Beten

2 Long Husat?

YU TING God i save harim olgeta beten, maski ol man i beten long husat? Planti manmeri long nau i save ting olsem. Planti man husat i laik olgeta lotu i bung wantaim na mekim lotu, ol i laikim dispela tingting, maski ol i gat ol narapela narapela bilip. Yu ting dispela tingting bilong ol i stret?

Baibel i tok planti man i no save beten long God tru. Long taim bilong ol man bilong raitim Baibel, planti man i bin beten long ol imis. Tasol planti taim God i bin givim tok lukaut long ol i no ken mekim olsem. Buk Song 115: 4-6 i tok long ol imis olsem: “Ol i gat yau, tasol ol i no inap harim toktok.” Dispela tok i klia tru. I no gat as long beten long wanpela god husat i no inap harim yumi, a?

Wanpela stori bilong Baibel i kamapim klia dispela samting. Profet Elaija i tokim ol profet bilong Bal long beten long god bilong ol, na bihain Elaija bai beten long God bilong em. Elaija i tok God tru bai harim beten na god giaman, nogat. Ol profet bilong Bal i orait long mekim olsem, na ol i beten strong inap longpela taim, na maski ol i singaut bikmaus,i no gat wanpela samting i kamap! Baibel i tok: “I no gat bekim long beten bilong ol, na i no gat wanpela samting i kamap. Nogat tru.” (1 King 18:29) Tasol wanem samting i kamap taim Elaija i beten?

Taim Elaija i beten pinis, wantu God bilong em i harim beten na i salim paia i kam daun na kukim tru ofa em Elaija i bin redim. Wanem samting i narapela kain long beten bilong Elaija? I gat wanpela bikpela samting long dispela beten i stap long 1 King 18:​36, 37. Em i wanpela sotpela beten​—long tok Hibru bilong pastaim dispela beten i gat olsem 30 tok tasol long en. Tasol insait long dispela sotpela beten, Elaija i kolim nem bilong God, em Jehova, inap tripela taim.

Bal, mining bilong en “papa bilong wanpela samting” o “bosman,” em i god bilong ol Kenan, na i gat planti narapela narapela god Bal. Tasol nem bilong God tru em Jehova, na long heven na graun em wanpela tasol i holim dispela nem. Dispela God i tokim lain bilong em olsem: “Mi tasol mi Bikpela. Bikpela [“Jehova,” NW], em nem bilong mi, na yupela i mas givim biknem long mi wanpela tasol.”​—Aisaia 42:8.

Olsem wanem? Beten bilong Elaija na bilong ol profet bilong Bal, i go long wankain god tasol? Pasin bilong lotuim Bal i kirapim ol manmeri long mekim wok pamuk insait long ples lotu na kilim i dai ol man olsem ofa. Tasol pasin bilong lotuim Jehova i kirapim lain bilong em, ol Israel, long mekim lotu long stretpela pasin na ol i no ken insait liklik long ol dispela pasin nogut. Olsem na tingim: Sapos yu raitim wanpela pas long wanpela gutpela pren tru na putim nem bilong em long karamap bilong pas, yu laik bai ol i bringim dispela pas i go na givim long wanpela man i gat narapela nem, em pasin bilong em i nogut tru na i no wankain liklik long gutpela pren bilong yu? Nogat tru, a?

Sapos yu beten long Jehova, yu beten long Man Bilong Wokim olgeta samting, na Papa bilong olgeta manmeri.a Profet Aisaia i beten na i tok: “Yu Bikpela, yu papa tru bilong mipela.” (Aisaia 63:16) Long dispela God tasol, Jisas Krais i bin tokim ol disaipel olsem: “Mi go long Papa bilong mi na Papa bilong yupela. Na mi go long God bilong mi na God bilong yupela.” (Jon 20:17) Jehova em i Papa bilong Jisas. Em i dispela God Jisas i beten long em, na em i skulim ol disaipel tu long beten long em.​—Matyu 6:9.

Olsem wanem? Baibel i tokim yumi long beten long Jisas, Maria, ol santu, o long ol ensel? Nogat, yumi mas beten long Jehova wanpela tasol. Tingim tupela as na i olsem: Namba wan, beten em wanpela pasin bilong lotu, na Baibel i tok yumi mas lotuim Jehova wanpela tasol. (Kisim Bek 20:5) Namba tu, Baibel i tok Jehova i gat nem olsem Man bilong “harim beten.” (Song 65:2) Tru, Jehova i save givim wok long ol narapela man, tasol dispela wok bilong harim beten em i no bin givim long narapela. Em yet i dispela God husat i tok promis long harim beten bilong yumi.

Olsem na sapos yu laik bai God i harim ol beten bilong yu, tingim dispela tok bilong Baibel olsem: “Olgeta man husat i singaut long nem bilong Jehova, em bai kisim bek ol.” (Aposel 2:​21, NW) Tasol olsem wanem? God i save harim olgeta beten? O i gat sampela samting yumi mas save long en sapos yumi laik bai Jehova i harim beten bilong yumi?

[Futnot]

[Piksa long pes 5]

Elaija i salensim ol profet bilong Bal na dispela i soim olsem olgeta beten i no go long wankain God