Go Klostu Long God

Yu Ting God Inap Pilim Nogut Long Samting Em i Bin Mekim?

HETMAN 2:​11-​18

YUMI olgeta yumi sinman, olsem na sampela taim yumi save pilim nogut long samting yumi bin mekim. Olsem, ating yumi sori taim yumi luksave olsem yumi mekim popaia. Tasol yumi kirap nogut long Baibel i tok olsem Jehova inap pilim nogut long samting em i mekim. Ating bai yu tok, ‘God em i gutpela olgeta. Em i no save mekim ol popaia!’ Olsem na yumi laik save, wanem mining bilong dispela tok olsem God i save pilim nogut long samting em i bin mekim? Bekim bilong dispela askim inap helpim yumi long kliagut long wanpela samting: Jehova inap pilim ol samting long bel, na ol samting yumi mekim, dispela inap mekim em i bel hevi o amamas. Skelim stori i stap long Hetman 2:​11-​18.

Buk Hetman long Baibel i kamapim stori bilong wanpela taim nogut i bin painim lain Israel. Lain Israel i sindaun long Kenan, dispela graun em God i bin tok promis long givim long Abraham. Insait long sampela handet yia bihain, i stap bilong lain Israel i gat fopela hap bilong en, olsem: ol i givim baksait long God, ol birua i daunim ol, ol i krai long God i helpim ol, na God i kisim bek ol.a

Ol i givim baksait long God. Lain Kenan i pulim ol Israel na ol i “no moa lotu long Bikpela.” Ol i kirap bihainim ol arapela god, “ol i lotu long ol Bal na long ol god meri Astarte.”b Kain pasin olsem em pasin apostet. Olsem na yumi no kirap nogut olsem dispela pasin bilong ol Israel “i mekim Bikpela i belhat long ol,” em God husat i bin kisim bek ol long Isip!​​—Ves 11-13; Hetman 2:1.

Ol birua i daunim ol. Taim ol i givim baksait long Jehova, dispela i save kirapim em long kros long ol, na i stret em i mekim olsem na em i no lukautim ol. Em i save “larim ol birua . . . i winim ol,” na ol i save kam pait na stilim ol samting bilong ol.​​—Ves 14.

Ol i krai long God i helpim ol. Taim bikpela hevi i painim ol, em long dispela taim ol i save pilim nogut long rong bilong ol na ol i save krai long God i helpim ol. Dispela samting i kamap klia long kain tok olsem, “ol i krai long pen na hevi,” em ol birua i putim long ol. (Ves 18) Ol i save mekim olsem long olgeta taim hevi i painim ol. (Hetman 3:​9, 15; 4:3; 6:​6, 7; 10:10) God i save mekim wanem taim ol i krai long em i helpim ol?

God i kisim bek ol. Jehova i save “marimari long ol” taim em i harim krai bilong ol. Dispela tok Hibru em ol i tanim olsem “marimari,” em inap makim olsem man i “senisim tingting o laik bilong em.” Wanpela buk i tok: “Krai bilong ol i kirapim Jehova long senisim tingting bilong em na em i no givim strafe long ol, na em i kisim bek ol.” Jehova i save mekim pasin marimari na “makim wanpela hetman bilong lukautim ol Israel,” na kisim bek ol long han bilong ol birua.​​—Ves 18.

Yu luksave tu long samting i kirapim God long pilim nogut long samting em i bin mekim o senisim tingting bilong em? Em long wanem ol manmeri bilong em i senisim pasin bilong ol. Tingim: Gutpela papa inap stretim pikinini husat i mekim rong, na givim sampela panismen long em. Tasol taim em i lukim olsem pikinini i bel hevi tru long rong em i bin mekim, ating papa i no inap panisim em moa.

Dispela stori i givim wanem save long yumi long pasin bilong Jehova? Taim ol man i mekim rong long laik bilong ol yet, dispela i save kirapim God long belhat; tasol taim ol i pilim nogut long rong ol i bin mekim, dispela i save kirapim em long marimari long ol. Em nau, ol samting yumi mekim, dispela inap mekim God i bel hevi o amamas. Olsem na i gutpela sapos yu kisim save long ol samting yu ken mekim bambai Jehova i ken “belgut tru” long yu. (Sindaun 27:11) Bai yu amamas tru sapos yu mekim olsem.

[Ol Futnot]