Lotu Yu Makim Em Bikpela Samting o Nogat?

TAIM yumi go long stua o maket, yumi laik bai planti kain kain samting i stap. Taim maket i gat kain kain prut na kumu samting, yumi inap makim kaikai yumi laikim tru na i stret long famili bilong yumi. Na taim stua i gat planti klos long kain kain stail na kala, yumi inap makim klos i stret long skin bilong yumi. Planti samting yumi makim long laip bilong yumi em samting bilong laik bilong wan wan. Tasol i gat sampela samting, olsem kaikai o poroman, em sapos yumi no tingting gut na makim, dispela inap nogutim helt o amamas bilong yumi. Orait olsem wanem long lotu yumi makim bilong bihainim? Em samting bilong laik bilong wan wan na em tasol? O lotu yumi makim i bikpela samting na sapos yumi no tingting gut na makim, dispela inap nogutim yumi?

I gat planti kain kain lotu i stap. Lo bilong planti kantri long nau i orait long ol man i ken makim wanem lotu ol i laik bihainim, olsem na planti man i no pret long lusim lotu bilong papamama bilong ol. Wanpela wok painimaut long Amerika i kisim save olsem 80 pesen bilong ol Amerika i “bilip olsem olgeta lotu i olsem rot bilong God i kisim bek ol man,” na “wanpela long olgeta 5-pela 5-pela man i bin senisim lotu bilong ol taim ol i kamap bikpela pinis.” Wanpela wok painimaut long Brasil i kisim save olsem 25 pesen bilong ol Brasil i bin senisim lotu bilong ol.

Long bipo, ol man i save tok pait long ol bilip i makim wanpela lotu i narapela kain long narapela lotu. Tasol long nau planti man i holim tingting olsem, ‘Lotu yumi makim long bihainim, dispela i no bikpela samting.’ Tasol olsem wanem? Tingting bilong ol i stret o yu ting lotu yu makim inap mekim sampela samting long yu?

Ol man i gat gutpela tingting i save kamapim ol askim long samting ol i laik baim i kam we, na olsem tasol yumi gat savepasin sapos yumi askim olsem: ‘Ol dispela lotu i narapela narapela kain ol i bin kamap olsem wanem, na i gat wanem as na ol i bin kamap?’ Baibel i kamapim bekim bilong ol dispela askim.

Ol Lotu i Save Kamap Olsem Wanem?

Inap 1000 yia paslain long Jisas i kam long graun, King Jeroboam i kamapim wanpela nupela lotu long Israel. Jeroboam em i namba wan king bilong kingdom bilong Israel long hap not. Em i gat hatwok long kirapim ol manmeri long stap aninit long wok king bilong em. “[King] i wokim tupela bulmakau man long gol. Na em i tokim ol manmeri bilong en olsem, ‘Yupela i bin i go planti taim pinis long mekim lotu. Tasol nau, yupela i no ken i go moa. Lukim. Em hia ol god bilong yupela Israel.’ ” (1 King 12:28) Em i klia tru olsem long rot bilong lotu, king i laik pulim ol Israel na bai ol i no go moa long Jerusalem we bipo ol i save go bilong lotu. Lotu em Jeroboam i kamapim i stap inap planti handet yia na i mekim na planti milion manmeri i kalabus o i dai taim God i givim strafe long dispela lain bilong Israel i bin tromoi lotu i tru. Jeroboam i bin kamapim dispela lotu bilong helpim em long holimpas namba bilong em long bosim ol man. Sampela lotu em gavman i bin makim olsem lotu bilong kantri na ol i stap yet long nau, ol tu i bin kamap long wankain as: bilong strongim gavman bilong ol.

Aposel Pol i kamapim narapela as na ol man i kirapim nupela lotu. Em i tok: “Mi save, taim mi lusim yupela na mi go pinis, ol weldok nogut tru bai i kam namel long yupela, na ol bai i bagarapim ol sipsip. Na sampela man bilong yupela yet bai i kirap na mekim tok giaman nabaut, bilong pulim ol manmeri bilong God i go bihainim ol.” (Aposel 20:​29, 30) Sampela taim ol lida i laik kisim biknem ol i save kirapim ol nupela lotu bilong pulim ol manmeri i go bihainim ol. Ol lotu i holim nating nem Kristen ol i bin bruk nabaut long dispela rot.

Ol Lotu i Laik Amamasim Husat?

Narapela as na sampela i bin kirapim nupela lotu, em bilong amamasim ol man. Nius Economist i kamapim wanpela ripot i stori long ol nupela bikpela lotu long Amerika na i tok ol i wok long i go bikpela, long wanem, ol i “bihainim pasin ol bikpela kampani i save bihainim: Ol i putim laik bilong kastama i go pas.” Bilong amamasim ol man, sampela lotu i save soim “ol vidio, mekim ol soim, o pilaim ol musik bilong nau.” Sampela hetman long ol dispela lotu ol i tok ol i save skulim ol memba bilong ol long pasin bilong “kisim planti mani, stap helti, na stap bel isi​—no gat wari.” Sampela man i save sutim tok long ol dispela lotu, long wanem, ol i kain olsem ol lain i wok bisnis long amamasim ol man o long helpim ol yet tasol. Tasol nius i tok ol dispela lotu i save mekim olsem, long wanem, “em samting ol memba bilong ol i laikim.” Long pinis bilong ripot i gat dispela tok: “Pasin bilong bungim bisnis wantaim lotu i bin kamap gutpela tru.”

Maski ol arapela lotu i no insait tumas long wok bisnis, ol lotu i save mekim ol “samting ol memba bilong ol i laikim,” dispela i kirapim yumi long tingim tok lukaut bilong Pol: “Bihain ol man bai i no laik harim moa ol stretpela tok. Nogat. Yau bilong ol bai i skrap long harim ol narakain narakain tok, na ol bai i kisim planti man bilong skulim ol long kain tok ol i save laik long harim. Olsem na ol bai i givim baksait long tok tru na putim yau long ol kain kain stori nating.”​​—2 Timoti 4:​3, 4.

Em nau, planti lotu ol i bin kamap long dispela as: Ol man i laik kisim namba long bosim ol man, o kisim biknem, o amamasim ol man​—amamasim God, nogat. Olsem na yumi no ken kirap nogut olsem ol dispela lotu i insait tu long kain kain pasin nogut​—mekim nogut long ol pikinini, paulim mani, woa, o pasin teroris. Na planti lotu i save giamanim ol man. Yu ken mekim wanem na bai lotu i no ken giamanim yu?

[Rait long pes 4]

Planti lotu ol i bin kamap long dispela as: Ol man i laik kisim namba long bosim ol man, o kisim biknem, o amamasim ol man​—amamasim God, nogat