Skulim Ol Pikinini Bilong yu

Siem i Lukim Pasin Nogut Long Tupela Narapela Narapela Haptaim

PIKININI man bilong Noa, em Siem, em i bin abrusim bagarap long wanpela haptaim, na em i go insait long narapela haptaim. Olsem wanem? Yu save bilong wanem God i bin bagarapim namba wan haptaim em Siem i bin stap long en? Na yu save olsem wanem Siem na famili bilong em i abrusim bagarap na i go insait long namba tu haptaim?​—a Yumi ken stori long dispela samting.

Baibel i tok olsem taim Siem i bin yangpela man, “pasin bilong ol manmeri . . . i nogut tru.” Ol manmeri i save “tingting tasol long ol samting nogut.” Olsem na yu ting God i mekim wanem?​​— God i mekim Bikpela Tait i kamap na bagarapim ol manmeri nogut. Aposel Pita i tok: “Bikpela tait i karamapim dispela graun, na graun i bagarap olgeta.”​—Stat 6:5; 2 Pita 3:6.

Yu save long as na God i bagarapim ol dispela manmeri?​​— Ol i man nogut, na olgeta taim ol i save “tingting tasol long ol samting nogut.” Jisas i bin stori long dispela na em i tok: “Taim bikpela tait i no kamap yet,” ol manmeri i wok long amamas, “kaikai na dring,” na tu ‘ol i marit.’ Na Jisas i tok moa: “Ol i no save long dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri.”​—Matyu 24:​37-39.

Ol dispela manmeri i no luksave long wanem samting?​​— Papa bilong Siem, em Noa, “em man bilong tokaut long stretpela pasin,” tasol ol man i no harim tok bilong em. Noa i harim tok bilong God na wokim wanpela sip. Dispela sip bai i karim em na famili bilong em na ol i no ken bagarap long Bikpela Tait. Noa na meri bilong em, na ol pikinini man bilong em​—Siem, Ham, na Jafet​—na ol meri bilong ol, ol tasol i tingim ol samting God i laik ol i mas mekim. Olgeta narapela manmeri i mekim ol samting ol yet i laik mekim, olsem na Bikpela Tait i bagarapim ol.​—2 Pita 2:5; 1 Pita 3:20.

Inap wanpela yia bihain long Bikpela Tait, Siem na famili bilong em i lusim sip na i kam sanap long graun i drai. Olgeta man nogut i no stap moa, tasol i no longtaim na senis i kamap. Kenan, em pikinini man bilong Ham, brata bilong Siem, em i mekim wanpela samting i nogut tru olsem na Noa i tok: “Bikpela hevi i ken i stap antap long Kenan.” Tumbuna pikinini bilong Ham, Nimrot, em tu i man nogut. Em i birua long trupela God, Jehova, na em i tokim ol man long wokim wanpela longpela taua em ol i kolim Babel na bai ol man i ken givim biknem long ol. Yu ting Siem na papa bilong em i pilim olsem wanem long dispela pasin?​—Stat 9:25; 10:​6-10; 11:​4, 5.

Tupela i bel hevi long dispela pasin, na Jehova tu i bel hevi long dispela. Yu save Jehova i mekim wanem?​​— Em i paulim tokples bilong ol bambai narapela i no ken save long tokples bilong narapela. Bihain ol i lusim wok bilong wokim taua na ol i go sindaun long narapela narapela hap. Ol lain i mekim wankain tokples ol i go sindaun wantaim. (Stat 11:​6-9) Tasol God i no senisim tokples bilong Siem na famili bilong em. Olsem na ol inap sindaun klostu wantaim na narapela i helpim narapela long mekim laik bilong God. Yu save hamas yia Siem i bin mekim wok bilong Jehova?​—

Siem i stap inap 600 krismas na em i dai. Em i stap inap 98 yia paslain long Bikpela Tait na 502 yia bihain long en. Yumi save olsem em i bin helpim Noa long wokim sip na givim tok lukaut long ol manmeri long Bikpela Tait bai kamap. Siem i stap winim 500 yia bihain long Bikpela Tait, na yu ting em i mekim wanem insait long dispela haptaim?​​— Noa i kolim Jehova olsem “Bikpela bilong Siem.” Ating Siem i mekim yet wok bilong Jehova na helpim ol famili bilong em tu long mekim olsem. Bihain, Abraham, Sara, na Aisak, ol i kamap long lain tumbuna pikinini bilong Siem.​—Stat 9:26; 11:​10-31; 21:​1-3.

Tingim, pasin nogut i bin kirap long taim bilong Siem, em i wok long i go nogut moa yet nau long taim bilong yumi. Wanem samting bai kamap long en?​— Baibel i tok pasin nogut “bai i pinis.” Tasol tingim dispela promis: “Man i bihainim tok bilong God, em bai i stap oltaim.” Olsem na sapos yumi mekim laik bilong God, yumi inap kisim laip wantaim ol man husat bai abrusim bagarap na i go insait long nupela taim God bai kamapim. Na bihain, God bai helpim yumi long stap amamas oltaim long graun!​—1 Jon 2:17; Song 37:29; Aisaia 65:17.

[Futnot]

Ol Askim:

○ Siem i bin stap long wanem namba wan haptaim? I gat wanem tupela as na God i bin bagarapim ol man long dispela namba wan haptaim?

○ Siem i stap hamas yia? Em i wanem kain man?

○ Klostu nau wanem samting bai kamap long dispela graun?

○ Yumi mas mekim wanem bilong abrusim bagarap long pinis bilong dispela taim nogut?