Askim

Jisas i tokim ol man: “Yupela i mas i stap stretpela manmeri tru, olsem Papa bilong yupela i stap long heven em i stap stretpela tru.” Long nau olsem wanem ol man inap “i stap stretpela tru”?​—Mt. 5:48.

Bilong painim bekim bilong dispela askim, yumi mas save long sampela mining bilong dispela tok “stretpela tru” o “nambawan tru” long Baibel. Taim Baibel i mekim dispela kain tok, sampela taim em i no makim samting i stret olgeta. Tru, Jehova yet i stret olgeta. Tasol ol man bilong graun ol inap i stap stretpela tru long sampela samting tasol. Tok bilong Baibel Hibru na Grik ol i tanim olsem “stretpela tru” o “nambawan tru,” sampela taim mining bilong en i olsem “inap tru,” “bikpela pinis,” o “stret olgeta” inap long mak wanpela bosman samting i bin putim. Na taim yumi save tok long samting i nambawan tru, yumi no ting em i stret olgeta, nogat. Em i olsem: Sapos san i lait na skai i klia tru yumi save tok, “dispela de em i nambawan tru.”

God i bin wokim Adam na Iv i nambawan olgeta long pasin na long ol samting bilong spirit na bilong skin. Ol i nambawan tru o stretpela tru inap long mak Man Bilong Wokim ol i bin putim. Tasol tupela i bikhet na ol i no inapim mak God i bin putim, olsem na nau tupela i lus long i stap stretpela tru o nambawan tru, na ol pikinini bilong ol i kamap bihain, ol tu i lus long dispela samting. Em nau, long rot bilong Adam, sin na dai i kisim olgeta manmeri bilong graun.​—Ro. 5:12.

Tasol long Bikpela Tok Long Maunten, Jisas i kamapim klia olsem maski ol man i gat sin na i save popaia, ol inap i stap nambawan tru long sampela samting. Long dispela bikpela tok bilong em, Jisas i putim mak yumi mas winim long pasin laikim i nambawan olgeta. God yet i bin mekim dispela pasin laikim long ol manmeri bilong graun. Jisas i tok: “Yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela. Olsem bai yupela i stap pikinini bilong Papa bilong yupela em i stap long heven. Em i save mekim san bilong en i kamap antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man bilong mekim pasin i no stret tu.” (Mt. 5:​44, 45) Sapos ol disaipel bilong Jisas i mekim kain pasin laikim olsem, ol bai bihainim pasin bilong God i nambawan olgeta.

Long nau, ol Witnes Bilong Jehova long olgeta hap ol i wok strong long winim mak bilong laikim tru ol narapela. Ol i laik helpim ol man bilong olgeta lain na skin na lotu long kisim stretpela save long tok i tru bilong Baibel. Long nau, long 236 kantri, ol Witnes i save mekim olsem 7,000,000 Baibel stadi wantaim ol man i laik harim tok bilong Baibel.

Jisas i askim ol man: “Sapos yupela i laikim tasol ol man i save laikim yupela, bai yupela i kisim wanem pe? Ol man bilong kisim takis, ol tu i save mekim wankain pasin. Na sapos yupela i givim gude long ol brata bilong yupela tasol, bai yupela i winim ol arapela man long wanem samting? Ol haiden tu i save mekim olsem.” (Mt. 5:​46, 47) Ol Kristen tru i no save laikim tasol ol man i bin kisim bikpela skul o man bilong wanpela lain tasol, nogat; na ol i no mekim gut tasol long ol man em ol inap mekim gut long ol. Ol i save helpim ol rabisman na sikman, ol yangpela na lapun. Taim ol Kristen i mekim olsem, ol i save bihainim pasin laikim bilong Jehova na i stap nambawan tru long dispela samting.

Yu ting yumi inap kisim pasin bilong i stap nambawan tru em Adam i bin lusim? Yumi inap. Long rot bilong bilip long ofa bilong Jisas long baim bek ol man, ol manmeri i bihainim tok bilong God ol bai kamap nambawan olgeta insait long Wan Tausen Yia Bilong Krais i Stap King, taim ‘Pikinini Bilong God i bagarapim na rausim wok bilong Satan.’​—1 Jo. 3:8.