Yumi Inap Kisim Bagarap Long Balus?

INSAIT long wanpela yia, inap 500 tausen manmeri i save dai long rot. Tasol long 1996, inap 1,945 manmeri i dai taim balus i bagarap. Na long 1997, inap 1,226 ol i dai taim balus i bagarap. Ripot bilong kampani bilong wokim balus Boeing i tok, ‘long olgeta wan milion wan milion raun bilong ol bikpela balus, inap 2-pela taim tasol balus i save bagarap na pundaun.’

Taim wanpela balus i bagarap na pundaun, ol nius na televisen samting i save mekim bikpela stori long en, tasol taim ol man i dai long rot, ol i ting dispela i no samting bilong stori long en, long wanem, em samting i save kamap long olgeta taim. Long Yunaitet Stets, ol i ting bas tasol i winim balus, long wanem, planti man i no kisim bagarap long bas.

Bilong wanem balus i winim ka bilong raun long en? Wanpela as em i olsem: Ol balus i no olsem ol ka long rot​—⁠ol i no save flai klostu long narapela balus. Narapela as em ol boskru bilong balus. Ol i bin skul gut na ol i gat gutpela save long mekim wok bilong ol. Klostu olgeta kepten bilong balus Boeing 747, ol i winim 50 krismas, na ol i bin stiaim balus inap 30 yia pinis. Olgeta boskru bilong balus ol i save tingting strong long balus i no ken bagarap. Ol tu inap i dai sapos balus i bagarap na pundaun.

Ol Samting Bilong Haus Kepten

Sapos yu go insait long haus kepten bilong wanpela balus bilong karim ol pasindia, bai yu lukim ol masin na stia samting i 2-pela 2-pela​—⁠long han kais em ol masin na stia samting bilong kepten na long han sut em ol wankain samting bilong namba tu pailot.a Olsem na wanpela buk (The Air Traveler’s Handbook) i tok, “sapos wanpela pailot i airaun na pundaun, narapela pailot i gat ol masin samting bilong stiaim gut balus. Taim balus i flai, narapela pailot inap skelim masin bilong narapela pailot, na long dispela rot ol i ken save masin bilong tupela i wok wankain na i kamapim wankain toksave samting.”

Narapela samting ol i save mekim bambai balus i ken ran gut, em pasin bilong kepten na pailot long kaikai​—⁠ol i no save kisim wankain kaikai. Bilong wanem? Long wanem, sapos kaikai i bagarap, wanpela pailot tasol bai kisim sik.

Bilong bosim gut wok bilong ol samting bilong balus i ken wok gut, olsem ol samting i sanap na go daun long 2-pela wing, na ol wil samting, na brek, ‘planti balus i gat 2-pela o 3-pela masin haidrolik bilong mekim wok sapos wanpela masin haidrolik i bagarap.’ Lo i tok, planti balus bilong nau ol i mas i gat 2-pela o 3-pela masin bilong mekim wan wan wok, olsem na sapos wanpela i bagarap, narapela i mekim wok bilong en na balus inap ran gut yet.

Yu Inap Mekim Wanem?

Nau mipela bai stori long sampela samting olgeta pasindia inap mekim: Ritim kat i stori long ol samting yu mas mekim taim bagarap i laik painim balus, na taim balus i no lusim graun yet, harim tok boskru i mekim long ol samting ol pasindia i mas mekim sapos hevi i kamap. Taim yu sindaun, lukim wanem dua bilong lusim balus i stap klostu long yu. Na sapos bagarap i laik painim balus, bihainim tok bilong ol boskru. Olgeta boskru i bin kisim gutpela skul long ol samting ol i mas mekim sapos hevi i kamap. Taim ol i givim sampela tok, ol pasindia i mas wokabaut hariap na lusim tingting long kago bilong ol. Laip i winim kago samting.

Planti taim ol balus bilong nau i save flai antap long ol klaut, olsem na taim balus i flai long ol hap i longwe, balus i no save meknais tumas. Dispela i mekim na wan wan man tasol i save traut long balus. Sapos balus i laik meknais, kepten i save tokim ol pasindia long pasim let bilong sia, nogut hevi i painim ol.

Olsem wanem? Ol inap mekim sampela samting moa bambai ol man i ken raun gut moa long balus? Ol inap. Tasol planti pasindia bai no orait long senis ol i mas mekim bilong kamapim dispela samting. Em wanem senis? Ol i mas tanim ol sia bambai ol pasindia i lukluk long baksait bilong balus! Olsem wanem dispela inap helpim ol? Sapos wantu spit bilong balus i go daun, baksait bilong sia bai lukautim ol pasindia, na let bilong sia tasol nogat. Let bilong sia i save raunim hap bilong bel tasol na dispela let i no gutpela olsem let bilong sia bilong planti ka, em let i save raunim bros tu. Tasol ol manmeri i laik lukim hap ol i wok long i go long en, na ol i no laik lukim hap ol i lusim pinis!

Yu Pret Long Raun Long Balus?

Long Yunaitet Stets, ol i ting olsem wanpela long olgeta 6-pela 6-pela man i bikpela pinis, ol i save pret long raun long balus. Sampela i no pret nating tasol, ol i pret nogut tru na dispela inap mekim na i olsem ol i longlong nabaut. Wanem samting inap helpim ol?

Ol i mas kisim gut save long raun bilong balus. Dispela i ken daunim pret bilong ol. Long olgeta yia, inap 15,000 balus i go i kam long 10,000 ples balus, na winim 1.2 bilion manmeri i save raun long balus na wan wan taim tasol bagarap i painim dispela balus. ‘Wanpela kampani insurens (Lloyd’s) bilong Landon i tok, ol balus i no save bagarap planti taim, winim ol ka inap 25 taim.’

Sapos yu pret long raun long balus, ritim ol buk i stori long ol samting bilong balus, na long skul bilong ol pailot. Kisim save long ol mak ol pailot i mas winim long skul na long ol lo ol i mas bihainim, olsem hamas aua ol i mas slip, na hamas botol bia samting ol i ken dring paslain long ol i stiaim balus. Na sampela taim ol i glasim blut bilong ol pailot bilong kisim save olsem ol i bin kisim drak o nogat. Na tu, inap 2-pela taim long olgeta yia ol pailot i mas winim sampela tes. Ol i mas go insait long wanpela kain masin i save seksek olsem balus i laik bagarap bambai ol i ken save, taim hevi i painim balus ol pailot bai mekim wanem. Ol dispela masin i save seksek wankain stret olsem long taim balus tru i laik bagarap, olsem na taim sampela pailot i lusim dispela masin, skin bilong ol i “guria na ol i tuhat nogut tru.” Sapos wanpela pailot i no winim dispela tes, ol inap rausim laisens bilong em long stiaim bikpela balus.

Ol dispela lo i winim tru ol lo bilong draivim ka na ol bikpela trak samting. Olsem na taim yu kisim sampela save moa long ol balus na long wok bilong ol pailot, pasin bilong yu long pret long raun long balus inap go daun.

Ating em bai helpim yu tu sapos yu go raun long wanpela ples balus. Lukim ol samting ol pasindia i mekim, na skelim pasin bilong ol. Bai yu lukim olsem planti man i lusim balus olsem ol i lusim wanpela bas tasol. Long ol dispela man, pasin bilong raun long balus i no bikpela samting. Lukluk long ol balus taim ol i lusim graun na taim ol i pundaun. Kisim save long ol lo bilong saiens, em ol dispela lo i mekim na balus inap flai na planti man i no kisim bagarap long en.

Taim yu kalap long balus long namba wan taim, tokim boskru olsem em namba wan taim bilong yu long raun long balus, na yu pret liklik. Ol dispela boskru i gat gutpela save long mekim wok bilong ol, na ol inap helpim yu long stap bel isi na long bilip olsem ol samting bilong balus bai wok gut. Traim long stap bel isi. Taim kepten i tok orait long ol pasindia i ken wokabaut insait long balus, kirap na mekim olsem. Ating yu wok long winim pasin bilong yu long pret long raun long balus!

[Futnot]

[Rait long pes 21]

“Wanpela kampani insurens (Lloyd’s) bilong Landon i tok, ol balus i no save bagarap planti taim, winim ol ka inap 25 taim”

[Ol Piksa long pes 22]

Taim yu lain long stap bel isi, dispela inap helpim yu long amamas long raun long balus

[Piksa Kredit Lain long pes 20]

Piksa mipela i kisim long Boeing Aircraft Company