Stap Gut Aninit Long Wok Bos Bilong God

“Jehova em i Jas bilong yumi, Jehova em i Man bilong givim lo long yumi, Jehova em i King bilong yumi; em yet bai kisim bek yumi.”​—⁠AISAIA 33:​22, NW.

1. Wanem ol samting i mekim na lain Israel bilong bipo i narapela kain long ol narapela kantri?

LONG 1513 B.C.E., lain Israel i kamap wanpela kantri. Long dispela taim ol i no gat hap graun bilong ol yet, o biktaun ol i mekim wok gavman long en, o wanpela king long graun. Pastaim olgeta manmeri bilong dispela kantri ol i stap wokboi nating. Tasol i gat narapela samting tu i mekim na dispela nupela lain i narapela kain. God Jehova i no stap ples klia long ai bilong ol man, tasol em i Jas, Man bilong givim lo, na King bilong dispela kantri. (Kisim Bek 19:​5, 6; Aisaia 33:​22, NW ) I no gat narapela lain inap tok olsem!

2. Yumi gat wanem askim long pasin bilong God long stap bos bilong lain Israel? Bilong wanem bekim bilong dispela askim i bikpela samting long yumi?

² Jehova em i God bilong stretim gut ol samting, na em i God bilong bel isi, olsem na yumi save ol samting bilong lain em i bosim bai i ron gut. (1 Korin 14:33) Na i olsem tasol long ol lain Israel. Tasol olsem wanem wanpela lain ol man inap lukim i ken stap aninit long wok bos bilong wanpela God ol man i no inap lukim? I gutpela long tingim pasin Jehova i bin mekim bilong bosim dispela lain bilong bipo, na tingting tu long olsem wanem ol samting em i mekim long Israel i kamapim klia olsem i bikpela samting long yumi mas i stap gut aninit long wok bos bilong God.

Wok Bilong Bosim Israel Bilong Bipo

3. Jehova i mekim wanem na bai ol manmeri bilong em i gat gutpela helpim bilong stiaim ol?

³ Tru Jehova em King bilong Israel ol man i no inap lukim, tasol em i bin makim sampela gutpela man long stap olsem mausman bilong em. I gat ol hetman na ol het bilong famili bilong givim gutpela tok long ol manmeri na mekim wok jas. (Kisim Bek 18:​25, 26; Lo 1:15) Tasol ol dispela man i mas kisim helpim long God. Sapos nogat, yumi no ken ting ol bai inap mekim wok jas wantaim save na gutpela tingting i stret tru. Ol i no gutpela olgeta, na ol i no inap save long tingting i stap long bel bilong ol wanbilip. Tasol ol jas i save pret long God, ol inap givim ol tok i helpim ol wanbilip, long wanem, ol bai kamapim ol tok em Lo bilong God i as bilong en.​—⁠Lo 19:15; Song 119:​97-100.

4. Wanem sampela pasin ol gutpela jas bilong Israel i wok strong long abrusim, na bilong wanem ol i laik mekim olsem?

⁴ Man i mekim wok jas i mas save gut long Lo, tasol i gat sampela samting moa em i mas mekim. Ol dispela hetman i no gutpela olgeta, olsem na oltaim ol i mas bosim gut pasin kranki i stap long skin bilong ol yet​—⁠olsem pasin bilong tingim ol yet, na wantok pasin, na pasin bilong mangal​—⁠ol dispela samting inap paulim wok jas bilong ol. Moses i tokim ol: “Yupela i mas skelim olgeta man long wankain pasin tasol. Maski em i bikman o man nating. Na yupela i no ken pret long wanpela man, long wanem, God yet i stiaim tingting bilong yupela long taim bilong kot.” Yes, ol jas bilong Israel ol i mekim wok jas bilong God yet. Em i wanpela gutpela wok tru ol i holim!​—⁠Lo 1:​16, 17.

5. Jehova i makim ol jas, na em i stretim rot bilong wanem ol narapela samting bilong lukautim lain bilong em?

⁵ Jehova i bin stretim sampela rot moa bilong lukautim lain bilong em long ol samting bilong spirit. Paslain long ol i kamap long Graun Bilong Promis, em i bin tokim ol long wokim wanpela haus lotu sel, em i ples tru bilong mekim lotu i tru. Na tu em i stretim rot na bai i gat ol pris bilong skulim ol man long Lo, na givim ol animal olsem ofa, na wokim smok i gat gutpela smel bilong moning na apinun. God i makim bikbrata bilong Moses, em Aron, long kamap namba wan hetpris bilong Israel na em i makim ol pikinini man bilong Aron long helpim papa bilong ol long mekim ol wok bilong em.​—⁠Kisim Bek 28:1; Namba 3:10; 2 Stori 13:​10, 11.

6, 7. (a) Ol lain Livai i no bilong lain pris ol i stap olsem wanem long ol pris? (b) Ol Livai i bin mekim kain kain wok, na dispela inap skulim yumi long wanem samting? (Kolosi 3:⁠23)

⁶ Wok bilong lukautim sampela milion manmeri long ol samting bilong spirit em wanpela bikpela wok tru, na ol lain pris i no bikpela lain. Olsem na Jehova i stretim rot bilong ol lain bilong Livai long stap olsem helpim bilong ol. Jehova i tokim Moses: “Ol Livai i gat dispela wanpela wok tasol. Ol i mas mekim wok bilong Aron na bilong ol pikinini bilong en oltaim.”​—⁠Namba 3:​9, 39.

⁷ Ol Livai i stretim gut ol samting bilong ol. Ol i bruk long 3-pela lain famili​—⁠em lain Gerson, lain Kohat, na lain Merari​—⁠na olgeta i gat asainmen bilong ol long wok. (Namba 3:​14-17, 23-37) Sampela inap ting sampela asainmen i bikpela moa long ol narapela, tasol olgeta asainmen i gat bikpela wok bilong en. Wok bilong ol Livai bilong lain Kohat i mekim na ol i save stap klostu long Bokis Kontrak na ol samting insait long haus lotu sel. Tasol olgeta Livai i holim ol gutpela wok tru, maski ol i bilong lain Kohat o nogat. (Namba 1:​51, 53) Sori tru, sampela i no pilim tru gutpela wok bilong ol. Ol i no laik stap gut aninit long wok bos bilong God. Ol i lusim pasin bilong amamas long wok na ol i larim pasin antap na pasin jeles i daunim ol. Wanpela man Livai, nem bilong em Kora, em i wanpela bilong ol.

“Yupela i Laik Kamap Pris Tu, a?”

8. (a) Kora em i husat? (b) Ating wanem samting i bin kirapim Kora long tingim wok pris i olsem samting bilong ol man tasol?

⁸ Kora em i no het bilong lain famili bilong Livai, na em i no het bilong ol lain famili bilong Kohat. (Namba 3:​30, 32) Tasol em i wanpela hetman na ol Israel i rispektim em. Ating wok bilong Kora i mekim na em i bung wantaim Aron na ol pikinini bilong em planti taim. (Namba 4:​18, 19) Long ai bilong em yet Kora inap lukim popaia bilong Aron na ol pikinini bilong em, na nogut Kora i ting olsem: ‘Ol dispela pris i no gutpela olgeta, tasol mi gat wok long daun long ol! I no longtaim i go pinis na Aron i bin wokim bulmakau gol. Pasin bilong lotuim bulmakau hia i mekim na lain bilong mipela i pundaun long pasin bilong lotuim god giaman. Nau Aron, em brata bilong Moses, em i stap hetpris! Em wantok pasin! Na olsem wanem long tupela pikinini man bilong Aron, em Nadap na Abihu? Pasin ol i mekim i soim olsem ol i tingim gutpela wok bilong ol i olsem pipia samting, na dispela i as na Jehova i kilim tupela i dai!’a (Kisim Bek 32:​1-5; Wok Pris 10:​1, 2) Maski Kora i gat wanem tingting, yumi save em i kirap long tingim wok pris i olsem samting bilong ol man tasol. Dispela i kirapim em long bikhet long Moses na Aron, na bihain, em i bikhet long Jehova yet.​—⁠1 Samuel 15:23; Jems 1:​14, 15.

9, 10. Kora wantaim ol narapela bikhetman i bin sutim wanem tok long Moses? Olsem wanem ol inap save, i no stret long mekim olsem?

⁹ Kora em man i gat namba, olsem na em i no gat hatwok long kirapim ol narapela man i gat wankain tingting long joinim em. Em wantaim Datan na Abiram, ol i painim 250 narapela man i wanbel long tingting bilong ol​—⁠olgeta i hetman bilong lain Israel. Ol i bung wantaim na go lukim Moses na Aron na ol i tok: “Yumi olgeta i bilong Bikpela. I no yutupela tasol. Na Bikpela i stap wantaim yumi olgeta. Olsem na bilong wanem yutupela i litimapim yutupela yet na bosim mipela?”​—⁠Namba 16:​1-3.

¹⁰ Ol dispela bikhetman i kisim save pinis, olsem na ol i mas save, i no stret long sutim tok long wok bos bilong Moses. I no longtaim i go pinis, Aron na Miriam i bin mekim dispela pasin. Ol i bin kamapim tingting olsem Kora i kamapim nau! Olsem Namba 12:​1, 2 i tok, ol i mekim askim olsem: “Ating Bikpela i bin givim tok long ol manmeri long maus bilong Moses wanpela tasol, a? Nogat ya. Em i givim tok long ol long maus bilong mitupela tu.” Jehova i putim yau long tok tupela i mekim. Em i tokim Moses, Aron, na Miriam long bung long ai bilong haus sel na bai Em inap makim husat bilong i stap hetman. Orait nau Jehova i tok klia olsem: “Taim wanpela profet i stap namel long yupela Israel, mi save soim mi yet long em long samting olsem driman na mi save givim tok long em long driman. Tasol wokman bilong mi, Moses, i no olsem ol profet. Mi save mekim narakain pasin long em. Mi givim em olgeta wok bilong mi na mi save em bai i mekim.” Bihain long dispela, Jehova i givim sik lepra long Miriam inap sotpela taim.​—⁠Namba 12:​4-7, 10.

11. Moses i mekim wanem bilong traim stretim hevi Kora i kamapim?

¹¹ Kora na ol lain i wanbel wantaim em ol i mas save long dispela samting. No gat eskius bilong pasin bikhet bilong ol. Tasol maski i olsem, Moses i isi long ol na toktok gut wantaim ol. Em i laik kirapim ol long tingim gutpela wok ol yet i holim, em i tok: “God, Bikpela bilong yumi Israel, i bin kisim yupela namel long ol arapela lain manmeri bilong yumi. Na em i makim yupela tasol long i go klostu long em . . . Na olsem wanem? Yupela i ting dispela wok i samting nating tasol, a?” Wok bilong ol i no “samting nating tasol,” nogat tru! Ol Livai i gat planti gutpela samting pinis. Ol i laikim wanem samting moa? Sampela tok moa bilong Moses i kamapim klia tingting i stap long bel bilong ol. Moses i tok: “Yupela i laik kamap pris tu, a?”b (Namba 12:3; 16:​9, 10) Tasol Jehova i mekim wanem long dispela pasin bilong bikhet long wok bos bilong em?

Jas Bilong Israel i Kirap Mekim Wok

12. Ol Israel i mas mekim wanem na bai ol inap stap gut wantaim God?

¹² Long taim Jehova i givim Lo long ol Israel, em i tokim ol manmeri, sapos ol i bihainim tok bilong em ol bai kamap wanpela lain holi, na oltaim ol bai stap olsem sapos ol i stap wanbel long ol samting Jehova i mekim bilong bosim ol. (Kisim Bek 19:​5, 6) Tasol nau pasin bikhet i kamap ples klia, na em i taim bilong Jas na Man bilong givim lo long Israel long stretim! Moses i tokim Kora: “Tumora yu wantaim ol 250 man i bihainim yu, yupela i mas i kam long haus sel bilong God. Na Aron tu bai i kam. Na yupela olgeta wan wan bai i bringim plet bilong putim paia na putim paura bilong kamapim smok i gat gutpela smel long en na kam long alta na ofaim long Bikpela.”​—⁠Namba 16:​16, 17.

13. (a) Bilong wanem em i hambak pasin long ol dispela bikhetman i kukim paura olsem ofa long Jehova? (b) Jehova i mekim wanem long ol dispela bikhetman?

¹³ Olsem Lo i tok, ol pris tasol i ken wokim smok i gat gutpela smel olsem ofa. I no stret liklik long wanpela Livai i no bilong lain pris i wokim smok i gat gutpela smel olsem ofa long Jehova, na dispela i mas givim stretpela tingting long ol dispela bikhetman. (Kisim Bek 30:7; Namba 4:16) Tasol long Kora na ol man i stap long sait bilong em, nogat ya! Neks de Kora “i bungim olgeta lain manmeri na ol i sanap klostu long dua bilong haus sel na lukluk i go long Moses tupela Aron.” Baibel i tok: “Bikpela i tokim Moses na Aron olsem, ‘Yutupela klia. Lusim olgeta dispela manmeri. Nau tasol bai mi kilim ol i dai.’ ” Tasol Moses tupela Aron ol i krai long Jehova long em i no ken kilim i dai ol dispela manmeri. Jehova i harim tok bilong ol. Tasol long Kora na lain i pas wantaim em, Baibel i tok: “Paia i kam na i kukim dispela 250 man i mekim ofa bilong kamapim smok i gat gutpela smel.”​—⁠Namba 16:​19-22, 35.c

14. Bilong wanem Jehova i strong long givim strafe long ol lain Israel?

¹⁴ Tasol ol Israel husat i bin lukim samting Jehova i mekim long ol dispela bikhetman, ol i no larim dispela samting i skulim ol. “Long de bihain, olgeta manmeri i tok kros long Moses tupela Aron. Ol i tok olsem, ‘Yutupela i bin kilim i dai sampela manmeri bilong Bikpela.’ ” Ol Israel i go long sait bilong ol dispela bikhetman! Em nau, pasin bilong Jehova long isi long ol i pinis. I no gat man​—⁠Moses na Aron tu nogat​—⁠inap helpim ol nau. Jehova i mekim wanpela sik i kalap long ol dispela man i no harim tok, na “inap 14,700 manmeri i dai long dispela sik. Tasol ol i no bungim namba bilong ol lain man i dai wantaim Kora long dispela 14,700.”​—⁠Namba 16:​41-49.

15. (a) Wanem ol samting inap mekim na ol Israel i wanbel long daun long wok bos bilong Moses na Aron? (b) Dispela stori i givim wanem skul long yu long pasin bilong Jehova?

¹⁵ Ol dispela manmeri i dai nating. Sapos ol i bin wokim gut tingting ol i no ken bagarap. Long tingting bilong ol yet ol inap skelim ol askim olsem: ‘Husat ol i no wari long laip bilong ol na i go sanap long ai bilong king bilong Isip? Husat i bin strong na tok king i mas larim ol Israel i go fri? Husat wanpela tasol God i bin singautim long go antap long maunten Horep na toktok wantaim ensel bilong God bihain long ol Israel i lusim Isip?’ Gutpela wok tru Moses na Aron i bin mekim i kamapim klia olsem ol i stap gut long Jehova na ol i laikim tumas ol manmeri. (Kisim Bek 10:28; 19:24; 24:​12-15) Jehova i no amamas long kilim i dai ol dispela bikhetman. Tasol taim ol manmeri i strong long bihainim pasin bikhet, em i no surik long stretim hevi. (Esekiel 33:11) Olgeta dispela samting i bikpela samting tru long yumi long nau. Bilong wanem mipela tok olsem?

Lain Jehova i Makim Long Nau

16. (a) Wanem ol samting inap helpim ol Juda long save gut olsem Jisas em i mausman bilong Jehova? (b) Bilong wanem Jehova i senisim wok pris bilong lain Livai? Em i kamapim wanem samting olsem senis bilong en?

¹⁶ Long nau i gat wanpela nupela lain em Jehova i stap Jas, Man bilong givim lo, na King bilong ol, maski ol i no inap lukim em. (Matyu 21:43) Dispela lain i bin kamap long taim bilong ol aposel. Long dispela taim haus lotu sel bilong taim bilong Moses i no stap moa. I gat wanpela gutpela tempel tru long Jerusalem we ol Livai i mekim yet wok bilong ol. (Luk 1:​5, 8, 9) Tasol long yia 29 C.E. i gat narapela tempel, em tempel spirit, i kamap, na Jisas Krais i stap olsem Hetpris bilong en. (Hibru 9:​9, 11) Bikpela tok long wok bos God i makim i kamap gen. Jehova bai makim husat long stiaim dispela nupela lain? Olgeta samting Jisas i bin mekim i soim olsem em i stap gut long God. Em i laikim tumas ol manmeri. Na tu, em i bin wokim planti ol gutpela mirakel. Tasol olsem ol tumbuna bilong ol i gat strongpela het, bikpela lain bilong ol Livai ol i no laik bilip long Jisas. (Matyu 26:​63-68; Aposel 4:​5, 6, 18; 5:17) Bihain Jehova i pinisim wok pris bilong lain Livai na kamapim wanpela wok pris i narapela kain tru​—⁠em ol pris bilong lain bilong king. Ol dispela pris bilong lain bilong King i mekim wok yet i kam inap long nau.

17. (a) Wanem lain i insait long wok pris bilong lain bilong king long nau? (b) Jehova i mekim wanem wok long ol pris bilong lain bilong king?

¹⁷ Husat i insait long dispela lain pris bilong lain bilong king long nau? Aposel Pita i bekim dispela askim long namba wan pas spirit bilong God i kirapim em long raitim. Pita i tok long lain bilong Krais em spirit holi i bin makim, olsem: “Yupela i stap ol pris bilong lain bilong king. Yupela i stap lain manmeri i holi, em ol lain manmeri tru bilong God. Yupela i stap lain manmeri God i bin makim bilong em yet, bai yupela i ken tokaut long olgeta gutpela pasin em i bin mekim long yupela. Yupela i ken tokaut long em i bin singautim yupela long lusim tudak yupela i bin i stap long en, na em i bringim yupela i kam insait long lait bilong em, em lait i gutpela moa yet.” (1 Pita 2:⁠9) Dispela tok i kamapim klia olsem lain bilong Krais em God i makim, ol i dispela “pris bilong lain bilong King,” na tu, Pita i kolim ol wanpela “lain manmeri i holi.” Ol i stap olsem rot Jehova i mekim wok long en bilong skulim ol manmeri bilong em na stiaim ol long ol samting bilong spirit.​—⁠Matyu 24:​45-47.

18. Olsem wanem ol elda i helpim ol pris bilong lain bilong king?

¹⁸ Mausman bilong ol pris bilong lain bilong king em ol elda i lukautim ol wok insait long ol kongrigesen bilong ol Witnes Bilong Jehova i stap long olgeta hap bilong graun. I stret yumi sapotim na rispektim ol dispela man, maski ol i bilong liklik lain o nogat. Bilong wanem? Long wanem, long rot bilong spirit holi bilong em, Jehova i bin makim ol elda long mekim wok. (Hibru 13:​7, 17) Olsem wanem mipela inap tok olsem?

19. Olsem wanem spirit holi i save makim ol elda?

¹⁹ Ol dispela elda i winim ol mak Baibel i kolim, em spirit bilong God i as bilong ol dispela tok. (1 Timoti 3:​1-7; Taitus 1:​5-9) Olsem na i stret long tok spirit holi i makim ol. (Aposel 20:28) Ol elda i mas save gut long ol tok i stap long Baibel. Wankain olsem dispela Nambawan Jas i bin makim ol, ol elda tu i mas nolaik tru long olgeta samting i kain olsem wantok pasin taim ol i mekim wok jas.​—⁠Lo 10:​17, 18.

20. Wanem wok bilong elda i bikpela samting long yu yet?

²⁰ Yumi no laik sutim tok long wok bos bilong ol, nogat. Yumi amamas tru long ol elda bilong yumi i save givim bel long mekim wok! Wok bilong ol long stap gut long bilip​—⁠sampela i mekim olsem inap planti yia​—⁠dispela i kirapim yumi long trastim ol. Oltaim ol i save redim na lukautim ol miting, ol i wok wantaim yumi long autim “gutnius bilong kingdom,” na ol i save givim gutpela tok bilong Baibel long yumi long taim stret. (Matyu 24:14; Hibru 10:​23, 25; 1 Pita 5:⁠2) Ol i save kam lukim yumi long taim yumi gat sik na ol i mekim gut bel bilong yumi long taim yumi krai i stap. Ol i save tingim ol narapela na givim bel long helpim ol wok bilong Kingdom. Spirit bilong Jehova i stap wantaim ol, na em i orait long ol.​—⁠Galesia 5:​22, 23.

21. Ol elda i mas tingim wanem samting? Bilong wanem ol i mas mekim olsem?

²¹ Tru ol elda i no gutpela olgeta. Ol i save ol yet i no inap mekim gut olgeta wok, olsem na ol i wok strong long ol i no ken stap olsem bikman i daunim “ol manmeri God i bin putim long han bilong [ol].” Ol i save tingim ol yet i olsem ol wanwok i save ‘wok wantaim bilong kamapim amamas bilong ol.’ (1 Pita 5:3; 2 Korin 1:24) Ol i gat pasin daun, ol i givim bel long wok, na ol i laikim tru Jehova. Ol i save, taim ol i wok long bihainim moa yet pasin bilong Jehova, ol bai stap gutpela helpim moa long kongrigesen. Ol i tingim dispela na ol i wok strong oltaim long kisim ol pasin bilong God olsem pasin sori, pilim hevi bilong narapela, na no les kwik long man.

22. Olsem wanem pasin bilong skelim stori bilong Kora i strongim bilip bilong yu long oganaisesen bilong Jehova i stap long graun?

²² Yumi amamas olsem Jehova, em dispela Man yumi no inap lukim, em i stap King bilong yumi, na Jisas Krais i stap Hetpris bilong yumi, na ol lain God i makim olsem ol pris bilong lain bilong king ol i tisa bilong yumi, na yumi gat ol gutpela elda Kristen bilong givim ol gutpela tok long yumi! Tru, i no gat wanpela oganaisesen em ol man bilong graun i bosim inap mekim wok i gutpela olgeta, tasol yumi amamas long rot i op bilong yumi ken mekim wok bilong God wantaim ol gutpela wanbilip, em ol i amamas long stap gut aninit long wok bos bilong God!

[Ol Futnot]

Yu Lainim Wanem Samting?

• Wanem ol gutpela samting Jehova i bin kamapim bilong lukautim ol Israel?

• Bilong wanem i no gat eskius bilong Kora long bikhet long Moses na Aron?

• Pasin Jehova i bin mekim long ol bikhetman i givim wanem skul long yumi?

• Olsem wanem yumi inap soim olsem yumi amamas long ol samting Jehova i mekim bilong helpim yumi long nau?

[Piksa long pes 9]

Yu save ting olgeta asainmen yu kisim insait long wok bilong Jehova i olsem wanpela gutpela wok?

[Piksa long pes 10]

“Bilong wanem yutupela i litimapim yutupela yet na bosim mipela?”

[Piksa long pes 13]

Ol elda i olsem mausman bilong ol pris bilong lain bilong king