Ol Samting Yu Ken Mekim na Raun Gut Long Balus

Wanpela man long Finlan i raitim dispela stori bilong Kirap!

LONG nau planti man i raun long balus, long wanem, ol inap kam hariap long ples ol i laik i go long en. Na ol man i tok, balus i gutpela rot bilong raun na i no planti man i kisim bagarap long en.

Ol kampani bilong balus na ol gavman i gat strongpela lo long sampela samting, olsem na man i no ken pret long raun long balus. Olsem: Olgeta taim ol kampani bilong balus i glasim olgeta samting bilong balus​—ol i wok gut o nogat. Na tu, ol i skelim gut hamas kago na man ol inap putim long olgeta wan wan balus na ol i wokim lista long dispela. Ol wokman i bihainim dispela lista taim ol i putim ol switkes na kago na pas samting bilong posofis long ples tru bilong en long balus. Ol i no putim nating, ol i skelim hevi bilong ol dispela samting pastaim na sapos inap, ol i putim. Olsem wanem? Yu tingim ol dispela bikpela wok ol man i save mekim paslain long taim balus i lusim graun?

Tasol i gat sampela samting ol man i ken mekim na balus i no ken bagarap? Yes, i gat sampela samting yu inap mekim. Ating i gat sampela samting yu mekim na yu no save em i no gutpela tumas taim balus i raun. Tasol sapos yu bihainim sampela lo bilong balus, dispela inap helpim yu na balus long raun gut.

Yu na Ol Kampani Bilong Balus

Wanpela lain ICAO (International Civil Aviation Organization), em i wok aninit long Yunaitet Nesen na em i wok strong long mekim sampela samting na ol balus i no ken bagarap. Na tupela lain (International Air Transport Association na Air Transport Association of America), i wok wantaim lain ICAO na kamapim ol toksave na ol lo bilong helpim ol man i raun long balus na ol wokman bilong balus. Na tu, ol i redim sampela samting na ol wokman bilong balus i ken kisim gutpela trening.

I gat sampela hevi i kamap, long wanem, nau i gat kain kain nupela samting, olsem ol nupela marasin na ol masin tu ol pasindia i save mekim wok long en. Olsem na ol wokman bilong balus i mas mekim sampela samting na lainim ol pasindia long ol dispela samting, nogut balus i bagarap.

Wanem Ol Hevi Inap Kamap?

Klostu balus i bin bagarap long ol dispela samting:

(1) Switkes bilong wanpela man long tim bilong ol man i resis long ol maunten ais, i ran i go wantaim ol narapela switkes. Taim ol wokman i no putim yet dispela switkes long balus em i paia. Ol wokman i glasim switkes na ol i painim wanpela kain marasin bilong rausim gris. Dispela marasin nogut i bin kapsait insait long switkes. Na insait long switkes tu i gat masis bensin. Taim switkes i ran i go em i seksek na dispela i kirapim liklik hap paia long masis bensin na dispela i holim marasin i kapsait, olsem na switkes i paia olgeta. Gutpela tru dispela samting i kamap taim switkes i stap yet long graun. Sapos em i bin kamap taim balus i go antap 11,000 mita, ating bikpela bagarap inap kamap.

(2) Na wankain samting i kamap long switkes bilong wanpela pasindia i gat masis insait long switkes.

(3) Long wanpela ples balus ol wokman i painim wanpela botol ges, em ges i wok long kapsait. Klostu dispela botol i pairap olsem wanpela bom!

(4) Wanpela sia i gat wil i gat bateri, em i bin bagarapim skin bilong wanpela balus taim marasin asit insait long bateri i bin kapsait. Balus i no inap flai inap sampela de, long wanem, ol wokman i mas klinim gut na stretim gut balus. Kampani bilong dispela balus i bin lusim bikpela mani.

Sampela Samting Yu No Ken Karim Long Balus

Dispela ol lain bilong balus yumi bin stori pinis long ol, ol i wokim wanpela liklik buk (Dangerous Goods Regulations), na olgeta kampani bilong balus na ofis bilong baim tiket inap kisim dispela liklik buk. Planti lo buk i kamapim i stret long ol lo bilong olgeta balus long planti kantri. Liklik buk i gat lista long planti tausen samting i no gutpela tumas long putim long balus. Na liklik buk i kamapim rot stret bilong pasim kain kago olsem long bokis o switkes samting.

Tasol i gat lo long sampela kago i no inap tru long go insait long balus. Na i gat sampela kago i no stret yumi putim long switkes, tasol yumi inap salim sampela long balus long narapela rot olsem kago. Na sampela balus i larim man i karim sampela kain samting long paus o long poket bilong em sapos em i no planti. Sapos yu no klia tumas long wanem wanem samting yu inap putim insait long paus o switkes, em i gutpela long askim ol man bilong balus paslain long taim yu laik raun.

Yu Inap Kisim Toksave We?

Klostu olgeta balus i toksave long wanem ol samting i no gutpela long karim i go long balus. Na tiket bilong yu i gat lista bilong ol samting i tambu long karim long balus. Long wanpela kibung long 1989 ol kampani bilong balus i pasim tok long helpim ol man long save long sampela samting ol i mekim i no gutpela tumas. Ating ol i no save dispela samting ol i mekim inap bagarapim balus. Kirap long 1990 ol i pasim ol pepa long ol ples balus na ol ofis bilong baim tiket bilong tokaut olsem ol man bai kisim liklik pepa wantaim tiket bilong balus na dispela pepa bai toksave long wanem wanem ol samting inap bagarapim balus.

Wanem Sampela Samting i No Gutpela Long Balus?

I gat planti samting ol man i ting i orait, olsem em i no inap bagarapim wanpela samting. Tasol taim dispela samting i stap long balus, em i samting nogut tru. Olsem: Taim balus i wokabaut antap, kol na hat ausait na insait long balus inap senis senis. Na samting insait long balus inap mekim na senisim strong bilong win insait long balus. Taim dispela i kamap, sampela kain marasin i stap long balus long ol kago olsem ol switkes samting, em inap kapsait. Na sapos dispela marasin i bung wantaim narapela kain marasin samting, em inap kirapim paia o smok nogut. Olsem na em i bikpela samting long save, samting yu putim insait long switkes em i orait long putim o nogat.

Sampela samting i tambu em masis na masis bensin bilong man i save smok. Yu inap karim dispela ol samting long paus o poket bilong yu tasol.

Yu no inap tru long putim long balus wanpela samting paia inap kamap long en olsem pen, bensin, kerasin, o wanpela samting kain olsem dispela.

Na olgeta kain kain ges olsem botol ges, i tambu long karim i go long balus.

Na dainamait na paura bilong pairap (fireworks) na kain samting olsem, em tambu long balus. Ol inap pairap na bagarapim balus.

Ating yu lain pinis long mekim wok long sampela kain strongpela marasin long haus bilong yu, a? Olsem wanem? Yu save, taim yu laik raun long balus, yu no inap tru long karim sampela bilong ol dispela samting wantaim yu? Olsem: Planti ol marasin olsem mortin samting, na ol marasin olsem snowait. Sapos ol i kapsait ol inap kaikai skin o kago bilong balus na bagarapim.

Na sampela samting i gat strong bilong pulim ol samting olsem magnet i save mekim, ol inap bagarapim ol klok samting pailot i mekim wok long en bilong stiaim balus.

Samting Yu Mekim Inap Paulim Ol Samting Bilong Stiaim Balus!

Ating sampela yia nau yu na planti man moa i amamas long mekim wok long kain kain redio, teprikoda, video kamera, na sampela samting moa. Ating ol man bilong balus i larim yu i putim ol dispela samting long switkes sapos yu bin rausim bateri bilong en. Tasol ating lo bilong wanpela balus i narapela kain long lo bilong narapela balus, olsem na pastaim em i gutpela sapos yu askim ol long ofis bilong baim tiket, em i orait long yu karim dispela samting long switkes o nogat. Tasol long olgeta balus i gat lo olsem yu no ken mekim wok long ol dispela samting insait long balus, long wanem, ol inap paulim ol klok na ol samting kepten i mekim wok long en bilong stiaim balus.

Ol i larim olgeta pasindia wan wan i karim sampela marasin bilong stretim sik na marasin bilong mekim gut skin na liklik dring tu.

Yu Save Helpim Balus?

Olsem wanem? Yu save bihainim ol dispela lo? Yu save yu mas mekim wanem ol samting na balus i no ken bagarap? Taim yu laik putim ol samting long switkes bilong yu, yu mas tingim gut ol lo bilong balus na ol samting i tambu long balus. Mipela i kamapim sampela lo planti balus i save bihainim, tasol ating sampela balus i gat ol narapela kain lo tu.

Sapos yu gat tupela tingting long karim wanpela samting long balus, em i gutpela long askim ol man bilong balus. Sapos yu mekim olsem yu no inap brukim lo, na yu no inap karim wanpela samting em inap bagarapim yu, na ol narapela pasindia, na balus. Tru tumas, ol samting yu mekim inap helpim yu long raun gut long balus.

[Piksa long pes 25]

Olsem wanem? Yu inap makim ol samting i no stret long putim long switkes bilong yu?