Hatwok Bilong Mekim Pasin Daun
LONG planti man, i luk olsem i no gutpela long mekim pasin daun long nau. Ol man i gat nem na i olsem olgeta wok bilong ol i kamap gutpela, ol i resis long winim ol narapela, na ol i strong long mekim laik bilong ol yet tasol. Ol manmeri bilong graun i mangalim gutpela sindaun bilong ol maniman na ol man i gat biknem, tasol ol i no mangalim sindaun bilong ol man nating i gat pasin daun. Taim olgeta wok bilong ol i kamap gutpela, ol i save hambak na tok ol i bin mekim long hatwok bilong ol yet. Ol i no gat pasin daun—ol i hambak na tok, ol i bin mekim long strong na save bilong ol yet.
Wanpela saveman bilong Kanada i toktok long wanpela kain pasin i kamap long kantri bilong em, olsem ol man i tingim ol yet tasol. Sampela i pilim olsem ol man i strong long kisim amamas tasol, na ol i no tingim ol samting ol i gat wok long mekim na ol i luksave olsem ol man i save tingim ol yet tasol. Olsem na sampela bai ting pasin daun i no inap helpim yumi liklik.
Tru, klostu olgeta bai tok, pasin daun i gutpela samting long ol arapela i ken bihainim, long wanem, i no hatwok long sindaun gut wantaim kain man olsem. Tasol nau long dispela taim bilong resis long kisim planti samting, sampela man i ting sapos ol i bihainim pasin daun ol arapela bai ting ol i no gat bun.
Baibel i tok profet olsem, long nau ol man bai “litimapim nem bilong ol yet na hambak nabaut.” (2 Timoti 3:1, 2) Ating yu wanbel olsem dispela tok profet i wok long kamap tru long nau, a? Orait yu ting pasin daun i gutpela samting? O yu ting olsem ol man bai ting ol man i gat pasin daun, ol i no gat bun na i no hatwok long mekim nabaut long ol?
Baibel i kamapim as na i gutpela long kisim pasin daun. Baibel i givim stretpela tingting long yumi long pasin daun na i soim yumi olsem pasin daun tru em mak bilong man i gat strongpela bel—i no mak bilong man i no gat bun. Stori i kamap bihain long dispela bai kamapim klia as bilong dispela.
[Piksa long pes 3]
Yumi mas i gat wanem tingting long ol wok samting yumi bin mekim i kamap gutpela?