Bilong Wanem Yumi Mas Givim Rispek Long Ol Lapun?
LONG nambis bilong California, Amerika, i gat wanpela diwai saipres em planti man i save kisim piksa bilong en. Ol i kolim dispela diwai Lone Cypress. Ol i tok dispela diwai i winim 250 krismas. Em i gat nem long pasin bilong sanap strong, na ol i save lukautim gut dispela naispela diwai, olsem: Ol i pasim ol strongpela waia na ol ston olsem simen long as bilong en bambai em i ken sanap strong.
Ating dispela olpela diwai i kirapim yumi long tingim ol lapun Kristen i stap namel long yumi, em ol i gat pasin bilong sanap strong na karim hevi. Wanpela bikpela rot bilong soim dispela pasin, em ol i save autim gutnius. Profet Joel i bin tok profet olsem “ol lapun man” bai autim tok bilong Baibel. (Jol. 2:28-32; Ap. 2:16-21) Tingim planti aua ol i lusim bilong helpim ol man long kisim save long “gutnius bilong kingdom”! (Mt. 24:14) Sampela bilong ol dispela lapun man na meri bilong autim tok bilong Kingdom, ol i bin sanap strong inap planti yia na karim hevi long ol man i mekim nogut long ol na ol narapela hevi tu. Sapos ol man i tingim wanpela diwai saipres i sanap strong na i gat ol strongpela waia na simen bilong sapotim em, orait em i bikpela samting moa long yumi mas tingim ol lapun na mekim gut na givim biknem long ol!
God Jehova i bin tokim lain bilong em long bipo: “Yupela i mas aninit long ol lapun na mekim gut long ol.” (Wkp. 19:32) Namel long ol wokman bilong Jehova long nau, yumi save lukim planti husat i stap gutpela piksa long pasin bilong stap gut long God na “bihainim” na wokabaut wantaim em inap planti yia. (Mai. 6:8) Tru tumas, taim ol i bihainim yet ol stiatok bilong Baibel, waitpela gras bilong ol “i givim biknem long ol.”—Snd. 16:31.
Aposel Pol i tokim yangpela man Timoti: “Yu no ken krosim ol lapun man.” Timoti i mas “stretim ol long tok isi, olsem [em i] stretim papa,” na “mekim wankain pasin long ol lapun meri olsem [em i] save mekim long ol mama.” (1 Ti. 5:1, 2) Timoti i mas “aninit” long ol lapun. Em nau, i klia tru olsem Jehova i laik bai ol tok yumi mekim i kamapim klia olsem yumi givim rispek long ol lapun.
Rom 12:10 i tok: “Yupela i mas strong long litimapim nem bilong ol arapela.” Ol wasman long kongrigesen i save givim biknem long ol lapun Kristen. Tasol yumi olgeta i mas strong long givim biknem long ol narapela.
Famili yet i gat bikpela wok long mekim gut long ol papamama na ol lapun bubu. Tingim dispela diwai Lone Cypress, em ol man i bin painim sampela rot bilong lukautim em na bai em i ken i stap longpela taim, na ol i wok long mekim yet. Yumi tu i mas painim rot bilong mekim gutpela pasin long ol lapun papamama na ol lapun bubu. Olsem: Sapos yumi putim gut yau long tok bilong ol, bai yumi no strong long mekim ol samting olsem yumi yet i laikim na yumi no tingim laik na tingting bilong ol.—Snd. 23:22; 1 Ti. 5:4.
Ol lapun i stap namel long yumi ol i gutpela samting tru long ai bilong Jehova. Em i no save lusim ol. (Sng. 71:18) God tru i save strongim ol long stap gut yet long wok bilong em. Yumi tu i mas wok yet long helpim na givim rispek long ol lapun.
[Ol Piksa long pes 7]
Diwai Lone Cypress i nidim samting bilong helpim em long sanap strong, na olsem tasol ol lapun i mas i gat man bilong mekim gut long ol na givim biknem long ol
[Kredit Lain]
American Spirit Images/age fotostock