Autim Gutnius Long Ol Ples Mounten Bilong Andes
LONG dispela hap, mipela 18 manmeri i slip antap long graun. Mipela pilim kol na skin i guria na mipela i stap insait long ol blanket bilong mipela, na harim bikpela ren i wok long pundaun antap long kapa bilong haus em mipela i slip long en. Taim mipela lukim ol samting insait long dispela liklik haus i stap nogut, mipela i kisim tingting olsem no gat ol man i bin slip long dispela haus bipo, ating ol animal tasol.
Bilong wanem mipela 18 manmeri i go long dispela hap? Laik bilong mipela long bihainim tok bilong Jisas long autim gutnius “long olgeta hap bilong graun” i as na mipela i go. (Ap. 1:8; Mt. 24:14) Mipela i go bilong autim tok long wanpela longwe hap long ol maunten Andes bilong Bolivia.
Hatwok Bilong i Go Long Dispela Hap
Namba wan hatwok bilong mipela em mipela i mas kamap long ples mipela i laik i go long en. Mipela i kisim save olsem ol PMV bilong i go long kain ol longwe ples i no save ron long wanpela taim stret. Taim bas bilong mipela i kam kamap, mipela i luksave olsem em i no bikpela olsem ol i bin tok, olsem na sampela bilong mipela i no gat sia bilong sindaun. Tasol bihain mipela olgeta i kamap long ples mipela i laik i go long en.
Bikpela tingting bilong mipela em long i go autim tok long ol man i stap long ol ples antap long maunten Andes bilong Bolivia. Olsem na taim bas i lusim mipela, mipela i kisim ol kaikai na kago samting, na wokabaut isi isi, narapela i bihainim narapela na i bihainim rot arere long maunten i go antap.
I luk olsem ol ples i liklik, tasol ol haus i stap longwe longwe, olsem na mipela i lusim planti aua long i go long wan wan ples. Maski mipela i wokabaut longwe, olgeta taim mipela i save lukim narapela haus i stap longwe. Planti taim mipela i save paul long ol rot insait long ol gaden.
“Bilong Wanem Yupela i No Laik Kam Bipo?”
Wanpela meri i kirap nogut long longwe rot mipela i bin wokabaut long en, olsem na em i larim mipela i yusim haus kuk na paiawut bilong em long kukim kaikai bilong belo. Taim wanpela man i kisim save long tok bilong Baibel long ol man i dai pinis ol i stap olsem wanem, em i tok: “Bilong wanem yupela i no laik kam bipo?” Em i gat bikpela laik long kisim save moa, olsem na taim mipela i lusim ples bilong em, em i kam wantaim mipela bilong givim sampela askim moa taim mipela i wokabaut long rot. Narapela man i no bin save long ol Witnes Bilong Jehova bipo olsem na em i laikim tru ol buk na nius bilong mipela. Em i tok tenkyu tru long mipela i go lukim em na em i givim ki bilong wanpela haus long mipela we mipela inap stap wanpela nait long en.
Wanpela nait, ples i tudak tru na mipela i no save olsem mipela i sanapim ol haus sel bilong mipela namel long ol haus bilong ol bikpela blakpela anis. Ol i belhat na kaikai mipela. Mipela i taiet stret na les long kirap, na gutpela tru olsem i no longtaim na ol anis i no bisi moa long mipela.
Pastaim, baksait na sait bilong mipela i pen, long wanem, mipela i slip long graun, tasol long nait mipela i lain pinis long en. Mipela i no tingim moa ol pen long moning, taim mipela i lukim ol gutpela ples daun, na ol klaut i ron isi isi i go antap long sait bilong ol maunten, na ol maunten i gat ais antap long en i stap longwe. Ples i stap isi tru na mipela i harim nois bilong wara na krai bilong ol pisin.
Taim mipela i waswas pinis long liklik wara, mipela i skelim teks bilong de, kaikai, na kirap wokabaut isi isi i go antap long ol arapela ples i stap longwe. Mipela i go antap long maunten na gutpela samting i kamap. Mipela i bungim wanpela lapun meri na em i krai taim em i kisim save olsem nem bilong God, em Jehova, i stap long Baibel. Em i amamas tru. Nau em inap kolim nem bilong God long ol beten bilong em!
Wanpela lapun man i tok ating God i mas tingim em, na wantu em i kirap mekim wanpela singsing i tok ol ensel i bin salim mipela. Narapela man i sik na i stap long haus bilong em i tokim mipela olsem i no gat wanpela long ples bilong em yet i save kam lukim em. Em i kirap nogut olsem mipela i lusim La Paz na i kam lukim em. Na tu, narapela man i bin kirap nogut olsem ol Witnes Bilong Jehova i save go long haus bilong ol man na autim tok, tasol ol arapela lotu i save paitim belo na singautim ol man.
Olgeta haus long dispela hap i no gat pawa olsem na ol man i save slip taim ples i tudak na kirap taim san i kamap. Olsem na bilong painim ol man long haus bilong ol, mipela i mas kirap autim tok long 6 klok long moning. Sapos nogat, planti manmeri bai i go pinis long gaden. Bihain, sampela husat i kirap pinis long wok i amamas long lusim haptaim na putim yau long ol tok bilong Baibel mipela i autim, na larim bulmakau i save brukim graun i kisim gutpela malolo. Planti manmeri mipela bungim long haus i bin putim skin bilong sipsip bilong mipela i ken sindaun long en na ol i singautim famili long kam bung na harim tok mipela i autim. Sampela fama i bin givim mipela ol bikpela bek kon, long wanem, ol i amamas long ol buk na nius bilong Baibel mipela i lusim wantaim ol.
“Yupela i No Lusim Tingting Long Mi”
Tru tumas, bilong ol man i kisim sampela save moa long tok i tru bilong Baibel, yumi mas i go bek na lukim ol. Planti i strong long mipela i mas i go bek na givim sampela skul moa long ol. Olsem na mipela i bin go tupela o tripela taim samting long dispela hap bilong Bolivia.
Long narapela taim mipela i go, wanpela lapun meri i amamas tru olsem mipela i go bek na em i tok: “Yupela i olsem pikinini bilong mi. Yupela i no lusim tingting long mi.” Wanpela man i tok tenkyu long wok bilong mipela na singautim mipela long stap long haus bilong em long narapela taim mipela i go. Wanpela gutpela samting tru i kamap long hatwok bilong mipela, em mipela harim olsem wanpela meri mipela i bin toktok wantaim em long wanpela taim mipela i bin go bek, em i go sindaun long biktaun na nau em i wok long autim gutnius.
Long laspela de bilong namba wan raun bilong mipela, kerasin bilong kuk long liklik praimas i pinis na klostu olgeta kaikai mipela i kisim i go i pinis. Mipela bungim sampela paiawut bilong mekim paia, kukim laspela kaikai mipela i gat, na kirap wokabaut i go bek. Taun mipela inap kisim bas long en i stap longwe inap planti kilomita. Mipela i go kamap long en taim ples i tudak pinis.
Go Bek Long Ples
Long raun bilong mipela i go bek i gat hevi, long wanem, bas i bagarap. Bihain, mipela i kalap baksait long wanpela trak na pas pas stret wantaim ol man. Dispela i givim rot long mipela long autim tok long ol arapela pasindia husat i laik save long as na mipela i go long dispela hap. Maski ol i gat pasin bilong sem, ol i save mekim pasin pren na mekim gut long ol man.
Mipela i ron 9-pela aua long baksait bilong dispela trak na mipela i kamap long haus—mipela wet na kol nogut tru. Tasol gutpela samting i kamap long raun bilong mipela. Taim mipela i ron long rot, mipela inap stretim rot long mekim Baibel stadi wantaim wanpela meri husat i save stap long taun.
Em wanpela gutpela samting tru long autim gutnius long ol manmeri long kain ol longwe ples olsem. Mipela i bin autim tok long fopela bikpela ples na planti ol liklik ples. Mipela i tingim dispela tok: “Bai ol manmeri i amamas tru long lukim wanpela man i ran i kam long ol ples maunten, bilong bringim gutpela tok.”—Ais. 52:7; Ro. 10:15.
[Piksa long pes 17]
Redi long autim gutnius