Rot Bilong Famili i Ken Stap Amamas

Stap Gut Wantaim Ol Tambu

Jennya i tok: Mama bilong Ryan i no sem long tokaut olsem em i no orait long mi. Tasol i wankain long papamama bilong mi taim mitupela Ryan i go lukim ol. Ol i no mekim gutpela pasin long Ryan. Mi no bin lukim ol i mekim kain pasin olsem long ol narapela man! Olsem na taim mipela i go lukim papamama bilong Ryan o bilong mi, bel bilong mipela i no stap isi.

Ryan i tok: Mama bilong mi i ting, i no gat wanpela poroman i gutpela bilong maritim ol pikinini bilong em, olsem na kirap long taim mitupela i pren wantaim, mama i save sutim tok long Jenny. Na papamama bilong Jenny i mekim wankain pasin long mi​—oltaim ol i save daunim mi. Tasol taim ol tambu i mekim olsem, Jenny i save sambai long papamama bilong em na mi save sambai long papamama bilong mi, na narapela i sutim tok long narapela.

KROS pait wantaim ol tambu em samting ol man i save tok pilai long en bilong mekim ol man i lap, tasol taim dispela samting i kamap tru tru, em i no samting bilong lap. Reena, em wanpela meri marit long India, em i tok: “Inap planti yia tambu mama bilong mi i laik insait long olgeta samting bilong marit bilong mipela. Planti taim mi save belhat long man bilong mi, long wanem, mi no inap mekim olsem long mama bilong em. I olsem oltaim em i mas makim wanem samting em bai mekim​—stap gutpela man marit o stap gutpela pikinini man.”

Bilong wanem sampela tambu i laik bosim sindaun bilong ol pikinini bilong ol i marit pinis? Jenny, em yumi stori pinis long em, em i tok: “Ating i hatwok long ol long lukim wanpela yangpela i no gat save tumas i kirap lukautim pikinini man o pikinini meri bilong ol.” Dilip, em man bilong Reena, em i kamapim narapela as, na i tok: “Ol papamama i bin lukautim gut pikinini bilong ol na daunim sampela laik bilong ol yet bilong mekim bikpela long ol, ol inap pilim olsem ol i no bikpela samting moa long pikinini bilong ol. Na ating ol i tingting planti olsem pikinini man o pikinini meri bilong ol i no gat savetingting bilong mekim marit i wok gut.”

Tru, sampela taim pikinini yet i singautim papa o mama long bosim ol samting bilong ol. Tingim Michael na Leanne, em tupela marit i stap long Australia. Michael i tok: “Famili bilong Leanne i save pas gut wantaim, na narapela i save kamapim tingting bilong em long narapela. Olsem na taim mitupela i marit pinis, em bai askim papa bilong em long kamapim tingting bilong em long ol samting mitupela yet i mas skelim. Tru, papa bilong em i gat planti gutpela tingting, tasol mi bel hevi long meri bilong mi, long wanem, em i askim papa na em i no kam askim mi.”

Tru tumas, sapos sampela hevi i kamap wantaim ol tambu, dispela inap putim presa long marit. Yu gat dispela kain hevi? Yu save stap olsem wanem wantaim papamama bilong poroman bilong yu? Na poroman bilong yu i stap olsem wanem wantaim papamama bilong yu? Tingim tupela hevi inap kamap na ol samting yu ken mekim bilong winim hevi.

HEVI 1: I luk olsem poroman bilong yu i pas tumas wantaim papamama bilong em. Wanpela man marit long Spen, em Luis, i tok: “Meri bilong mi i ting sapos mipela i no sindaun klostu long papamama bilong em, i olsem em i no stap gut long ol. Tasol taim em i karim pikinini man bilong mipela, papamama bilong mi i kam lukim mipela long klostu olgeta de, na dispela i putim presa long meri bilong mi. Dispela i mekim na planti taim mitupela i kros pait.”

Ol bikpela tok: Baibel i stori long marit na i tok “man i save lusim papamama na i pas wantaim meri bilong en, na tupela i kamap wanpela bodi tasol.” (Stat 2:24) Dispela tok “wanpela bodi” i no makim tasol olsem tupela i sindaun wantaim, nogat. Em i makim olsem man na meri i kamap wanpela nupela famili​—na dispela i mas i go pas long ol famili wanblut bilong tupela. (1 Korin 11:3) Tru, man na meri i mas givim yet ona long papamama bilong ol, na bilong mekim olsem, ol i mas tingim na helpim ol. (Efesus 6:2) Tasol olsem wanem sapos pasin bilong poroman bilong yu long mekim dispela wok i kirapim yu long pilim olsem em i no tingim yu o em i givim baksait long yu?

Samting yu ken mekim: Skelim dispela hevi wantaim stretpela tingting. Tru tru poroman bilong yu i pas tumas wantaim papamama bilong em, o ating yu yet i no pas gut wantaim papamama bilong yu? Sapos olsem, ating pasin na sindaun bilong famili bilong yu yet i mekim na yu kisim tingting kranki long dispela hevi, a? Ating yu jeles liklik long poroman i pas gut wantaim papamama?​—Sindaun 14:30; 1 Korin 13:4; Galesia 5:26.

Bilong bekim ol kain askim olsem, yupela i mas skelim gut bel bilong yupela yet. Em i bikpela samting long mekim olsem, long wanem, sapos oltaim yutupela i kros pait long ol samting bilong ol tambu, orait yupela i gat hevi insait long marit bilong yupela​—ol tambu i no as bilong hevi bilong yupela.

Planti hevi bilong marit i save kamap, long wanem, ol marit i no gat wankain tingting long ol samting. Yu inap traim long pilim tingting bilong poroman bilong yu? (Filipai 2:4; 4:5) Wanpela man marit long Meksiko, em Adrián, em i bin mekim olsem. Em i tok: “Meri bilong mi i go bikpela insait long famili i no stap bel isi, olsem na mi no laik bung tumas wantaim ol tambu bilong mi. Bihain mi no bung wantaim ol liklik inap long planti yia. Dispela i kamapim hevi insait long marit bilong mipela, long wanem, meri bilong mi i gat laik yet long pas wantaim famili bilong em, na moa yet wantaim mama bilong em.”

Bihain, Adrián i kisim stretpela tingting long dispela samting. Em i tok: “Mi save, sapos meri bilong mi i go lukim papamama bilong em planti taim, dispela i save nogutim bel bilong em, tasol sapos em i no lukim ol, dispela tu inap kamapim hevi. Olsem na mi wok strong long painim rot bilong i stap gut wantaim ol tambu bilong mi.”b

TRAIM MEKIM OLSEM: Yu na poroman bilong yu i ken raitim nambawan bikpela hevi ol tambu i save givim long yupela. Sapos inap, orait kirapim tok olsem “Mi ting . . . ” Taim yupela i raitim pinis, senisim pepa wantaim poroman. Orait nau yutupela i ken wok gut wantaim long tingim sampela rot bilong stretim ol samting i givim hevi long yutupela wantaim.

HEVI 2: Long olgeta taim ol tambu bilong yu i laik bosim marit bilong yu, ol i wok long givim skultok long yupela maski yupela i no bin askim ol. Wanpela meri marit long Kasakstan, em Nelya, i tok: “Taim mipela i marit nupela, mipela i bin stap 7-pela yia wantaim famili bilong man bilong mi. Oltaim kros pait i kamap long pasin bilong mipela long mekim bikpela long ol pikinini bilong mipela, na long pasin bilong mi long kukim kaikai na klinim haus. Mi bin toktok wantaim man bilong mi na tambu mama long dispela, tasol dispela i mekim na kros pait i go bikpela moa!”

Ol bikpela tok: Taim yu marit, yu no stap aninit moa long lo bilong papamama bilong yu. Baibel i tok: “Het bilong olgeta man em Krais, na het bilong meri em man bilong en.” (1 Korin 11:3) Tasol olsem yumi tok pinis, man na meri wantaim i mas givim ona long papamama bilong ol. Sindaun 23:22 i tok: “Papa bilong yu i bin kamapim yu na yu mas harim tok bilong en. Na taim mama bilong yu i lapun pinis, yu no ken rabisim em.” Tasol olsem wanem sapos papamama bilong yu​—o bilong poroman bilong yu​—i sakim dispela tok olsem man marit i het bilong famili, na ol i strong long kamapim tingting bilong ol yet long ol samting bilong yupela?

Samting yu ken mekim: Traim pilim tingting bilong ol na luksave i gat wanem as na ol i laik insait long ol samting bilong yupela. Ryan, em yumi stori pinis long em, i tok: “Sampela papamama i laik save olsem ol i bikpela samting yet long ol pikinini bilong ol.” Ating ol i no gat tingting long bosim ol samting bilong marit bilong pikinini, na ating yupela inap stretim dispela hevi sapos yupela i bihainim tok bilong Baibel olsem: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata.” (Kolosi 3:13) Tasol olsem wanem sapos ol tambu i strong tumas long insait long ol samting bilong yupela na dispela i kamapim kros pait namel long yu na poroman bilong yu?

Sampela marit i bin lain long putim ol mak em papamama i no ken kalapim. Dispela i no makim olsem yu mas tokim ol long ol samting ol i ken mekim na ol i no ken mekim, nogat.c Planti taim yu inap kamapim klia long pasin bilong yu olsem poroman marit bilong yu i stap namba wan long laip bilong yu. Olsem: Wanpela man marit long Japan, em Masayuki, em i tok: “Sapos papamama i kamapim tingting bilong ol, no ken wanbel hariap long tok bilong ol. Tingim, yu wok long kamapim wanpela nupela famili. Olsem na pastaim yu mas kisim save long tingting bilong poroman bilong yu long tok bilong ol.”

TRAIM MEKIM OLSEM: Toktok wantaim poroman bilong yu long wanem ol samting papamama i mekim na dispela i save kamapim kros pait insait long marit bilong yupela. Sindaun wantaim na raitim wanem ol mak yupela i ken putim na ol samting yupela i ken mekim bilong bihainim ol dispela mak, tasol yupela i givim yet ona long papamama bilong yupela.

Yu inap abrusim planti kros pait wantaim ol tambu sapos yu pilim gut tingting bilong ol na yu no larim ol dispela kros i kamapim kros namel long yu na poroman bilong yu. Jenny i tokaut olsem: “Sampela taim mi wantaim man bilong mi i toktok long ol samting papamama bilong mipela i mekim na mipela i kros, na i klia tru olsem narapela inap sutim bel bilong narapela taim mipela i toktok long ol pasin kranki bilong papamama bilong narapela narapela. Tasol bihain, mipela i lain long lusim pasin bilong kamapim ol popaia bilong ol tambu olsem rot bilong sutim bel long poroman. Olsem na long nau mitupela man bilong mi i save pas gut wantaim.”

[Ol Futnot]

ASKIM YU YET . . .

▪ Ol tambu bilong mi i gat wanem ol gutpela pasin?

▪ Olsem wanem mi ken givim ona long papamama, tasol mi no givim baksait long poroman bilong mi?