Askim

Esekiel 18:20 i tok: “Sapos papa i mekim sin, orait pikinini i no gat asua, na em i no ken karim hevi bilong dispela sin.” Orait, yu ting dispela tok i pait wantaim tok bilong Kisim Bek 20:5 olsem Jehova “bai mekim save long ol na long 3-pela na 4-pela lain tumbuna bilong ol i kamap bihain”?

Dispela tupela tok i no pait wantaim. Wanpela skripsa i tok long God bai skelim wan wan man long sin em yet i bin mekim. Na narapela skripsa i kamapim wanpela samting i save kamap, olsem pasin bikhet man i mekim, dispela inap givim hevi long ol lain tumbuna pikinini bilong em i kamap bihain bihain.

Ol narapela tok bilong Esekiel sapta 18 i kamapim olsem man i bikhet, em yet bai karim hevi long pasin bikhet bilong em. Ves 4 i tok: “Sapos wanpela man i mekim sin, dispela man tasol i mas i dai.” Olsem wanem long man em i ‘gutpela man na pasin bilong en i stret olgeta’? Dispela kain man “em bai i stap gut.” (Ese. 8:​5, 9) Sapos man em i bikpela inap long em i karim hevi long sin bilong em, orait God bai ‘skelim pasin bilong em.’​—Ese. 18:30.

Dispela samting i kamap klia long stori bilong wanpela Livai, nem bilong em Kora. Taim lain Israel i bin wokabaut long ples drai nating, Kora i no amamas moa long ol gutpela wok em i holim pinis. Em i strong long kisim wok pris, olsem na em wantaim sampela man ol i bikhet long ol mausman bilong Jehova, em Moses na Aron. Ol i mekim pasin antap na ol i laik kisim dispela wok​—em wok ol i no gat rait long holim​—Jehova i kilim i dai Kora na bikhetlain bilong em. (Nam. 16:​8-11, 31-33) Tasol ol pikinini man bilong Kora ol i no insait long dispela pasin bikhet. God i no kotim ol long sin bilong papa bilong ol, nogat. Ol i stap gut long Jehova na dispela i lukautim ol na ol i no i dai.​—Nam. 26:​10, 11.

Tasol olsem wanem long tok lukaut i stap long Kisim Bek 20:​5, em hap bilong Tenpela Lo? Lukim gen ol ves i stap paslain na bihain long en. Jehova i mekim kontrak bilong Lo wantaim lain Israel. Taim ol Israel i harim pinis ol tok bilong dispela kontrak, ol i tokaut olsem: “Mipela bai mekim olgeta samting olsem Bikpela i bin tok” long mipela i mekim. (Kis. 19:​5-8) Em nau, lain olgeta i stap olsem wanpela lain tru bilong Jehova. Olsem na tok bilong Kisim Bek 20:5 i go stret long dispela lain.

Taim lain Israel i stap gut long Jehova, dispela i helpim ol na ol i kisim planti blesing. (Wkp. 26:​3-8) Tasol taim ol i sakim Jehova na i go bihainim ol giaman god, Jehova i tekewe blesing long ol na em i no lukautim ol moa; lain Israel i karim bikpela hevi long han bilong ol birua. (Het. 2:​11-18) Tru sampela i bin stap gut long God na bihainim ol lo bilong em, maski lain bilong ol i go lotuim ol giaman god. (1 Kin. 19:​14, 18) Ol man i stap gut long God ol i bin karim sampela hevi long sin bilong lain Israel, tasol Jehova i mekim gutpela-pasin-sori long ol.

Taim lain Israel i bikhet na sakim ol stiatok bilong Jehova na mekim nem bilong em i kamap olsem wanpela samting em ol narapela lain i ken tok bilas long en, Jehova i laik givim strafe long lain bilong em, na em i larim ol i go kalabus long Babilon. Dispela strafe i painim ol em i makim strafe bilong ol wan wan man, na tu, bilong ol manmeri bilong em olsem wanpela lain olgeta. (Jer. 52:​3-11, 27) Tru tumas, Baibel i kamapim klia olsem sin bilong lain Israel i bikpela tru, olsem na namba tri o namba foa lain tumbuna pikinini bilong ol i kamap bihain ol i karim hevi long dispela sin em ol tumbuna i bin mekim, olsem Kisim Bek 20:5 i tok long en.

Tok Bilong God i kamapim tu stori bilong sampela famili em ol i bin karim hevi long pasin nogut em papamama i bin mekim. Hetpris Eli i mekim Jehova i belhat, long wanem, em i bin larim tupela pikinini man bilong em, em ol i “man nogut tru,” long mekim yet wok pris. (1 Sml. 2:​12-16, 22-25) Eli i litimapim ol pikinini man bilong em moa winim Jehova, olsem na God i tok lain famili bilong Eli bai i no inap mekim moa wok pris. Dispela tok i stat long kamap tru long taim bilong tumbuna pikinini bilong em, Abiatar. (1 Sml. 2:​29-36; 1 Kin. 2:27) Dispela stiatok bilong Kisim Bek 20:5 i kamap klia long stori bilong Gehasi tu. Em i mekim wok nogut long namba em i holim olsem wokman bilong Elisa, bambai em i ken kisim mani kago long Bikman Naman bilong Siria, em Elisa i bin oraitim. Long rot bilong Elisa, Jehova i kotim Gehasi na tok: “Sik lepra i bin i stap long Naman, nau bai i kamap long yu. Na bai yu wantaim ol lain bilong yu i kamap bihain, yupela bai i kisim sik lepra oltaim.” (2 Kin. 5:​20-27) Olsem na ol lain tumbuna pikinini bilong Gehasi i kisim hevi long sin em i bin mekim.

Man Bilong Wokim yumi na Man Bilong Givim Laip long yumi, em Jehova, em i gat rait long makim wanem kain strafe i stret long man i kisim. Ol tok i kamap pinis i soim olsem ol pikinini o ol lain tumbuna pikinini inap pilim hevi bilong sin em ol tumbuna papamama bilong ol i bin mekim. Tasol Jehova i “harim singaut” bilong ol man em ol i stap tarangu tru, na ol man husat i strong long bihainim em, em bai orait long ol na ol i ken i stap belgut.

[Piksa long pes 29]

Kora na bikhet lain bilong em ol i karim hevi long pasin bikhet bilong ol