 samting) bilong mi. Pe bilong balus long go na kam bek em 96 paun, olsem na kwiktaim mi go baim tiket.

Bihain liklik, wanpela man long brens ofis bilong ol Witnes Bilong Jehova long Briten i kam lukim mipela, na em i tokim olgeta painia salim i laik i go long kibung long ol i ken wokim pepa bilong go long Wastaua Baibel Skul Bilong Gileat na lain long kamap misineri. Mi kirap nogut tru long dispela! Em i givim pepa long ol narapela, tasol mi nogat. Mi yangpela tumas. Mi askim em long givim pepa long mi tu, long wanem, mi lusim pinis ples bilong mi na i olsem mi mekim wok misineri long dispela hap. Em i lukim olsem mi strong tru long go, olsem na em i givim pepa long mi. Mi beten strong na bai ol i orait long mi ken i go. I no longtaim na mi kisim pas i singautim mi i go long Gileat.

Mi amamas tru long ol i putim nem bilong mi long namba 33 klas bilong Skul Gileat wantaim 81 narapela painia i kam long 14 kantri. Mipela i skul inap 5-pela mun na ol dispela mun i go pinis hariap tru. Klostu long pinis bilong skul, Brata Nathan H. Knorr i givim wanpela gutpela tok long mipela i go inap 4-pela aua. Em i laik kirapim olgeta i gat laik long i stap singel long mekim olsem. (1 Korin 7:​37, 38) Tasol em i tok, mipela ol lain husat i tingting long marit long bihain, i gutpela sapos mipela i raitim lista bilong ol mak mipela laikim long wanpela gutpela poroman marit. Orait sapos bihain mipela i bungim wanpela mipela i tingting long maritim, mipela i ken skelim em wantaim ol dispela mak i stap long lista.

Ol mak long lista bilong mi yet i olsem: Man mi bai maritim em tu i wanpela misineri na em i save laikim tru Jehova, em i gat gutpela save long ol tok i tru bilong Baibel, winim save bilong mi, na em i orait long mipela i no kamapim pikinini paslain long Armagedon bambai mipela i ken autim tok fultaim, na em i save gut long tok Inglis, na krismas bilong em i winim krismas bilong mi. Dispela lista i helpim mi gut tru, long wanem, long dispela taim mi gat 20 krismas na klostu nau bai mi go mekim wok autim tok long wanpela longwe kantri.

Go Long Brasil

Long Sande, Ogas 2, 1959, mipela i greduet long skul na kisim toksave long kantri mipela bai go long en. Mi wantaim Vehanouch Yazedjian, Sarah Greco, Ray na Inger Hatfield, Sonia Springate, na Doreen Hines, mipela i go long Brasil. Mipela i amamas tru long dispela. Mi ting bai mi go long ples i gat ol bikbus, ol snek, ol diwai raba, na ol asples Indian. Tasol taim mi kamap pinis long hap, mi kirap nogut! Mi no lukim ol bikbus bilong Amason, nogat. Mi lukim Rio de Janeiro, em wanpela biktaun we san i save lait gut na i gat ol gutpela samting bilong nau long en, na long dispela taim em i nambawan biktaun bilong dispela kantri.

Namba wan samting mipela i mas kirap kwik long mekim, em lainim tok Potugal. Long namba wan mun mipela i stap long hap, mipela i stadi inap 11-pela aua long olgeta de. Inap liklik taim mi autim tok long Rio de Janeiro na mi stap long brens ofis bilong ol Witnes Bilong Jehova long dispela ples, tasol bihain ol i salim mi i go i stap long wanpela haus misineri long Piracicaba, long Provins São Paulo, na bihain mi go i stap long wanpela haus misineri long Porto Alegre, long Provins Rio Grande do Sul.

Orait long 1963, ol i singautim mi i go wok long Dipatmen Bilong Tanim Tok long brens ofis. Brata i lukautim dispela dipatmen em Floriano Ignez da Conceição, em i bin lainim mipela long tok Potugal taim mipela i kam nupela long Brasil. Em i bin kisim save long tok i tru long 1944, long dispela taim i gat olsem 300 Witnes tasol long Brasil, na em i bin i go long namba 22 klas bilong Skul Gileat. Wanpela taim long sampela mun bihain, Brata Conceição i askim mi long wet liklik long ofis long belo, long wanem, em i laik toktok wantaim mi. Pastaim mi tingting planti. Ating mi bin mekim wanpela rong? Taim belo kaikai i krai, mi askim em, em i laik tok wanem long mi. Em i kirap na askim mi: “Mi laik maritim yu.” Mi kirap nogut tru. Mi tokim em olsem mi laik tingim gut dispela samting pastaim, na nau mi siksti i go long kaikai.

Floriano i no namba wan brata i gat laik long mi. Tasol i kam inap long dispela taim, i no gat wanpela i winim ol mak mi bin putim bilong painim wanpela gutpela poroman marit. Mi ting dispela lista bilong mi i bin helpim mi na mi no popaia na makim kranki wanpela poroman. Tasol nau i no olsem. Floriano em inapim olgeta mak mi bin putim! Olsem na mitupela i marit long Me 15, 1965.

Hevi Bilong Sik i Kamap

Mitupela Floriano i bin kisim amamas long marit bilong mipela, maski i gat sampela hevi i painim mipela. Wanpela hevi em sik bilong Floriano, em i bin kamap paslain liklik long taim mitupela i marit. Sampela yia paslain long dispela, waitlewa bilong em long han kais i bagarap, na nau dispela i wok long givim bikpela pen long em. Olsem na mipela i lusim Betel na ol i makim mipela long mekim wok painia salim long taun Teresópolis, long ples maunten bilong Provins Rio de Janeiro. Dispela hap i no hat tumas na mipela i ting dispela bai helpim em long kamap orait gen.

Na tu, long Disemba 1965, mi kisim tok olsem Mama i gat bikpela sik kensa. Oltaim mitupela i save raitim pas i go i kam, tasol mi no bin lukim Mama inap 7-pela yia. Olsem na em i baim rot bilong mipela long go long Inglan na lukim em. Ol dokta i katim Mama, tasol ol i no inap rausim kensa. Tasol maski em i sik nogut tru na em i slip tasol long bet, em i holimpas laik bilong em long insait long wok autim tok. Em i gat wanpela taipraita long rum bambai em i ken autim tok long rot bilong ol pas, olsem em yet i save kolim ol tok na wanpela i raitim long taipraita ol dispela tok. Na taim sampela i kam lukim em, em i save autim tok liklik long ol. Em i dai long Novemba 27, 1966. Long dispela mun yet em i bin autim tok inap 10-pela aua! Papa i stap gut long wok painia i go inap long taim em i dai long 1979.

Taim mama i dai pinis, mitupela Floriano i go bek long Brasil, na i kam inap long nau mipela i mekim wok autim tok long Provins Rio de Janeiro. Pastaim ol i makim mipela long mekim wok sekit long nambawan biktaun bilong provins, tasol i no longtaim na bikpela sik i kamap gen long Floriano. Olsem na mipela i go bek long Teresópolis na mekim wok painia salim.

Inap planti yia Floriano i bin kisim bikpela pen long ol samting ol dokta i bin mekim bilong helpim em, tasol long 1974 ol i rausim waitlewa long han kais. Long dispela taim em i no inap mekim wok wasman siaman o painia salim, tasol long ol aua em haus sik i makim bilong ol man i ken kam lukim ol sikman, em inap mekim ol Baibel stadi​—wanpela stadi em i mekim long tok Inglis wantaim Bob, em wanpela man Amerika i ritaia pinis long wok. Bob i bilip long tok i tru na bihain em i kisim baptais. Isi isi Floriano i kamap orait na em i mekim wok painia oltaim i kam inap long nau.

Jehova i Mekim Gut Long Wok Bilong Mi

Insait long ol dispela yia, mi wok yet long mekim wok painia salim, na Jehova i bin mekim gut long dispela wok bilong mi. Long Teresópolis, mi bin helpim olsem 60 manmeri long dediketim laip bilong ol yet long Jehova. Wanpela bilong ol em wanpela meri nem bilong em Jupira, na mi bin lainim em long rit tu. Bihain mi stadi wantaim 8-pela pikinini bilong em ol i bikpela pinis. Olsem na long nau Jupira na winim 20 long famili bilong em ol i save mekim wok bilong Jehova. Wanpela em i elda, 3-pela i kongrigesen sevan, na tupela i mekim wok painia.

Mi lain pinis long kisim stretpela tingting olsem ol man inap kisim tok i tru. Wanpela taim mi mekim Baibel stadi wantaim wanpela yangpela meri nem bilong em Alzemira, na man bilong em, Antônio, em i tok long em bai larim tupela traipela dok i kam long mi sapos mi no lusim haus hariap. Bihain long dispela, mi bungim Alzemira wan wan taim tasol i go inap 7-pela yia bihain, na long dispela taim mi kisim tok orait long Antônio long stadi gen wantaim Alzemira. Tasol Antônio i tambuim mi long toktok wantaim em yet long Baibel. Orait wanpela taim ren i pundaun na mi singautim em long sindaun na harim stadi. Nau mi kisim save long hevi bilong em, em i no save long rit. Kirap long dispela taim Floriano wantaim sampela moa ol i stadi wantaim em na lainim em long rit. Long nau Alzemira wantaim Antônio ol i baptais pinis. Antônio i save helpim gut kongrigesen na em i save autim tok wantaim planti yangpela.

Em sampela ekspiriens mipela i bin kisim insait long 20 yia samting mipela i bin mekim wok autim tok long Teresópolis. Long 1988, mipela i kisim nupela ples wok​—em taun Niterói, na mipela i autim tok inap 5-pela yia long dispela hap na bihain mipela i go long Santo Aleixo. Orait bihain mipela i go wok wantaim Kongrigesen Japuíba i stap insait tru long provins Rio de Janeiro, na mipela i kirapim Kongrigesen Ribeira.

Mipela Kisim Gutpela Samting

Insait long ol dispela yia, mitupela Floriano i bin helpim inap olsem 300 manmeri long dediketim laip bilong ol long Jehova. Long nau sampela i mekim wok long brens ofis, na sampela ol i painia, elda, na kongrigesen sevan. Mi amamas tru long God i bin mekim wok long mipela​—long rot bilong holi spirit bilong em​—bilong helpim planti manmeri olsem!​—Mak 10:​29, 30.

Tru, Floriano i bin karim hevi bilong bikpela sik bilong em, tasol em i sanap strong yet na em i amamas na bilip strong long Jehova. Planti taim em i save tok: “Long nau, amamas i no save kamap long rot bilong gutpela sindaun i no gat liklik hevi long en. Amamas i save kamap taim Jehova i helpim yumi long karim ol hevi bilong yumi.”​—Song 34:19.

Long 2003, ol dokta i painim sik kensa long ai bilong mi long han kais. Ol i rausim ai na putim wanpela giaman ai, em mi mas klinim planti taim long olgeta de. Tasol maski dispela hevi i painim mi, Jehova i mekim gut long mi na mi gat strong long mekim yet wok bilong em olsem painia salim.

I kam inap nau, mi no gat planti samting bilong skin. Tasol Jehova i bin mekim gut long wok painia bilong mi, na mi gat planti gutpela samting bilong spirit. Tok bilong dispela misineri sista long wok autim tok long Afrika em i stret tru long ples wok bilong mipela long Brasil. Tru tumas, Jehova i bin mekim gut tru long dispela laik bilong mi long kamap misineri.

[Piksa long pes 9]

Mi wantaim famili bilong mi, 1953

[Piksa long pes 9]

Mi autim tok long Aialan, 1957

[Piksa long pes 10]

Brasil, 1959, mi wantaim ol wanwok misineri. Kirap long han kais na i go long han sut: Mi, Inger Hatfield, Doreen Hines, na Sonia Springate

[Piksa long pes 10]

Mi wantaim man bilong mi