Yumi Stap Bilong Mekim Wanem?

BILONG WANEM BEKIM BILONG DISPELA ASKIM I BIKPELA SAMTING? Wanpela samting i save mekim ol man i tingting planti em dispela tingting olsem i stap bilong yumi i no gat as bilong en. Tasol man i save long as na em i stap laip, em inap karim ol hevi i painim em. Wanpela dokta, Viktor E. Frankl, em i bin abrusim bagarap bilong ol Natsi, em i tok: “Sapos man i save olsem laip bilong em i gat as bilong en, dispela inap helpim em gut long karim ol bikpela hevi. Mi laik tok, i no gat narapela samting inap helpim em olsem dispela.”

Tasol ol man i gat kain kain tingting long dispela samting. Planti i ting em wok bilong olgeta man wan wan yet long skelim olsem i gat wanem as na em i stap. Tasol sampela man em ol i bilip long evolusen ol i tok i no gat as tru bilong i stap bilong yumi.

Yumi mas kisim save long dispela long Man Bilong Givim Laip, em God Jehova. Skelim tok Baibel i mekim long dispela samting.

Tok Baibel i Mekim

Baibel i tok i gat as na God Jehova i wokim man na meri. Jehova i tokim tupela tumbuna papamama bilong yumi olsem:

Stat 1:​28. “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.”

God i laik bai Adam na Iv na ol pikinini bilong tupela i mekim graun olgeta i kamap Paradais. Em i no laik bilong God olsem ol man bai i go lapun na i dai; na em i no laik bai ol man i bagarapim graun na ol samting i stap long en. Tasol tupela namba wan tumbuna papamama bilong yumi i no mekim samting i stret, olsem na yumi kisim sin na dai long tupela. (Stat 3:​2-6; Rom 5:12) Maski i olsem, laik bilong Jehova i no senis. Klostu bai graun i kamap wanpela ples paradais.​—Aisaia 55:​10, 11.

Jehova i wokim yumi na givim strong na save long yumi bilong inapim samting em i tingting pinis long mekim. Em i no wokim yumi bilong bosim wokabaut bilong yumi yet, nogat. Lukim tok Baibel i mekim long ol samting God i laik mekim long yumi.

Saveman 12:13. “Bilong pinisim olgeta toktok, mi laik tok olsem, namba wan samting long laip bilong yumi man i olsem. Yumi mas aninit long God tasol na bihainim ol lo bilong em.”

Maika 6:8. “[Bikpela] i laik bai yumi mekim pasin olsem tasol. Yumi mas bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim God bilong yumi, na bihainim em wanpela tasol.”

Matyu 22:​37-​39. “ ‘Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.’ Dispela lo em i bikpela, na em i namba wan tru. Na namba 2 lo em i wankain olsem dispela. Em i olsem, ‘Yu mas laikim ol wantok olsem yu laikim yu yet.’ ”

Olsem Wanem Bekim Bilong Baibel i Mekim Bel Bilong Man i Stap Isi Tru?

Bilong wanpela masin i ken wok gut, ol i mas mekim wok i stret long en na long pasin man i bin wokim dispela masin i bin makim. Olsem tasol sapos yumi laik abrusim ol samting inap bagarapim yumi​—long ol samting bilong tingting, o long ol samting yumi pilim long bel o long pasin bilong yumi long pas gut wantaim God​—yumi mas mekim wok long laip bilong yumi long pasin Man i bin wokim yumi i laikim. Skelim olsem wanem pasin bilong save long laik bilong God inap mekim bel bilong yumi i stap isi long ol samting olsem:

Taim ol man i makim ol bikpela samting long laip bilong ol, planti i lusim bikpela haptaim long bungim mani kago. Tasol Baibel i tok lukaut olsem “ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut.”​—1 Timoti 6:​9, 10.

Tasol ol man i lain long laikim God na i no mani, ol i kisim save long pasin bilong i stap belgut. (1 Timoti 6:​7, 8) Ol i kliagut olsem em i bikpela samting long ol i mas wok strong na ol i save olsem ol i gat wok bilong lukautim ol yet long ol samting bilong skin. (Efesus 4:28) Tasol ol i tingim tu tok lukaut bilong Jisas: “I no gat wanpela man inap i stap aninit long tupela bosman wantaim. Bai em i laikim wanpela na bel nogut long narapela. Bai em i harim tok bilong wanpela na givim baksait long narapela. Yupela i no inap i stap aninit long God na long mani wantaim.”​—Matyu 6:24.

Olsem na ol man i laikim God ol i no putim wok mani o mani kago i stap nambawan samting long laip bilong ol, nogat. Ol i putim wok bilong God i stap nambawan. Ol i save sapos ol i mekim olsem, God Jehova bai lukautim ol. Tru tumas, Jehova i save em i mas mekim olsem.​—Matyu 6:​25-​33.

Taim ol i mekim ol samting wantaim ol narapela, planti i tingim ol yet pastaim. Long nau, long olgeta hap i no gat bel isi, long wanem, planti manmeri i “laikim ol yet tasol, . . . na ol i no save long pasin bilong i stap pren bilong ol arapela.” (2 Timoti 3:​2, 3) Taim wanpela man i mekim ol i bel hevi o i no wanbel long tingting bilong ol, ol i save “kros na belhat na bikmaus na tok bilas.” (Efesus 4:31) Dispela kain pasin bai i no mekim ol narapela i stap bel isi, nogat. Dispela pasin bilong man i no bosim gut bel bai “mekim ol arapela man i kros.”​—Sindaun 15:18.

Tasol ol man i save bihainim tok bilong God long laikim ol narapela, ol i save ‘mekim gutpela pasin long ol arapela na givim bel long ol, na lusim sin bilong ol.’ (Efesus 4:32; Kolosi 3:13) Maski ol man i mekim nogut long ol, ol i wok strong long bihainim pasin bilong Jisas; taim ol man i mekim nogut long Jisas, “em i no bekim.” (1 Pita 2:23) Wankain olsem Jisas, ol i save olsem pasin bilong mekim gut long ol narapela bai givim amamas long ol, maski sampela man em ol i mekim gut long ol i no save tenkyu long samting ol i mekim. (Matyu 20:​25-​28; Jon 13:​14, 15; Aposel 20:35) God Jehova i save givim holi spirit long ol man i save bihainim pasin bilong Pikinini bilong em, na holi spirit i save givim bel isi tru long ol.​—Galesia 5:22.

Tasol olsem wanem tingting bilong yu long ol samting bai kamap bihain bai mekim bel bilong yu i stap isi?

[Rait long pes 6]

Man i mas save long as na em i stap laip

[Piksa long pes 7]

Jisas i skulim yumi long rot bilong i stap bel isi