Mi Pasim Tok Long Bungim Em Gen

MI WANPELA meri bilong Spen. Taim mi yangpela mama mi bin mekim wanpela bikpela tok promis. Orait nau mi laik stori long samting i bin kirapim mi long pasim tok olsem.

Taim mi liklik, bel isi i no stap insait long famili bilong mipela. Bel bilong mipela i bagarap tru taim liklik brata bilong mi i dai long wanpela eksiden long taim em i gat 4-pela krismas. Na tu, ol pasin nogut bilong Papa i mekim na i hatwok long Mama i stap amamas. Tasol dispela samting i no pasim Mama long skulim mi na bikpela brata bilong mi long bihainim stretpela pasin.

Bihain, brata bilong mi i marit, na mi tu i marit. I no longtaim bihain, Mama i kisim sik kensa na em i dai. Tasol paslain long em i dai, em i givim wanpela gutpela samting tru long mipela.

Wanpela meri i bin toktok wantaim em long tok promis bilong Baibel long ol man i dai pinis ol bai kirap bek, na Mama i orait long stadi long Baibel. Ol gutpela tok bilong Baibel em i kisim save long en i helpim em long pilim olsem laip bilong em i gat as bilong en na i helpim em long i stap amamas long laspela hap taim bilong em long i stap laip.

Taim mipela i lukim ol gutpela samting em tok bilong Baibel i mekim long Mama, mi na brata bilong mi i kirap tu long stadi long Baibel. Mi kisim baptais na kamap wanpela Witnes Bilong Jehova wanpela mun paslain long mi karim namba 2 pikinini bilong mi, em wanpela naispela pikinini meri mipela givim nem Lucía long em.

De mi kisim baptais em i bikpela samting tru long mi, long wanem, nau mi bilong Jehova, mi bin dediketim mi yet long Jehova long mekim laik bilong em i go inap oltaim oltaim. Mi amamas tu long autim bilip bilong mi long pikinini man na pikinini meri bilong mi em mi save laikim ol tru.

Tasol dispela amamas i no stap longpela taim. Taim Lucía i gat fopela krismas, em i kirap long pilim bikpela pen long bel. Dokta i glasim Lucía tupela o tripela taim samting na bihain dokta i tok wanpela bikpela buk, sais bilong en i olsem orens, i stap long lewa bilong em. Dokta i tok dispela buk, o neuroblastma, i gat sik kensa long en na i save go bikpela hariap. Dispela i mekim na inap sevenpela yia Lucía i go i kam long haus sik bilong daunim dispela sik kensa, na em i save stap long haus sik planti de.

Redi Long Helpim Ol Narapela

Insait long ol dispela yia i gat hatwok long en, planti taim Lucía i save strongim mi taim em i holimpasim mi na givim kis long mi. Pasin bilong em long stap strong na karim hevi bilong dispela sik i mekim na ol wokman long haus sik i kirap nogut tru. Long olgeta taim em i save amamas long wok wantaim ol nes, na helpim ol long kisim ol kaikai, wara, na ol narapela samting i go long ol pikinini i slip long ol rum i stap klostu. Na tu, ol nes i givim Lucía wanpela waitpela saket em ol dokta i save werim na wanpela liklik kat bilong pasim long klos bilong em na bai ol narapela i ken save olsem em i wanpela helpim bilong nes.

Wanpela wokmeri bilong haus sik i tingim gutpela pasin bilong Lucía na i tok: “Mi pilim tru samting Lucía i bin mekim. Em i save wok strong, em inap tingim na wokim samting, na em i save amamas long penim ol piksa. Na tu, em i meri bilong toktok na kamapim tingting bilong em, na mekim ol samting olsem meri i bikpela pinis.”

Lucía i kisim strong na bel isi i kam long Tok Bilong God. (Hi. 4:12) Em i bilip tru olsem long nupela taim “ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen,” olsem Baibel i tok promis long en. (KTH 21:4) Em i save tingim gut ol narapela ,olsem na long olgeta taim, em i save redi long toktok wantaim ol long ol tok bilong Baibel. Strongpela bilip bilong Lucía long kirap bek i helpim em long i stap isi na amamas, maski em i save olsem sik bilong em i no inap pinis. (Ais. 25:8) Em i holim dispela tingting i go inap long taim em i dai.

Long dispela de stret mi pasim tok long bungim em gen. Lucía i hatwok long opim ai bilong em. Papa bilong em i holim wanpela han bilong em na mi holim narapela han. Mi tokim em isi: “No ken wari, mi no inap lusim yu, pulim win isi isi. Taim yu kirap bek, bai yu pilim orait. Yu no inap pilim pen gen, na bai mi stap wantaim yu.”

Nau mi mas truim dispela tok mi bin pasim wantaim em. Mi save olsem dispela haptaim bilong wetim em i kirap bek bai i hatwok. Tasol mi save tu olsem sapos mi stap isi na bilip tru long Jehova na stap gut long em, bai mi stap long taim Lucía i kirap bek.

Samting Lucía i Mekim i Helpim Mipela

Gutpela pasin bilong Lucía long sanap strong, na tu, ol gutpela helpim kongrigesen i givim mipela, dispela i kirapim tru bel na tingting bilong man bilong mi, em i no wanbilip bilong mi. Long de Lucía i dai, man bilong mi i tokim mi olsem em i mas tingting gen long ol samting em i mas mekim. Sampela wik bihain, em askim wanpela elda long kongrigesen long stadi wantaim em long Baibel. I no longtaim na man bilong mi i kirap long go long olgeta miting. Jehova i helpim em na em i lusim pasin bilong smok, em samting bipo em i bin hatwok long lusim.

Bel hevi mi pilim taim Lucía i dai i no pinis olgeta, tasol mi amamas tru long Jehova, long wanem, samting Lucía i mekim i helpim mipela. Mi na man bilong mi i strongim bel bilong narapela narapela long ol gutpela tok promis bilong kirap bek, na mipela inap piksaim long tingting taim we mipela bai lukim Lucía gen​—amamas na naispela smail long pes bilong em.

Indai bilong pikinini bilong mi i mekim sampela samting long wanpela neiba. Long wanpela Sarere moning long taim bilong ren, wanpela meri em pikinini man bilong em i save go long wankain skul em Lucía i bin go long en, em i kam long haus bilong mipela. Narapela pikinini man bilong em i gat 11-pela krismas i bin kisim wankain sik olsem bilong Lucía na i dai. Taim em i kisim save long samting i kamap long Lucía, meri hia i painim hap mipela i stap long en na i kam lukim mipela. Em i laik save olsem wanem mi sanap strong na karim hevi bilong i dai bilong Lucía, na em i laik bai mipela i ken kamapim wanpela grup bilong mipela yet long helpim ol narapela mama husat i gat wankain hevi.

Mi tokim em olsem mi yet i bin lukim wanpela tok promis long Baibel i mekim gut bel bilong mi; dispela tok promis i gutpela tru, winim olgeta tok promis ol man inap mekim. Em kirap nogut taim mi ritim tok bilong Jisas i stap long Jon 5:​28, 29. Em i orait long stadi long Baibel na i no longtaim em i kirap long pilim “bel isi God i save givim.” (Fl. 4:7) Planti taim, taim mipela i stadi long Baibel, mipela i save malolo liklik na piksaim long tingting olsem mipela i stap long nupela taim na amamas long bungim gen famili bilong mipela i kirap bek.

Long sotpela haptaim Lucía i stap laip, samting em i mekim i helpim mipela inap oltaim oltaim. Bilip bilong em i bin helpim famili bilong mipela long wanbel wantaim long mekim laik bilong God, na i bin strongim mi long sanap strong. Tru tumas, yumi olgeta husat i gat sampela long famili i bin i dai, yumi ken tingting long bungim ol gen taim ol i kirap bek.

[Piksa long pes 20]

Piksa bilong Paradais em Lucía i droim