Ol Man i Askim . . .
Yu Ting Yu Mas Bilip Long God Triwan Bilong Stap Olsem Wanpela Kristen?
▪ Wanpela skul buk bilong haiskul em ol i wokim long 2007, (World Religions in Denmark), i kolim ol Witnes Bilong Jehova olsem wanpela liklik lain Kristen em ol i bihainim gut tok bilong Baibel. Lotu bilong ol Witnes Bilong Jehova em i namba 3 bikpela lotu Kristen long Denmak.
Tasol wanpela bisop bilong lotu Denmak Nesenel Sios i sutim tok long meri bilong raitim dispela buk, long em i putim stori bilong ol Witnes tu insait long dispela skul buk. Bilong wanem bisop i mekim olsem? Em i tok: “Mi no bungim yet wanpela tisa bilong lotu husat i ting [ol Witnes Bilong Jehova] i Kristen. Ol i sakim bilip bilong God Triwan, em asbilip bilong ol lotu Kristen.”
Dispela meri bilong raitim buk, em Annika Hvithamar, em i tok olsem taim yu askim ol man long as na ol i kolim ol yet olsem Kristen, ol bai no tok olsem ol i Kristen long wanem ol i bilip olsem God em i wanpela God Triwan. Wanpela hap bilong dispela skul buk, “Yu Wanpela Kristen?,” em i tok: “Bilip bilong God Triwan, em wanpela hevi bilong bilip Kristen.” Buk i tok moa: “Long olgeta taim, i bin i gat hatwok long stori gut long ol Kristen husat i no bin i go long skul bilong ol pater, long as na God bilong ol Kristen em i stap yet olsem wanpela God na em i no tripela god.”
Tok Baibel i mekim long God na Jisas, em i klia tru. Em i no hatwok long kisimgut. Dispela tok “God Triwan” o stori bilong en em i no stap long Baibel. Baibel i tok klia olsem Jisas Krais em i namba wan Pikinini Bilong God. (Kolosi 1:15) Baibel i tok tu olsem Jisas em i ‘namelman i sanap namel long God na ol manmeri.’ (1 Timoti 2:5) Na Baibel i tok long Papa, olsem: “Yu wanpela tasol, yu Bikpela, na yu God Antap Tru, na yu save bosim olgeta hap bilong graun.”—Song 83:18.
Ol Witnes Bilong Jehova i bilip olsem em i bikpela samting long bilip long Jisas. (Jon 3:16) Long dispela as, ol i tingim tru tok bilong Jisas olsem: “Buk bilong God i tok, ‘Yu mas aninit long God, Bikpela bilong yu. Na yu mas lotu long em wanpela tasol.’ ” (Matyu 4:10) Tru tumas, ol man husat i strong long bihainim tok bilong Jisas, ol man i ken kolim ol olsem Kristen.
[Rait long pes 22]
“Bilip bilong God Triwan, em wanpela hevi bilong bilip Kristen”