Yu Save Long Dispela?
Bilong wanem Jisas i tok “i no gat man i save pulmapim nupela wain long olpela skin meme”?
▪ Long taim bilong ol man bilong raitim Baibel, ol man i save pulimapim wain long skin bilong animal. (Josua 9:13) Ol i save yusim skin bilong meme bilong wokim skin botol bilong pulimapim wain. Bilong wokim skin botol, ol i save katim na rausim het na han na lek bilong animal i dai pinis, na ol i save lukaut gut taim ol i rausim skin bilong en bambai ol i no ken wokim hul long hap em bel i stap long en. Orait ol i save draim dispela skin long san na bai em i ken kamap strong, na ol i save samapim olgeta hul i stap long en na larim wanpela hap tasol i op, olsem long hap bilong nek o bilong lek, na dispela i olsem maus bilong skin botol. Ol i ken yusim wanpela kain samting olsem lid o rop bilong pasim maus bilong botol.
Bihain, dispela skin botol bai kamap strong na i no malumalum moa. Olsem na i no stret long pulimapim nupela wain long olpela skin botol. Taim wara bilong grep i wok long sting na kamap wain, dispela inap brukim olpela skin botol. Tasol nupela skin botol i malumalum na long dispela as em i no inap bruk hariap. Dispela em as na Jisas i stori long samting em planti man long taim bilong em ol i save long en. Em i tok long samting bai kamap sapos wanpela i putim nupela wain long olpela skin botol: “Bai nupela wain i brukim skin meme na wain i kapsait i go long graun. Na skin meme tu bai i bagarap. Olsem na ol i mas pulimapim nupela wain long nupela skin meme.”—Luk 5:37, 38.
Long stori bilong Pol long taim ol Rom i arestim em, husat ol dispela “man i save pait long bainat”?
▪ Olsem stori i stap long Buk Aposel i kamapim, taim ol manmeri long Jerusalem i kros na pait nabaut, namba wan ofisa bilong lain soldia long Rom i arestim aposel Pol, long wanem, em i ting aposel Pol em i lida bilong “4,000 man i save pait long bainat.” (Aposel 21:30-38) Yumi gat wanem save long ol dispela man i save pait long bainat?
Dispela tok Grik ol i tanim olsem ol “man i save pait long bainat,” i kam long tok Latin sicarii, mining bilong en, “ol man bilong yusim sica,” o bainat. Saveman Flavius Josifas i stori long lain Sicarii olsem ol i wanpela lain Juda em ol i save birua nogut tru long lain Rom na ol i save wok bung wantaim bilong kilim i dai ol bikman bilong gavman.
Josifas i tok lain Sicarii “i save kilim i dai ol man long san, namel long biktaun; ol i save mekim olsem long taim bilong ol bikpela bung, taim ol i miks wantaim ol manmeri na haitim bainat aninit long saket na yusim long sutim ol birua.” Taim ol i kilim man i dai pinis, ol Sicarii i save giaman olsem ol i belhat long husat man em i kilman; ol i mekim olsem bambai i no gat man i ken save olsem ol yet i kilman. Josifas i tok ol Sicarii i givim bel tru long pait em ol Juda i mekim long ol Rom long yia 66-70 C.E. Olsem na namba wan ofisa bilong Rom i gat laik tru long arestim man em i tingim olsem lida bilong kain lain nogut olsem.
[Piksa long pes 15]
Olpela skin meme
[Piksa long pes 15]
Piksa bilong man i save pait long bainat