Pas i Kam Long Papua Niugini

Korol Rip i Stap Long Ples Maunten

EM Tunde, 5 klok moning long Lae, Papua Niugini, na ples i hat nogut tru. Mi na meri bilong mi i redim ol samting bilong i go long Lengbati, em ples i stap long maunten Rawlinson long Morobe Provins. Mipela i laik lukim wanpela liklik grup bilong ol Witnes Bilong Jehova i stap long hap.

Mipela i kalap long wanpela wan-ensin balus i gat 4-pela sia long en, na mipela bai kamap long dispela ples bihain long 30 minit samting. Planti taim mi save sindaun long sait bilong pailot long kain raun olsem, na maski nois bilong ensin i pairap strong, mitupela i save toktok wantaim long rot bilong hetfon i gat liklik maikrofon long en. Pailot i stori long ol samting bilong ronim balus, na em i tok pilai olsem sapos em i airaun, mi yet i mas ronim balus. Na wantu mi tingim samting i bin painim narapela Witnes Bilong Jehova long bipo, husat i save raun mekim wok bilong God long PNG. Pailot i bin hap indai na balus i ron nating long autopailot i go inap long taim pailot i kisim bek tingting bilong em na em inap kisim balus i go daun gut long graun. Tasol dispela samting i no painim mipela, mipela i raun gut na i no gat wanpela hevi i kamap.

Mipela i flai insait long klaut na bihainim sait bilong ol bikpela maunten i go. Orait nau, wantu, balus i tanim na kam aut long klaut na abrusim kil bilong maunten inap 100 mita tasol. Mipela inap lukim ol haus bilong Lengbati daunbilo, em ol i bin wokim long ol samting bilong bus. Taim mipela i flai antap yet, pailot i lukluk i go daun long ples em balus bai pundaun long en. Em i sekim rot bilong balus, nogut ol pikinini i pilai soka long en o i gat ol hul long en ol pik i bin digim. Taim em i tanim balus i go bek long veli, em i tok: “Ples i orait; bai yumi kisim balus i go daun.” Mipela i flai i go raunim na pailot i kisim balus i kam pundaun gut long sotpela rot bilong ples balus. Ol ples lain i bin wokim dispela rot long arere bilong maunten, em nau tasol ol i bin kapsaitim ol liklik liklik ston korol long en, em ol i bin katim long wanpela maunten i stap klostu.

Long ol narapela raun bilong mipela long hia, mi bin lukim ol dispela waitpela ston korol, na mi tingting, ol dispela maunten i mas winim planti yia stret. Bipo ol dispela maunten i bin i stap olsem korol rip long solwara, em longpela bilong rip em inap olsem planti handet kilomita. Na tingim, i mas i gat wanpela bikpela strong tru i subim subim ol dispela rip long solwara i kam antap inap olsem 4-pela kilomita na i kamap ol dispela maunten! Mipela i kam aut long balus na sanap long hap graun em mi kolim olsem korol rip i stap long ples maunten.

Taim ol ples lain i save harim nois bilong balus i laik kam pundaun, ol i save ron i kam long olgeta hap. Taim balus i pundaun pinis na pailot i kilim i dai ensin, mi lukim wanpela man i lusim ol lain i bung na i wokabaut i kam long balus. Nem bilong em, Zung. Em i wanpela bilong ol lain husat i lukautim ol program bilong skulim ol man long Baibel long dispela hap, em ol program ol Witnes Bilong Jehova i save mekim long olgeta hap. Namel long lain bilong em, em i gat nem olsem man i save bihainim stretpela pasin na i no save giaman na ol narapela inap trastim. Em i tok olsem em i kamap kain man olsem, long wanem, em i bihainim ol stiatok bilong Baibel long laip bilong em. Bihain long mipela i tok gude na sekan, mipela i wokabaut wantaim Zung na ol narapela Witnes i go daun liklik long maunten. Ol yangpela i wokabaut baksait long mipela, ol i wok long tok pait namel long ol yet long husat bai karim ol beg bilong mipela.

Mipela i kam kamap long wanpela liklik haus em ol asples Witnes i bin wokim bilong ol wokman bilong God em ol i save kam visitim ol long olgeta 6-pela 6-pela mun. Tru, PNG em wanpela hatpela ples, tasol Lengbati inap kol tru, long wanem, em i stap antap long ples maunten. Long nait taim mipela i laitim kerasin lam bilong mipela, planti taim mi save lukim ol klaut​​—em ol i bin lusim veli long apinun na i kam isi isi antap long maunten​​—i kam insait long ol hul bilong timba plua na kam insait long haus. Mi pilim narapela kain taim mi pasim saket na jins bilong hatim skin bilong mi, long wanem, sampela aua tasol i go pinis, mipela i bin tuhat stret long ples nambis.

Long 1985, wanpela man Lengbati i bin stadi long Baibel wantaim ol Witnes Bilong Jehova long Lae. Taim em i go bek long ples bilong em, em wantaim sampela narapela i sanapim wanpela liklik haus bung, na ol i bin amamas long en. Tasol wanpela Luteran pasto bilong dispela ples wantaim ol lain bilong em i kukim dispela haus olgeta. Ol dispela man i amamas long tokaut olsem dispela em ples bilong ol Luteran tasol. Tasol kirap long dispela taim na i kam, maski pasin birua i stap yet, ol Witnes i sanapim gen narapela haus bung. Namba bilong ol lain i save kam bung, em i go antap na inap olsem 50 manmeri i save autim gutnius long olgeta mun. Sampela bilong ol lain husat i bin birua long wok bilong ol Witnes, nau ol tu i givim bel long mekim dispela wok.

Nau long dispela taim, ol ples lain i save amamas taim ol Witnes Bilong Jehova i kam na skulim ol long ol tok bilong Baibel. Maski wan wan manmeri tasol long ples i save long rit, planti asples Witnes i bin kirap lain long rit bambai ol inap autim tok bilong Baibel long ol narapela. Long olgeta wik, inap olsem 200 manmeri i save kam long ol miting i kamap long Haus Kingdom.

I no gat pawa. Long olgeta apinun, mipela olgeta i save sindaun raunim paia long haus kuk. Mipela i save kaikai, toktok, na lap wantaim. Long lait bilong paia, mipela lukim pes bilong ol pren bilong mipela i kamapim klia olsem ol i save amamas long mekim wok bilong Jehova. Taim ples i wok long i go tudak, sampela i kisim bombom long paia bilong soim rot long ol taim ol i go bek long haus bilong ol.

Taim mipela i wokabaut long rot i go bek long haus, olgeta samting i stap isi tru, no gat nois, na mipela i kirap nogut long dispela. Nois bilong bus tasol i raunim mipela. Paslain long mipela i slip, mipela i lukluk gen i go antap long klinpela skai na mipela i amamas long lukim klia planti sta.

Wanpela wik i kam na i go hariap tru, na mipela i wetim balus bilong mipela long i kam long de tumora. Mipela i stap wanpela nait moa antap long ples maunten bilong Lengbati na ples i kol, tasol long de tumora mipela bai go bek long ples hat bilong nambis.