‘Gutpela Pasin Em i Bin Mekim i Go Wantaim Em’
THEODORE JARACZ, em i wanpela memba bilong lain Gavening Bodi Bilong Ol Witnes Bilong Jehova, em i dai long Trinde, Jun 9, 2010, na wok bilong em long graun i pinis. Em i gat 84 krismas na em i dai lusim meri bilong em Melita, em tupela i bin marit inap 53 yia. Ol narapela long famili bilong em i stap laip yet, em wanpela sista bilong em na wanpela kandere man na tupela kandere meri.
Mama i bin karim em long Septemba 28, 1925, long Pike County, Kentucky, long Amerika. Brata Jaracz i bin dediket long Jehova na kisim baptais taim em i gat 15 krismas, long Ogas 10, 1941. Tupela yia bihain, taim em i gat 17 krismas, em i kirap long mekim wok painia oltaim, dispela em stat bilong wok fultaim sevis em i bin mekim klostu olsem 67 yia.
Long 1946, taim Brata Jaracz i gat 20 krismas, em i insait long namba 7 klas bilong Wastaua Baibel Skul Bilong Gileat. Bihain long gretiuesen, ol i makim Brata Jaracz long mekim wok wasman raun long Cleveland, Ohio, long Amerika. Long 1951, em i kisim wanpela asainmen bilong go lukautim ol wok long brens ofis long Australia. Wanpela stori bilong 1983 Yearbook of Jehovah’s Witnesses i tok, Brata Jaracz “i strongim tru ol brata long Australia long pasin bilong em long givim bel tru long bihainim ol lo tiokratik na gutpela pasin bilong em long autim tok.”
Bihain long em i go bek long Amerika, Brata Jaracz i maritim Melita Laskol long Disemba 10, 1956. Em na meri bilong em i kirap long mekim wok olsem wasman raun, na ol i raun lukim ol kongrigesen long ol sekit long wanpela bikpela hap long Amerika. Long pinis bilong 1974, ol i singautim Brata Jaracz long kamap wanpela memba bilong Gavening Bodi Bilong Ol Witnes Bilong Jehova.
Inap longpela taim bai yumi tingim Brata Jaracz olsem wanpela gutpela wokman i dediket long Jehova, na man i save tingting oltaim long mekim ol wok bilong God. Em i wanpela man marit i save laikim na tingim gut meri bilong em, na tu, em i man bilong tingim tru ol samting bilong lotu na tingim laik bilong ol narapela pastaim long laik bilong em yet. (1 Ko. 13:4, 5) Dispela pasin bilong em long laikim ol narapela man i kamap ples klia long tingting bilong em olsem yumi mas mekim wankain pasin long olgeta man na marimari long ol. Na tu, pasin bilong em long laikim na tingim tru ol man i kamap ples klia long rot bilong wok autim tok bilong em.
Yumi sori tru long dai bilong Brata Jaracz, em man i bin mekim bikpela wok tru. Famili Betel na ol bratasista long olgeta hap i laikim em, tasol yumi amamas long em i bin stap gut long wok bilong Jehova inap planti yia. Yumi save em i bin ‘holimpas bilip i go inap long taim em i dai, na em i kisim pinis laip olsem prais.’ (KTH 2:10) Na yumi save tu olsem ‘gutpela pasin em i bin mekim i go wantaim em.’—KTH 14:13.