Yu Ting Yumi Mas Bihainim Stretpela Pasin Long Olgeta Taim?
OLGETA man i save mekim stretpela pasin long sampela taim; na ating planti man i save mekim long planti taim. Tasol hamas man i save wok strong long bihainim stretpela pasin long olgeta taim?
Long nau, i gat kain kain taim we ol man i no save mekim stretpela pasin. Tasol planti man i save long tingting bilong God long stretpela pasin. Olsem: Planti i save long namba 8 lo bilong Tenpela Lo: “Yupela i no ken stil.” (Kisim Bek 20:15) Tasol planti man i ting olsem sampela taim sindaun bilong man inap mekim na i no gat rong long man i stil o mekim kain kain pasin giaman. Orait yumi ken skelim tripela kain taim we ol man i tok i no gat rong long stil.
Sapos Yu Stap Rabis, Yu Ting i Stret Yu Ken Stil?
Wanpela bikman bilong Rom i bin tok: “Pasin bilong i stap rabis em i as bilong pasin raskol.” Wanpela rabisman inap pilim olsem i no gat rong long em i stil, long wanem, em i stap rabis. Ating ol narapela man bai ting olsem tu. Jisas i gat wanem tingting long dispela samting? Tru, em i bin soim bikpela pasin marimari long ol rabisman. “Em i sori tru long ol.” (Matyu 9:36) Tasol i no gat wanpela taim we em i bin orait liklik long pasin stil. Orait, yu ting man i stap rabis i ken mekim wanem?
God i save marimari long ol man husat i wok strong long bihainim tok bilong em, na em bai blesim hatwok bilong ol long kisim ol samting ol i nidim. (Song 37:25) Baibel i tok promis olsem: “Bikpela i no save larim ol stretpela man i sot long kaikai. Tasol em i no save larim ol man nogut i kisim ol samting ol i sotwin tru long kisim.” (Sindaun 10:3) Yu ting wanpela rabisman inap bilip tru long dispela tok? Victorine i bilipim tru dispela tok.
Victorine em i wanpela wido i gat 5-pela pikinini, na em i save mekim bikpela wok long lukautim ol. Em i stap long wanpela kantri i stap rabis na gavman i no gat inap mani bilong helpim ol pipol bilong en. Planti man i save stap long strit, olsem na planti taim rot i op long stil. Tasol Victorine i no save stil. Em i save bihainim stretpela pasin na wok hat long salim ol samting long strit na bai em inap kisim ol samting em i nidim. Bilong wanem em i save bihainim stretpela pasin?
Em i tok: “Namba wan, mi save olsem God em man bilong bihainim stretpela pasin, na sapos mi bihainim pasin bilong em, em bai mekim wankain pasin long mi. Na namba tu, ol pikinini bilong mi bai lain long mekim stretpela pasin sapos ol i lukim mi i bihainim dispela pasin.”
Dispela i bin helpim em olsem wanem? Em i tok: “Mipela i gat kaikai, laplap, na ples slip. Tasol maski i olsem, sampela taim mi bin askim ol pren bilong mi long helpim mi long baim bil bilong dokta samting. Oltaim mi kisim ol samting mi nidim. Bilong wanem? Long wanem, ol pren bilong mi i save olsem mi save tok tru taim mi stori long hevi bilong mi na mi no save bilasim stori bilong kisim sampela moa samting em mi no nidim.
“Ol pikinini i wok long kamap bikpela na ol i wok long bihainim stretpela pasin. I no longtaim i go pinis, wanpela neiba i lukim sampela koins i stap long tebol bilong mipela na em i askim mi sapos mi no pret long ol pikinini bai kisim ol dispela koins. Taim mi tokim em olsem ol pikinini bilong mi bai i no mekim olsem, em i hatwok long bilipim mi. Long baksait bilong mi, em i laik traim ol pikinini. Long pasin hait, em i putim tupela 50 toea koin long haus long hap we ol pikinini inap lukim na kisim. Taim em i kam long de bihain, em i kirap nogut long lukim ol dispela koins i stap yet long ples bilong ol. Yes, taim ol pikinini bilong mi i bihainim stretpela pasin, dispela i gutpela moa winim pasin bilong holim planti samting.”
“Olgeta Man i Save Mekim”
Long olgeta hap, ol man i save stil long ples wok. Long dispela as, planti i pilim olsem, ‘Olgeta man i save mekim, olsem na bilong wanem na mi no ken mekim?’ Tasol Baibel i tok: “Sapos ol planti man i mekim pasin nogut, orait maski long bihainim pasin bilong ol.” (Kisim Bek 23:2) Victoire i bin bihainim dispela tok. Yu ting gutpela samting i kamap?
Taim em i gat 19 krismas, em i bin kisim wok long wanpela oil pam faktori. Em i luksave olsem 40 meri i wok long hap, ol i save putim ol oil pam kernel long basket bilong ol na karim i go aut long faktori. Long ol wiken, ol i salim ol dispela kernel na mani ol i kisim, em inap olsem pe bilong 3-pela o 4-pela de wok. Victoire i tok: “Olgeta i save mekim olsem, na ol i ting mi tu mi bai bihainim ol, tasol mi no mekim, mi tokaut olsem mi laik bihainim stretpela pasin long laip bilong mi. Ol i tok bilas long mi na tok mi bai lus long kisim samting.
“Wanpela taim, mipela i laik lusim faktori na wantu maneja i kam kamap. Em i sekim basket bilong mipela olgeta na em i lukim ol kernel i stap long basket bilong olgeta narapela, bilong mi tasol, nogat. Em i tokim olgeta husat i bin stil, long em bai pinisim ol long wok wantu tasol, o ol i ken wok nating inap tupela wik, no gat pe. Insait long dispela tupela wik, ol meri i luksave nau olsem mi no lus long kisim samting.”
“Sapos Yu Painim Wanpela Samting, Orait Em Bilong Yu Nau”
Yu save pilim olsem wanem taim yu painim wanpela samting i dia tumas em narapela man i bin lusim? Long planti, wantu ol bai pilim olsem em bilong ol nau, na ol bai i daunim dispela tingting long givim bek dispela samting long papa bilong en. Ol i gat dispela tingting, “sapos yu painim wanpela samting, orait em bilong yu nau.” Ating sampela bai pilim olsem dispela i no nogutim wanpela man. Ol i ting papa bilong dispela samting i save pinis olsem em i no inap kisim bek dispela samting. Sampela i tok olsem em i no wok bilong ol long go painim papa bilong dispela samting—em wok i gat bikpela hatwok long en.
Wanem tingting bilong God long dispela samting? Lo 22:1-3 i tok olsem sapos wanpela man i painim samting i lus, em i no ken holim i stap bilong em yet, nogat, em i mas holim i stap inap long ‘papa bilong dispela samting i kam, na em i mas givim long em.’ Sapos man husat i painim dispela samting i lus, em i no tokaut, orait ol inap kotim em long mekim pasin stil. (Kisim Bek 22:9) Yu ting dispela pasin inap helpim yumi long nau? Christine i ting olsem.
Christine em dairekta bilong wanpela praivet skul. Long wanpela Trinde, em i go kisim wan mun pe bilong em. Olsem planti Wes Afrika i save mekim, em i ropim mani bilong em long liklik bandel na putim long beg bilong em. Em i kalap long wanpela teksi motobaik na siksti i go long wanpela miting. Taim em i kamap long hap, em i painim ol koins long beg bilong em bilong baim draiva. Ples i tudak, na bandel mani i pundaun na em i no save.
Sampela minit bihain, Blaise, em i gat 19 krismas, em wanpela nupela man long dispela hap, em i wokabaut i kam. Em i bin pasim tok long bungim wanpela pren long dispela miting em Christine i go long en. Em i lukim bandel mani na em i kisim na putim long poket. Taim miting i pinis, em i tokim pren bilong em olsem em i bin painim wanpela samting long ausait na sapos wanpela man i bin lusim wanpela samting, orait em i ken ringim em na tokim em long samting em i bin lusim.
Taim Christine i go long haus long dispela nait, em i kirap nogut olsem wan mun pe bilong em i no stap. Wanpela wik bihain, taim em i tokim pren bilong em Josephine long hamas mani em i bin lusim, Josephine i tokim em olsem wanpela man i kam long miting i bin painim wanpela samting. Christine i ringim Blaise na kolim stret hamas mani em i bin lusim. Em i amamas tru taim Blaise i givim bek mani bilong em. Olsem wanem long Blaise? Em i bin holim dispela mani inap 1-pela wik, tasol em i tok: “Amamas mi pilim taim mi givim bek mani i bikpela moa winim amamas mi pilim taim mi bin holim mani i stap.”
As na Ol i Wok Strong Long Bihainim Stretpela Pasin Long Olgeta Taim
Victorine, Victoire, na Blaise i sindaun long narapela narapela hap na ol i no save long narapela narapela. Tasol wanpela samting i wankain long olgeta em olsem: Ol i Witnes Bilong Jehova, na ol i save wok strong long bihainim tok Baibel i mekim long stretpela pasin. Ol i wetim truim bilong tok promis bilong God long nupela taim. “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” Olgeta manmeri husat bai stap long dispela taim, ol bai bihainim stretpela pasin.—2 Pita 3:13.
I go inap long taim God i kamapim ol senis, Victorine i save olsem hevi bilong em long mani bai no inap pinis long dispela taim nau. Tasol maski i olsem, long sait bilong pas gut wantaim God, em i holim pinis planti samting, em ol samting mani i no inap baim. Ol pikinini bilong em i save mekim stretpela pasin—ol i no save stil o tok giaman. Long olgeta Sande, ol i save amamas long tokim ol neiba long ol gutpela pasin bilong God na long olsem wanem God bai inapim tru laik bilong ol man i save bihainim stretpela pasin na “i singaut long em” na em bai was gut long “ol manmeri i save laikim em tru.”—Song 145:7, 18, 20.
Bihain, Victoire i lusim wok long oil pam faktori. Em i kirapim wanpela liklik bisnis bilong em yet, em i save salim garri (wanpela kain kaikai ol i wokim long tapiok) long maket. Em i save mekim stretpela pasin, olsem na planti kastoma i save kam long em. I no longtaim na em inap sotim ol aua bilong em long maket na tromoi bikpela haptaim moa long toktok wantaim ol narapela long wanpela taim bai kamap we i no gat pasin giaman long en. Bihain em i marit, na nau em wantaim man bilong em i mekim wok bilong God fultaim.
Mani bilong Christine i bin lus long ai bilong Haus Kingdom Bilong Ol Witnes Bilong Jehova. Blaise i save long wan wan man tasol long dispela miting, tasol em i save olsem olgeta husat i bung, ol i olsem ol bratasista Kristen bilong em, na ol i wok strong long bihainim stretpela pasin long olgeta taim.
Yu save long hamas man i wok strong long bihainim stretpela pasin long olgeta taim? Tingim olsem yu stap namel long 50, 100, o 200 manmeri em ol i save mekim stretpela pasin. Ol Witnes Bilong Jehova i save amamas long bung wantaim ol kain man olsem taim ol i go long Haus Kingdom bilong ol. Ating i gutpela sapos yu tu i go long dispela hap na save gut long ol dispela lain, a?
[Rait long pes 12]
“Taim ol pikinini bilong mi i bihainim stretpela pasin, dispela i gutpela moa winim pasin bilong holim planti samting”—VICTORINE
[Blok long pes 14]
Yu Ting Sindaun 6:30 i Tok Orait Long Pasin Stil?
Sindaun 6:30 i tok: “Sapos wanpela man i hangre na i stilim sampela kaikai, orait ol man i no save tok nogut long em.” Yu ting dispela tok i givim rot long man i ken stil? Nogat tru. Ol tok i stap klostu i soim olsem long ai bilong God dispela stilman i gat asua yet long dispela rong em i bin mekim. Ves bihain i tok: “Tasol sapos ol i painimaut long dispela samting em i bin mekim, orait bai ol i kotim em na em i mas bekim planti samting moa, inap long pinisim olgeta samting long haus bilong en.” (Sindaun 6:31) Tru, man i hangre na em i stil, ating asua bilong em i no bikpela olsem asua bilong man i mangal na i stilim samting o i laik mekim nogut long man em i stil long en, nogat. Tasol maski i olsem, man husat i hangre, i gat wok yet long “bekim planti samting moa” long man em i stil long en. Ol man husat i laik bai God i orait long ol, ol i no ken i gat asua long mekim pasin stil maski ol i stap rabis o nogat.