Ol Kristen Tru i Save Mekim Gut Long Ol Lapun
WANPELA meri bilong skelim samting bilong ol lapun, nem bilong em Suzanne Steinmetz, em i tok, ‘Lain bilong yumi ol i save skelim wok ol man inap mekim na ol i tingim gut ol na litimapim nem bilong ol na givim gutpela pe long ol. Tasol ol lapun i no gat strong moa bilong mekim wok.’ Olsem na ol man bilong nau ol i lukim ol lapun i olsem samting nating; ol i ting i no gat wanpela gutpela wok ol inap mekim. Planti man i no tingim gut ol lapun, na sampela man i mekim nogut long ol.
Tasol Baibel i tok wanem long ol lapun? Baibel, em Tok Bilong God, i tokaut long hevi na hatwok bilong ol lapun. Man bilong raitim sam em i beten long God na em i tok: “Nau mi lapun pinis na mi no gat strong moa, orait nogut yu lusim mi na givim baksait long mi.” (Sam 71:9) Taim em i lapun em i pilim moa yet olsem Jehova i mas helpim em. Na Baibel i tok, yumi tu yumi mas helpim ol lapun.
Tru, Solomon i tok, taim bilong lapun em taim bilong “hevi” na ol man i “no amamas” long en. (Eklisiastis 12:1-3, NW ) Tasol wanpela blesing God i save givim long ol man, em olsem: “Bai [ol i] stap longpela taim long graun.” (Provep 3:1, 2) Olsem: Em i mekim tok promis long Ebraham na em i tok: “Bai yu stap . . . inap long yu lapun tru na yu dai, na bai ol i planim yu.” (Jenesis 15:15) I no olsem God i laik mekim nogut long Ebraham, na bai Ebraham i karim hevi inap planti yia na em i “no amamas.” Nogat. Taim Ebraham i lapun pinis em i stap bel isi na amamas, long wanem em inap tingim ol gutpela wok bilong Jehova em i bin mekim. Na em inap wetim “dispela taun i gat strongpela pos bilong en,” em Kingdom bilong God. (Hibru 11:10) Olsem na em i stap amamas na taim em i “lapun tru” em i dai na ol i planim em.—Jenesis 25:8.
Orait, bilong wanem Solomon i tok, taim yumi go lapun em taim bilong “hevi”? Solomon i tingim ol hevi i save kamap long skin bilong ol lapun, long wanem skin bilong ol i wok long bagarap na i no gat strong moa. Tasol taim man i yangpela yet, sapos em i ‘no tingim Man bilong wokim em,’ orait taim em i go lapun, em bai i gat planti hevi moa. (Eklisiastis 12:1, NW ) Long wanem olgeta wok em i mekim i lus nating tasol na em i ‘no ken amamas’ taim em i lapun. Em i givim baksait long God, na ating sampela sik i bin kisim em long dispela rot na dispela sik bai givim bikpela hevi moa long em taim em i lapun. (Lukim Provep 5:3-11.) Olsem na taim em i tingting long bihain, em i ting olsem em i bilong i dai tasol. Man i givim bel long mekim wok bilong God, taim em i go lapun, “hevi” i painim em tu, long wanem skin bilong em i no gat strong moa. Tasol dispela kain man em i ken i stap bel isi na amamas wankain olsem Ebraham, long wanem em i bin mekim gutpela wok, na em i gat liklik hap strong bilong skin i stap yet na em i ken mekim wok long en bilong lotuim God. Baibel i tok: “Ol man i lukim waitpela gras bilong ol lapun, na ol i save, ol lapun i bin bihainim stretpela pasin na ol i stap longpela taim long graun. Olsem na ol i givim biknem long ol.”—Provep 16:31.
Long sampela samting, ol lapun i winim ol yangpela. Solomon i tok: “Strong bilong ol yangpela manmeri, na yangpela bilong ol, em i giaman tasol.” Tru, ating ol yangpela i gat strongpela skin, tasol ating ol i no gat save pinis, o gutpela tingting. Tasol ol lapun i bin i stap longpela taim long graun na ol i gat save pinis. Ol lapun i “abrusim ol samting i save bagarapim skin”; tasol ol yangpela i no tingting gut na ol i ron i go bungim ol dispela samting. (Eklisiastis 11:10, NW; 2 Timoti 2:22) Olsem na Solomon inap tok: “Ol lapun i gat waitpela gras, na ol manmeri i save tingting long dispela na givim biknem long ol.”—Provep 20:29.
Olsem na Baibel i save litimapim nem bilong ol lapun. Orait, dispela samting i mas kirapim ol Kristen long mekim wanem kain pasin long ol lapun?
“Kirap Sanap” long Ai Bilong Ol Lapun
God i tok ol Isrel i mas tingim gut ol lapun. Lo bilong Moses i tok: “Long ai bilong man i gat waitpela gras yu mas kirap sanap, na yu mas tingim gut ol lapun man.” (Levitikas 19:32, NW ) Bihain ol Juda i kirap long ting olsem, dispela lo i no makim tasol olsem ol i mas tingim gut ol lapun; ol i ting em i makim samting tru ol i mas mekim. Olsem na wanpela buk i stori long pasin bilong ol man long hap bilong Is na dispela buk i tok: “Ol man bilong raitim ol buk bilong ol Juda i tok, ol Juda i gat lo olsem: Taim lapun i wokabaut i kam na em i stap longwe long ol inap 1.8 mita, ol i mas kirap sanap; na taim lapun i wokabaut i go pinis, ol i mas sindaun gen. Ol i laik makim olsem ol i kirap sanap bilong tingim gut lapun tasol.” (Buk Oriental Customs bilong Dr. Samuel Burder) Ol i no mekim olsem long ol lapun i gat biknem tasol; nogat; ol i save mekim long olgeta lapun. Buk lotu bilong ol (Talmud) i tok: “Maski save bilong lapun i lus pinis, tasol yupela mas tingim gut em.” Wanpela tisa bilong ol Juda i tok, ol i mas tingim gut ol lapun i no gat save tu na ol i no bin skul. Dispela tisa i tok, “Lapun i winim pinis planti krismas, olsem na em i mas kisim sampela save.”—The Jewish Encyclopedia.
Ol Kristen long nau ol i no i stap aninit moa long ol lo bilong Moses. (Rom 7:6) Tasol i no olsem ol i no gat wok moa long tingim gut ol lapun. Nogat. Aposel Pol i tokim wasman Kristen, Timoti: “Yu no ken krosim lapun man. Nogat. Yu mas stretim em long tok isi, olsem yu stretim papa bilong yu. . . . Na yu mas stretim ol lapun meri, olsem yu stretim ol mama bilong yu.” (1 Timoti 5:1, 2) Pol i tokim yangpela man Timoti em i gat namba inap long em i “tokim” ol narapela man long samting ol i mas mekim. (1 Timoti 1:3) Tasol sapos wanpela man i gat bikpela krismas, winim bilong Timoti—na em i holim wok wasman—na em i popaia na i no skelim gut wanpela samting o em i mekim wanpela tok i no stret, Timoti i no ken “krosim” em na mekim olsem em i samting nating. Nogat. Timoti i mas tingim gut dispela man i lapun na “stretim em long tok isi, olsem [em i] stretim papa bilong [em].” Timoti i mas tingim gut ol lapun meri tu insait long kongrigesen. Em i mas tingim gut ol lapun na i olsem em i ‘kirap sanap long ai bilong ol manmeri i gat waitpela gras.’
Olsem na lotu Kristen em i wanpela lotu i tingim gut ol lapun. Tasol planti man long ol lain ol i kolim Kristen, ol i mekim nogut long ol lapun. Olsem wanem? I gat sampela man bilong lotu ol i save bihainim yet ol lo bilong Baibel? I gat. Em ol Witnes Bilong Jehova. Long lain Witnes i gat planti tausen lapun i stap na ol Witnes i no gat tingting nogut long ol; ol i no pilim olsem ol i givim hevi na hatwok long ol. Nogat. Tru, skin bilong sampela i no strong moa na ating ol i no inap mekim bikpela wok olsem bipo ol i mekim. Tasol planti ol i bin i stap gut long wok Kristen inap planti yia pinis, na strongpela bilip bilong ol i kirapim ol yangpela Witnes long bihainim pasin bilong ol.—Lukim Hibru 13:7.
Tasol i no olsem ol lapun i mas i stap nating tasol insait long kongrigesen. Nogat. Baibel i tok ol i mas i stap olsem gutpela piksa na makim gutpela pasin ol narapela Kristen i ken bihainim. Ol i mas “tingting gut long stretpela pasin na bosim tru tingting bilong ol. Ol i mas i stap gut long tok bilong bilip, . . . ol i mas wokabaut holi.” Gutpela tingting na save ol i kisim pinis ol i mas givim long ol narapela. (Taitas 2:2, 3) Joel i mekim tok profet na em i tok “ol lapun” tu bai autim tok bilong Baibel. (Joel 2:28, NW ) Ating yu yet yu bin lukim planti lapun Witnes ol i kisim amamas yet long wok bilong i go long haus bilong ol man na autim tok.
Mekim Gut long Ol “Moa Yet”
Ol Witnes Bilong Jehova i wok strong long tingim gut ol lapun; ol i mekim planti samting bilong helpim ol. Long ol bikpela kibung bilong lotu bilong ol, ol i save makim sampela sia bilong ol lapun tasol. Na ol i save tingim olgeta lapun wan wan. Long Japan wanpela Witnes i larim wanpela lapun meri i gat 87 krismas i kisim ples bilong em long ka bilong famili bambai dispela lapun meri inap i go long ol miting. Na dispela Witnes i go long ol miting olsem wanem? Em i kikim wilwil. Long Brasil i gat wanpela painia i stap, em i gat 92 krismas. Ol narapela man i lukim olsem ol Witnes i save “tingim gut em, na toktok wantaim em . . . Em i stap olsem hap bilong kongrigesen na mekim gutpela wok.”
Tasol i no olsem yumi mekim gut long ol lapun inap pinis na yumi no inap mekim dispela wok bilong yumi i kamap gutpela moa. Nogat. Pol i raitim pas long ol Kristen long Tesalonaika na em i tok: “Mi no ken raitim sampela tok long yupela long pasin bilong givim bel bilong yupela long ol brata. . . . yupela i save givim bel bilong yupela long ol brata bilong olgeta hap long Masedonia. Tasol, ol brata, mipela tok strong long yupela: Yupela i mas mekim dispela pasin i kamap moa yet.” (1 Tesalonaika 4:9, 10) Dispela gutpela tok i stret long yumi long pasin yumi mekim long ol lapun. Wanpela Kristen i gat 85 krismas em i bel hevi, long wanem em i no kisim wanpela nupela buk bilong Baibel. Bilong wanem em i no kisim? Em i yaupas na em i no harim toksave long miting bilong kirapim ol brata sista long putim oda bambai ol inap kisim dispela buk; na i no gat wanpela brata o sista i tingim dispela lapun na putim oda bilong em. Kwiktaim ol i stretim dispela samting, tasol stori bilong dispela samting i helpim yumi long save, yumi mas tingting moa yet long helpim ol lapun.
I gat planti samting lain bilong God long nau ol i ken mekim na bai ol i mekim gut long ol lapun “moa yet.” Long ol miting Kristen ol i ken “kirapim” ol lapun long “laikim ol manmeri na mekim gutpela pasin.” (Hibru 10:24, 25) Ol yangpela na ol lapun ol i save bung wantaim na toktok wantaim long ol Haus Kingdom, tasol ating ol i ken tingting long mekim moa yet. Olsem: Sampela papamama i save kirapim pikinini bilong ol long i go toktok gut wantaim ol lapun long kongrigesen.
Yumi ken mekim gut long ol lapun long ol narapela taim tu. Yumi mas wok strong moa long bihainim tok bilong Luk 14:12-14 na singautim ol lapun i kam long ol liklik bung o pati bilong yumi. Maski ol i no inap i kam, tasol bai ol i pilim tru gutpela pasin yumi mekim bilong tingim ol. Baibel i tok, ol Kristen i mas singautim ol man i kam long haus bilong ol na “lukautim gut ol.” (Rom 12:13) 1 no olsem ol i mas redim bikpela kaikai o kain kain kaikai. Nogat. Wanpela Witnes bilong Jemani i tok: “Singautim ol lapun i kam dring ti wantaim yu na larim ol i stori long ol samting i bin painim ol long bipo.”
Aposel Pol i tok: “Yupela olgeta wan wan i mas litimapim nem bilong ol arapela tasol.” (Rom 12:10) Ol elda bilong kongrigesen long lain Witnes Bilong Jehova ol i save go pas long mekim gut long ol lapun Kristen. Planti taim ol elda i save givim sampela wok long ol lapun em ol inap mekim, olsem lainim ol nupela man long autim tok, o helpim ol brata long stretim haus ol i save bung long en bilong mekim ol miting Kristen. Ol man i yangpela liklik na ol i holim wok elda, long pasin daun ol i ken i go long ol elda i lapun liklik na askim ol long givim gutpela tingting na save long ol. Long dispela rot bai ol i litimapim nem bilong ol dispela brata. (Provep 20:5) Taim ol elda i mekim miting bilong ol, ol dispela yangpela elda i ken bihainim pasin bilong Ilaihu long Baibel, na ol i ken larim ol elda i lapun liklik na ol i gat save pinis ol i kamapim tingting bilong ol pastaim.—Jop 32:4.
Ating ol lapun i no inap tingting kwik o mekim kwik ol samting olsem ol yangpela inap mekim, tasol nogut ol yangpela i les kwik long ol. Wanpela dokta (Dr. Robert N. Butler) i stori long sampela hevi i save painim ol lapun, na em i tok: “Skin bilong ol i no strong moa na ol i no inap mekim kwik ol samting olsem ol narapela man, na dispela samting inap mekim ol i pret na tingting planti. Na ating bai ol i no inap lukluk gut o harim gut, na dispela samting tu i givim hevi long ol.” Ol yangpela i mas pilim ol dispela hevi bilong ol lapun na sori long ol, a?—1 Pita 3:8.
Yes, ol Kristen tru long nau ol i mas sori tru long ol lapun i stap long lain bilong ol. Ol i mas tingim gut ol na wok long helpim ol. Ol Witnes Bilong Jehova i save mekim gut dispela wok bilong ol. Tasol olsem wanem taim ol lapun Kristen—o papamama bilong ol Kristen—i gat sik o ol i kamap rabis? Em wok bilong husat long lukautim ol? Ol tok i kamap bihain long dispela bai kamapim ol tok bilong Baibel i bekim dispela askim.
[Ol Piksa long pes 7]
Long ol kongrigesen bilong ol Witnes Bilong Jehova i gat planti gutpela wok ol lapun inap mekim na ol i amamas long mekim