Laip Stori

Wok Bilong Jehova​—Em Gutpela Samting Tru i Winim Ol Narapela Wok

Stori bilong Zerah Stigers

Man bilong mi em i bin stap gutpela poroman tru bilong mi long mekim wok bilong God fultaim, tasol em i dai long 1938. Long dispela taim mi gat tupela pikinini man bilong lukautim​—wanpela em i nupela bebi na wanpela em i gat 10-pela krismas. Mi gat bikpela laik yet long mekim wok autim tok fultaim, tasol olsem wanem mi inap mekim? Mi bai stori long olsem wanem mi bin mekim olsem, tasol pastaim mi laik stori liklik long i stap bilong mi paslain long dispela taim.

MAMA i bin karim mi long Julai 27, 1907, long Alabama, Amerika. Bihain liklik, papamama i kisim mi wantaim tupela brata na wanpela susa bilong mi na mipela i go sindaun long Jojia. I no longtaim na mipela i go long Tennessee, na bihain mipela i go long hap bilong Tampa, long Florida. Long dispela hap, long 1916, mi lukim piksa wokabaut i gat toktok long en, em “Photo-Drama of Creation.” Piksa wokabaut i nupela samting long dispela taim, na olgeta manmeri i amamas tru long lukim piksa “Photo-Drama”!

Papamama bilong mi i bin givim bel tru long ritim nius Wastaua na ol narapela buk samting bilong Baibel. Papa i amamas long ritim ol nius na buk, tasol long dispela taim em i no save bung wantaim ol Sumatin Bilong Baibel, em nem bilong ol Witnes Bilong Jehova long dispela taim bipo. Tasol mama i bin kisim mipela ol pikinini i go long ol miting. Taim mipela i go sindaun long Niles, Michigan, long olgeta wik mipela i save kisim tren na go long South Bend, Indiana, em i longwe olsem 10-pela mail, bilong go long ol miting.

Long Julai 22, 1924, mi kisim baptais bilong makim olsem mi dediket pinis long Jehova. I no longtaim bihain, Mama i stretim rot bilong kamap kolpota, em nem bilong ol Witnes Bilong Jehova long dispela taim em ol i save autim tok fultaim. Gutpela pasin bilong em wantaim ol narapela i autim tok fultaim i kirapim laik bilong mi long mekim dispela wok.

Mi Painim Wanpela Poroman

Taim mi go long wanpela bikpela kibung long Indianapolis, Indiana, long 1925, mi bungim James Stigers, em i bilong Chicago. Wantu mi lukim olsem James em i man bilong givim bel long mekim wok bilong Jehova. Mi sindaun longwe long Chicago inap 160 kilomita, olsem na i hatwok long em i kam lukim mi o mi go lukim em. Long dispela taim bipo i gat wanpela kongrigesen tasol long dispela bikpela taun, na ol i save mekim miting long rum antap long wanpela haus em ol i rentim. Planti taim James i save raitim pas i kam long mi bilong strongim mi long ol samting bilong spirit. Mitupela i marit long Disemba 1926, na wanpela yia bihain mi karim namba wan pikinini man bilong mipela, em Eddie.

Bihain liklik, mitupela James i kirap mekim wok painia wantaim. Mipela i mekim dispela wok long 8-pela provins​—Michigan, Louisiana, Mississippi, South Dakota, Iowa, Nebraska, California, na Illinois​—na mipela i kisim bikpela amamas tru long dispela wok. Tasol taim sik i painim James, dispela gutpela amamas bilong mipela olsem famili i pinis inap sampela yia.

Sik bilong James i mekim na mani bilong mipela i pinis na long 1936 mipela i mas i go bek long Chicago na sindaun wantaim mama bilong James, em tu i wanpela Witnes. Taim sik bilong James i go bikpela na mi gat bel long namba tu pikinini, mi mekim wok mani long wanpela haus kaikai na mi kisim pe inap 1 dola long wanpela de. Gutpela tambu meri bilong mi i lukautim mipela na mipela i no sot long kaikai, na em i no laik kisim mani liklik long mipela bilong bekim pe bilong kaikai. Em i bin mekim gut tru long mipela.

James i sik inap olsem tupela yia na em i dai long sik ensefalaitis, em wanpela sik bilong kru. Dispela i kamap long Julai 1938. Long taim em i sik, em i no inap draivim ka o autim tok long ol haus, tasol taim rot i op em i no slek long autim tok long ol man. Bilong helpim famili bilong mipela long ol samting bilong skin, mi lusim wok painia. Mi bin mekim kain kain wok mani, tasol ol dispela wok i bilong sotpela taim tasol.

Mi karim pikinini man bilong mipela, em Bobby, long Julai 30, 1938, em 8-pela de tasol bihain long taim papa bilong em i dai. Tasol tambu meri i no laik bai mi go long haus sik bilong gavman i no gat pe. Em i stretim rot na bai mi ken go long gutpela haus sik na dokta bilong em i ken lukautim mi. Na tu, em yet i baim haus sik na dokta, em wanpela gutpela pasin Kristen mi bin tenkyu tru long en.

Mi Mekim Gen Wok Autim Tok Fultaim

Mipela i sindaun wantaim tambu meri inap long taim Bobby i winim pinis 2-pela krismas, na long dispela taim Eddie i gat 12-pela krismas. Mi mas lain long nupela sindaun bilong mi, tasol mi gat strongpela laik yet long mekim wok bilong Jehova fultaim. Long wanpela kibung long Detroit, Michigan, long 1940, mi bungim tupela marit painia em ol i kirapim mi long kam long South Carolina na mekim wok painia. Olsem na mi baim wanpela ka Pontiac bilong 1935 long 150 dola na mi redim ol samting bilong go sindaun long dispela hap. Long 1941, em yia Amerika i bin go insait long Wol Woa 2, mi wantaim tupela mangi bilong mi i go long hap saut, na mi insait gen long wok autim tok fultaim.

Taim mipela i go long South Carolina, pastaim mipela i sindaun long Camden, klostu long Little River, na bihain mipela go long Conway. Long dispela hap mi kisim wanpela liklik haus ka. Mi kisim tok orait long papa bilong wanpela sevis stesin long putim haus ka klostu long dispela hap, na skruim ges na pawa i kam long haus ka, na yusim toilet bilong ol. Long Wol Woa 2, ol man i save kisim petrol long liklik skel tasol, na mi no inap baim sampela. Olsem na mi baim wanpela olpela wilwil. Orait long 1943 i luk olsem mi no inap moa long mekim wok painia, long wanem, mani bilong mipela i pinis olgeta. Ol i singautim mi long mekim wok painia salim, olsem na mi kisim hap mani bilong helpim mi long baim kaikai samting. Long ol dispela yia i kam, Jehova i bin helpim mi tru!

I no gat narapela Witnes i stap long Conway long dispela taim, na i hatwok long mi wantaim tupela pikinini tasol i go autim tok. Olsem na mi raitim pas na tok mi laikim wanpela painia salim i ken poroman wantaim mi, na long 1944 mi kisim wanpela gutpela poroman tru​—em Edith Walker! Mitupela i wok wantaim long sampela hap inap 16 yia. Tasol sori tru, em i gat wanpela sik na em i mas i go bek long Ohio.

Ol Gutpela Blesing

Mi inap tingim bek planti amamas mi bin kisim long ol dispela yia, na wanpela mi tingim oltaim em bilong wanpela yangpela meri i gat 13 krismas, nem bilong em Albertha, em i bilong Conway na em i bin lukautim lapun bubu meri bilong em i no inap wokabaut, na tupela liklik brata bilong em. Em i laikim tumas ol tok i tru bilong Baibel mi skulim em na em i laik tokim ol narapela man long en. Em tu i kisim bikpela laik long mekim wok painia, na taim em i pinis long haiskul long 1950 em i kirap mekim wok painia. Nau 57 yia i go pinis na em i mekim yet wok autim tok fultaim!

Long 1951, ol i salim mitupela Edith i go wok painia inap liklik taim long Rock Hill, South Carolina, i gat wan wan Witnes tasol i stap long dispela hap. Bihain long dispela, mipela i go wok long Elberton, Jojia, inap 3-pela yia. Orait bihain mipela i go bek long South Carolina, na mi stap long dispela hap kirap long 1954 i go inap 1962. Long Walhalla, mi bungim wanpela lapun meri em yaupas, nem bilong em Nettie, na em i stap wanpis long hap bilong bus. Bilong mekim Baibel stadi bilong mipela, em i save ritim wanpela paragraf long buk, na long pinga mi makim askim bilong dispela paragraf i stap daunbilo long pes, orait nau em i save makim bekim i stap long paragraf.

Taim em i no klia gut long wanpela tok, em i save raitim askim bilong em long hap pepa, na mi raitim bekim long dispela pepa. Bihain Nettie i laikim tumas ol tok i tru bilong Baibel, olsem na em i kirap i kam long ol miting bilong kongrigesen na autim tok long ol haus. Em wanpela i go long ol haus na autim tok, tasol oltaim mi stap klostu liklik long em, olsem long hapsait bilong rot, na mi redi i stap sapos em i laik bai mi helpim em.

Taim mi stap long Walhalla, olpela ka bilong mi i no wok moa. Rot i op na mi inap baim wanpela ka long 100 dola, tasol mi no gat mani. Mi salim tok long wanpela Witnes i gat bisnis, na em i givim 100 dola long mi olsem dinau. Bihain liklik, mi kisim pas long susa bilong mi i tok, em wantaim ol brata susa bilong mi i kisim save olsem taim papa i dai i gat hap mani bilong em i stap long beng. Ol i toktok long samting ol bai mekim long dispela mani, na ol i pasim tok olsem ol bai salim long mi. Mani hia em inap olsem 100 dola!

Mi Painia Wantaim Ol Pikinini Bilong Mi

Taim Eddie na Bobby i mangi yet, oltaim ol i save stap wantaim mi taim mi go autim tok long ol haus. Long dispela taim bipo, i no planti man i save kisim drak, na pasin pamuk i no gat strong tumas long pulim ol yangpela. Mipela i gat ol liklik samting inap tasol long mipela, na mipela i putim tingting olgeta long wok autim tok, na dispela i bin helpim mi long abrusim planti hevi i save painim ol papamama bilong nau taim ol i laik stiaim ol pikinini bilong ol long mekim wok bilong Jehova.

Eddie i bin i go skul long Camden inap long taim em i pinisim gret 8, na nau em i laik mekim wok painia wantaim mi. Mitupela i amamas long wok painia wantaim inap sampela yia. Orait bihain em i kisim laik long wok long hetkota bilong ol Witnes Bilong Jehova long Brooklyn, New York, na em i wok long dispela hap kirap long 1947 i go inap 1957. Long 1958 em i maritim Albertha, em bipo mi bin stadi wantaim em long Baibel, na tupela i wok painia wantaim. Long 2004 mi kisim bikpela amamas tru taim mipela tripela i go long Skul Bilong Wok Painia!

Mi tingim wanpela taim inap planti yia i go pinis, mi bin harim liklik mangi Bobby i beten askim Jehova long helpim mi long kisim sampela bensin bilong ka na bai mi ken i go mekim ol Baibel stadi bilong mi. Kirap long taim em i liklik yet na i kam inap nau, Bobby i kamapim olsem em i laikim tumas wok bilong autim tok, na em i mekim wok painia inap sampela yia. Tasol bikpela hevi bilong famili i bin painim Bobby tu. Em i bin marit klostu tupela yia tasol, na long 1970 meri bilong em i dai taim em i laik karim tupela pikinini i kamap wantaim, na tupela pikinini tu i dai. Oltaim mi save stap klostu long Bobby, na mitupela i pas gut wantaim.

Mi Mekim Yet Wok Painia!

Long 1962 ol i salim mi i kam mekim wok painia long kongrigesen long Lumberton, North Carolina, na mi stap yet long dispela kongrigesen, inap 45 yia pinis. Mi wok long draivim ka bilong mi inap long taim mi gat 84 krismas samting. Wanpela famili Witnes i stap klostu long mi ol i save kisim mi i go long ol miting bilong kongrigesen na long autim tok.

Mi gat samting olsem wanpela stik wokabaut na wanpela wilsia tu, tasol mi no gat wok long ol dispela samting, long wanem, mi yet mi inap wokabaut. Long ol yia i kam inap nau, mi no save sik tumas, na mi tenkyu tru long Jehova long dispela samting. Long nau mi gat liklik hevi long ai bilong mi tasol. Mi no save lusim miting​—sapos mi gat bikpela sik, long dispela taim tasol mi save lusim, na mi wok yet olsem painia oltaim.

Mi bin amamas long mekim wok painia winim 70 yia pinis, olsem na mi inap tru long tok olsem Jehova i bin helpim mi long olgeta dispela yia.a Mi save pinis olsem mi no wanpela savemeri o meri bilong wok hariap, tasol Jehova i save long samting mi inap mekim na samting mi no inap mekim. Mi tenkyu long em i save olsem mi traim bes bilong mi, na em i bin mekim wok long mi.

Mi ting em i bikpela samting long yumi mas mekim wok bilong Jehova inap tru long strong bilong yumi, long wanem, yumi gat bikpela dinau tru long em. I go inap long strong bilong mi i pinis, mi laik mekim wok painia tasol. Em i wanpela gutpela wok tru mi bin kisim! Mi beten askim Jehova long mi ken mekim wok bilong em i go inap oltaim oltaim.

[Futnot]

[Piksa long pes 13]

Mi wantaim man bilong mi i bin raun long dispela ka long mekim wok painia

[Piksa long pes 14]

Mi wantaim tupela pikinini man bilong mi long 1941

[Piksa long pes 15]

Mi wantaim Eddie na Bobby long nau