Ol Man i Askim
Graun Bai Abrusim Bagarap?
Ol bikpela bagarap i no inap bagarapim graun bilong yumi. Bilong wanem yumi tok olsem? Long wanem, God i tok promis olsem graun “i no inap surik liklik. Nogat tru.” (Song 104:5) Olsem Baibel i tok, “ol manmeri i save dai na nupela lain i save kamap na senisim ol. Tasol graun i no save senis. Oltaim em i stap olsem tasol.”—Saveman 1:4.
Long Song 104:5, ol i mekim wok long tupela tok Hibru bilong makim olsem graun bai i stap strong na em bai i no inap senis. Dispela tupela tok em—ʽoh·lamʹ bilong makim “taim i no gat pinis bilong en” na ʽadh bilong makim “oltaim oltaim.” Ol inap tanim dispela tok ʽoh·lamʹ bilong makim “planti yia” o “stap oltaim.” Buk Students’ Hebrew and Chaldee Dictionary, bilong Harkavy i tok, dispela tok ʽadh i makim “stap longpela taim, stap oltaim oltaim.” Dispela tupela tok Hibru i kamapim klia olsem, dispela tok bilong graun bai i stap oltaim oltaim em i tru olgeta. Skelim tripela samting em Baibel i kamapim bilong yumi ken bilip tru olsem graun bai i stap oltaim oltaim.
Namba wan samting, God i wokim graun bilong ol man i ken i stap long en—bilong stap olsem wanpela paradais long olgeta hap i pulap long ol gras na diwai samting, na i no bilong i stap nating, nogat. Aisaia 45:18 i tok long Jehova olsem: “Bikpela tasol em i God. Em i bin wokim skai na graun i kamap strong tru. Em i no wokim graun bilong i stap nating. Nogat. Em i bin wokim bilong olgeta samting i ken i stap long en.”
Namba tu samting, God i bin tok promis olsem ol man i bihainim laik bilong em, ol bai i stap oltaim long dispela graun na stap bel isi. Maika 4:4 i tok promis olsem: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret. Bikpela I Gat Olgeta Strong i bin promis long mekim ol dispela samting.” Olsem God i tingting pinis long kamapim, dispela graun bai i stap oltaim olsem ples ol man i mas i stap long en, sapos nogat, orait ol tok promis bilong God bai i no gat as bilong en.—Song 119:90; Aisaia 55:11; 1 Jon 2:17.
Namba tri samting, God i givim wok long ol man long lukautim dispela graun. Baibel i tok: “Heven em i ples bilong God tasol, na em i givim graun long yumi manmeri.” (Song 115:16) Yu ting wanpela gutpela papa inap givim wanpela naispela presen long pikinini bilong em na bihain papa i kirap bagarapim dispela presen? Ating papa i no inap tru long mekim olsem, a? Olsem tasol, Jehova i no inap mekim kain samting olsem long graun na ol manmeri i stap long en, long wanem, ‘God yet em i as bilong pasin laikim.’—1 Jon 4:8.
Jisas Krais i strongim dispela tok bilong Papa bilong em taim em i tok: “Tok bilong yu i tru olgeta.” (Jon 17:17) Na God, em Man i no inap giaman, em i tok promis olsem: “Ol stretpela man bai i kisim graun God i givim ol, na bai ol i stap oltaim long en.”—Song 37:29; Taitus 1:2.
[Piksa Kredit Lain long pes 31]
Globe: Based on NASA photo